[1] Vakatekivu 6

¹Sa qai yaco ni ra sa lewe levu mai na tamata e dela i vuravura, sa levu talega na luvedra yalewa,

²O ira na luve ni Kalou, ni ra sa raici ira na luvedra yalewa na tamata, ni ra sa rui totoka; era sa tauri ira me watidra, o ira kecega era sa digitaka.

³Sa qai tukuna o Jiova, "Na Yaloqu ena sega ni veicoqacoqa tikoga kei na tamata me sega ni mudu, baleta ni sa vakayago na tamata; na nona veisiga sa na dua na drau ruasagavulu ga na yabaki."

⁴Era sa tu e vuravura ena gauna o ya, na tuwawa, era sa dau lako mai na luve ni Kalou ka veidauci kei ira na luvedra yalewa na tamata, era sa mani sucu kina na gone. Oqo, o ira na tamata kaukauwa ka kilai ena gauna o ya.

⁵O Jiova, ni sa qai raica na vakasisila ni tamata ni sa rui sivia e vuravura, na nakinaki kei na vakanananu ni yalo ni tamata, sa caca tikotikoga.

⁶Sa veivutunitaka sara ga o Jiova ena Nona a bulia na tamata e vuravura, ka sa rarawa vakalevu kina na Yalona.

⁷Sa tukuna kina vaka oqo, o Jiova, "Au na vakarusa na tamata mai na delai vuravura, o koya Au a bulia, kecekece, na tamata, na manumanu, na veika era qasi voli kei na manumanu vuka ni macawa, ni'u sa rarawataka sara ga, na noqu a buli ira."

⁸O Noa duaduaga sa kune loloma ena mata i Jiova.

⁹Oqo nai tukutuku ni bula nei Noa. O Noa sa tamata dodonu ka sega ni cala ena nona i tabatamata. Sa dau lako vata kei na Kalou o Noa.

¹⁰Sa vakasucumi vei Noa e tolu na luvena tagane: O Semi kei Ame kei Jevica.

¹¹Sa ca ka vakacacani vakalevu o vuravura ena mata i Jiova, o vuravura sa sinai talega ena i valavala kaukauwa e ca sara.

¹²Na Kalou sa rai yani ki vuravura, ka raica, ni sa ca dina na kena i tuvaki, ni ra sa ca na tamata kecega kei na nodra i valavala kecega, e delai vuravura.

¹³Na Kalou sa qai tukuna vei Noa, "Nai tinitini ni ka kecega e vakayago, sa lako cake mai vei Au oqo, ni ra sa vakasinaiti vuravura ena veika e kaukauwa ca; raica, Au na vakarusai ira vata kei na vuravura.

¹⁴"Mo cakava vei iko e dua na waqa kau, cakava e loma ni waqa na veirumu, botana na loma ni waqa ena kuluta, e tuba talega.

¹⁵"Mo cakava vaka oqo: na balavu ni waqa me va na drau limasagavulu na fiti, na kena raraba me vitusagavulu ka lima na fiti kei na kena cere me vasagavulu ka lima na fiti.

¹⁶²Me dua na katuba leka ni waqa, me tinikawalu na idi mai na dela ni waqa. Na katuba me tiko e baba ni waqa. Me taba tolu taki na loma ni waqa.

¹⁷"Mo kila, oi Au na kauta mai na waluvu levu e vuravura, me vakarusai kina na yago vakalewe kece e ruku i lomalagi, sa tiko vei ira na i cegu ni bula, kei na ka kecega sa bula e vuravura, e na mate.

¹⁸"Ia, Au na tekivuna na Noqu veiyalayalati kei iko “ o na curu ki waqa, o iko, o iratou na luvemu tagane, o na watimu, kei iratou na dui watina na luvemu.

¹⁹"Na veika bula kece, me kau mai e rua na kena mataqali ki na waqa, me ra bula tiko vata kei iko, me dua e ka tagane kei na dua na ka yalewa.

²⁰"O ira na manumanu vuka na kena veimataqali, na manumanu yavaiva ena kena veimataqali, na veika sa qasi voli ena kena veimataqali, me ra lako yaya rua mai, me ra maroroi me ra bula.

²¹"Mo kauta mai vei iko na kakana kecega e laukana, mo kumuna vei iko na kakana kei na kedra talega na manumanu."

²²Sa cakava o Noa, me vaka sa vakarota vua o Jiova, sa cakava vaka kina.