[1] Vakatekivu 5

¹Oqo nai vola i tukutuku ni kawa vaka-Atama. Na Kalou, ena siga sa bulia kina na tamata, sa cakava me veiucui vata kei na Kalou.

²Sa bulia na tagane kei na yalewa na Kalou ka vosa vakalouvinakataki rau ka vakatokai rau me tamata mai na siga rau sa buli kina.

³Sa bula tiko o Atama me dua na drau tolusagavulu na yabaki ka sa vakasucumi vua e dua na gone, e tagane sa vakataki koya ga, me rau veiucui, na yacana o Seci.

⁴Ni sa sucu oti o Seci, sa bula tale tiko o Atama me walu na drau na yabaki. Sa qai sucu tale eso na luvena tagane kei na luvena yalewa.

⁵Na veisiga kece nei Atama, sa ciwa na drau tolusagavulu na yabaki, ka sa qai mate yani.

⁶Sa yabaki dua na drau ka lima o Seci, sa qai vakasucumi vua o Inosi.

⁷Ni oti na sucu nei Inosi, sa bula tale tiko o Seci me walu na drau ka vitu na yabaki. Sa vakasucumi tale eso na luvena tagane kei na luvena yalewa.

⁸Na veisiga taucoko nei Seci sa ciwa na drau tinikarua na yabaki, ka sa qai mate yani.

⁹Sa yabaki ciwasagavulu o Inosi qai vakasucumi vua o Keinana.

¹⁰Ni sa sucu oti o Keinana, sa bula tiko o Inosi me walu na drau tinikalima na yabaki, ka sa sucu talega eso na luvena tagane kei na luvena yalewa.

¹¹Sa mate o Inosi, ni sa ciwa na drau kalima na yabaki ni nona bula.

¹²Sa yabaki vitusagavulu o Keinana, ni sa sucu o Maelalieli.

¹³Sa vakasucumi vei Keinana o Maelalieli, sa yabaki walu na drau vasagavulu o Keinana ka sa vakasucumi talega vua e so na luvena tagane kei na luvena yalewa.

¹⁴Na yabaki ni bula taucoko nei Keinani sa ciwa na drau ka tini na yabaki ka sa qai mate yani.

¹⁵Sa yabaki onosagavulu ka lima tiko o Maelalieli, sa qai vakasucumi vua o Jareti.

¹⁶Ni sa sucu oti o Jareti, sa bula tiko o Maelalieli me walu na drau tolusagavulu na yabaki ka sa sucu tale eso na luvena tagane kei na luvena yalewa.

¹⁷Na yabaki ni bula nei Maelalieli e walu nadrau ciwasagavulu ka lima na yabaki, ka sa qai mate yani.

¹⁸Sa bula o Jareti me yabaki dua na drau onosagavulu ka rua sa qai sucu o Inoke na luvena.

¹⁹Ni sa sucu oti o Inoke sa bula tale tiko o Jareti me walu na drau na yabaki ka sa sucu tale eso na luvena tagane kei na luvena yalewa.

²⁰Na veisiga kece nei Jareti sa ciwa na drau onosagavulu karua na yabaki ka sa qai mate yani.

²¹O Inoke, sa yabaki onosagavulu ka lima ni sa vakasucumi vua o Mecusela.

²²Ni sa vakasucumi oti vua o Mecusela, sa kune vua, ni rau sa daulako vata kei na Kalou me tolu na drau na yabaki, ka sa vakasucumi talega vua na luvena tagane kei na luvena yalewa.

²³Na veisiga kece nei Inoke sa tolu na drau onosagavulu ka lima na yabaki.

²⁴Sa daulako vata kei na Kalou o Inoke; ka sa yali eke, ni sa kauti koya na Kalou.

²⁵Sa yabaki dua na drau walusagavulu ka vitu o Mecusela ni sa vakasucumi vua o Lemeki.

²⁶Ni sa sucu oti o Lemeki, sa bula tale tiko o Mecusela me vitu na drau walusagavulu ka rua na yabaki, ka sa sucu tale e so na luvena tagane kei na luvena yalewa.

²⁷Na veisiga kece ni bula nei Mecusela sa ciwa na drau onosagavulu ka ciwa na yabaki, ka sa qai mate yani.

²⁸O Lemeki sa yabaki dua na drau walusagavulu karua ni sa vakasucumi vua e dua na luvena tagane.

²⁹Sa vakayacani koya me o Noa, ni sa tukuni, "O koya oqo ena vakacegui keda mai na noda oca kei na cakacaka ni ligada, ena vuku ni qele sa rukaka oti o Jiova."

³⁰Ni sa sucu oti o Noa, sa bula tale tiko o Lemeki me lima na drau ciwasagavulu ka lima na yabaki, ka sa sucu tale kina eso na luvena tagane kei na luvena yalewa.

³¹Na veisiga kece nei Lemeki sa vitu na drau vitusagavulu kavitu na yabaki ka sa qai mate yani.

³²Sa yabaki lima na drau o Noa, ni ratou sa sucu o Semi, o Ame, kei Jevica.