[1] Vakatekivu 8

¹Na Kalou sa qai nanumi Noa kei na veika bula kecega, na manumanu kecega era sa tiko vata kei Noa e waqa. Sa vakavuna na Kalou me liwa e dua na cagi e vuravura,ka sa lutu sobu nai vakarau ni wai.

²Nai vurevure mai na vei wai titobu kei na veikatuba lalai mai lomalagi era sa tasogo. Sa tu vakadua na uca mai lomalagi.

³Sa drodro tani tiko ga yani na wai mai vuravura. Nai otioti ni ka dua na drau limasagavulu ni siga, sa lailai sara na wai.

⁴Ena i ka tinikavitu ni siga, ni kavitu ni vula, sa mai kasa toka na waqa ena dela ni ulunivanua mai Ararata.

⁵Sa lutu sobu tikoga na wai ni waluvu me yacova na i katini ni vula. Ena matai ni siga ni katini ni vula, era sa laurai mai na dela ni veiulunivanua.

⁶Sa qai yaco, ni sa yacova mai na mua ni ka vakasagavulu ni siga, sa dolava o Noa na vei katuba lalai ni waqa, ea tara ga o koya.

⁷Sa vakatala yani o Noa e dua na reveni, ka sa veivukayaki tiko ga, me yacova ni sa mamaca mai na vanua.

⁸Sa vakatala talega mai vua, e dua na ruve, me raica se sa maca dina na wai mai na delai vuravura.

⁹Na ruve sa sega ni raica e dua na vanua me ro kina, ka sa vuka lesu tale ki waqa vei Noa, ni se luvu tiko ga o vuravura. Sa dodoka yani o Noa na ligana ka taura mai na ruve, sa kauta mai na ruve ki vei koya e waqa.

¹⁰Sa wawa tale me vitu na siga, sa qai vakatala tale yani na ruve mai na waqa.

¹¹Sa lesu tale mai vua na ruve ena yakavi, ka sa kauta tiko mai e dua na drau ni olive e se qai beti vou, ena gusuna; oqo sa kila kina o Noa ni sa oti na waluvu.

¹²Sa wawa tale me vitu na siga ka vakatala tale yani na ruve, na ruve oqo sa sega tale ni lesu mai vua.

¹³Ena i ka ono na drau ka dua ni yabaki, ena i matai ni siga ni matai ni vula, sa maca vakadua na wai mai na delai vuravura; sa cecega o Noa na i ubi ni waqa ka rai yani, sa dina sara, sa mamaca tu o vuravura.

¹⁴Ena i ka ruasagavulu ka vitu ni siga ni karua ni vula, sa mamaca sara na qele.

¹⁵Na Kalou sa vosa vei Noa ka vaka,

¹⁶"Lako tani mai na waqa, o iko, kei iratou na luvemu tagane, o watimu kei iratou na vugomu.

¹⁷"Me ra lako tani mai vata kei iko na veika bula kece sa vakalewe, na manumanu vuka, na bulumakau kei na veika kece sa qasi voli e delai vuravura, me ra mai vakalewelevutaki ira e vuravura, me ra mai yaga vakalevu ka tubu talega me levu."

¹⁸Sa curu ki tuba o Noa kei iratou na luvena tagane, o watina kei iratou na vugona.

¹⁹Na manumanu kece, na veika kece e qasi voli e delai vuravura, na manumanu vuka, me vaka na nodra dui kawa, era sa lako tani mai na waqa.

²⁰Sa tara o Noa e dua nai cabocabo ni soro vei Jiova, ka taura mai na veimanumanu savasava kei na veimanumanu vuka e savasava, ka vakacabora me i soro kama ena i cabocabo ni soro.

²¹O Jiova, sa boica nai boi kamikamica. Sa qai tukuna ga e Lomana, "Au na sega tale ni rukaka na qele ena vuku ni tamata, e dina mada ga ni sa cala tu na vakanananu ni yalo ni tamata mai na gauna e se cauravou kina. Au na sega ni vakarusa tale e dua na ka bula me vaka Au sa vakayacora oti.

²²"Baleta ni se tiko ga na vuravura, na kakaburaki kei na tatamusuki, na batabata kei na katakata, na vulai liliwa kei na vulai katakata, na siga kei na bogi ena sega ni oti."