[58] Iperiu 1

¹Na Kalou, ena veitaba gauna kei na kena i valavala e duidui, sa vosa kina vei ira na qase mai vei ira na parofita,

²Sa vosa talega vei keda ena gauna e muri oqo mai Vua na Luvena, o Koya sa lesia o Koya mei taukei dodonu ni veika kecega, o Koya talega na Luvena oqo sa caka kina o vuravura;

³O Koya na rarama serau ni Nona i ukuuku, kei na kena veiucui dina kei na Kalou kei na kena maroroi kei na kena laveti cake tiko na ka kece, ena kaukauwa ni Nona vosa, o Koya ga vakai Koya sa kauta tani na noda i valavala ca, ka sa qai dabe tiko oqo ena yasana i matau i Koya sa cecere sara.

⁴Sa qai yaco me uasivi sara mai vei ira na agilosi, ni sai Koya me vaka na vanua sa vu mai kina, sa rawata na yaca sa uasivita na yaca kecega.

⁵O cei vei ira na agilosi sa cavuta kina o Koya: (Kalou) "O iko na Luvequ, ena siga oqo Au sa vakatabui iko"? Sa tukuna tale: "Oi Au na tamana ki vua, ka na Luvequ o Koya ki vei Au?"

⁶Ni sa kauti Koya mai na ulumatua o Koya ki vuravura ka sa tukuna kina: Oi kemuni kece na agilosi mo ni lotu vei Koya.

⁷Ki vei ira na agilosi sa tukuna kina o Koya: O cei sa cakava me ra yalo o ira na agilosi kei ira na Nona dauveiqaravi me yameyame ni bukawaqa?

⁸Ia, ki vua na Luvena sa tukuna kina o Koya: "Na Nomuni tikotiko na Kalou sa sega ni mudu;" "nai tutu ni dodonu sai tutu ni Nomuni matanitu."

⁹"O ni sa lomana na dodonu ka cata na vakaveitalia; o koya oqo na Kalou, na Nomuni Kalou sa lumuti Kemuni ena waiwai ni mamarau me siviti ira na Nomuni tokani."

¹⁰"Oi Kemuni na Kalou, mai nai vakatekivu, o ni sa vakayavutaki vuravura, o lomalagi sa cakacaka ni ligamuni;

¹¹Era na rusa kece, ia oi Kemuni ena tudei tu ga; era na madra mai me vaka nai sulu;

¹²Me vaka nai sulu e tuba, era na lobi ka veisau mai, ia oi Kemuni sai koya koya tikoga kei na Nomuni veiyabaki ena sega ni mudu."

¹³O cei vei ira na agilosi e sa bau tukuna kina o Koya: "mai dabe ena Ligaqu i matau me yacova ni sa vakayacori ira na Kemuni meca mei tutu ni Yavamuni?"

¹⁴Era sa sega li ni yalo e dauveiqaravi, era sa talai me qaravi ira sai taukei ni bula sa mai vua na Kalou?