[57] Filimone 1

¹Oi au o Paula, sa vesu tu ena vuku i Jisu Karisito, kei Timoci na wekada, vei Filimoni o koya keirau sa daulomana, na neirau i tokani,

²Vei Afia talega na wekada yalewa, vei Akipo talega na neirau i tokani ena i valu oqo, vei ira talega na i soqosoqo lewe ni lotu era sa tiko ena nomu vale:

³Me nomudou na loloma, kei na vakacegu, mai Vua na Kalou o Tamada, kei na Turaga o Jisu Karisito.

⁴Au sa vakavinavinaka vua na noqu Kalou, ni'u sa cavuti iko ena veisiga ena noqu qaqa ni masu,

⁵Ni'u sa rogoca na nomu loloma kei na nomu vakabauta Vua na Turaga o Jisu, kivei ira kece talega sa lotu,

⁶Me kaukauwa na vakabauta sa tu vei iko, me vakatakilai kina na ka kecega e vinaka sa tu vei kemudou, ena vuku i Karisito Jisu.

⁷Ni sa levu na neitou reki kei na vakacegu ena vuku ni nomu loloma, na wekaqu, ni o sa vakaceguya na lomadra era sa lotu.

⁸O koya oqo au sa doudou kina ena vuku i Karisito, me'u vakarota vei iko na ka e dina,

⁹Ena vuku ni nodaru veilomani ga ka'u sa vinakata kina me'u sa vakamamasu ga, ni oi au o Paula na qase, ka'u sa vesu talega e daidai ena vuku i Jisu Karisito.

¹⁰Au sa vakamasuti iko ena vuku ni luvequ o Onisimo, o koya ka'u sa susuga cake ni keirau a vesu tu.

¹¹O koya sa sega ni yaga e liu vei iko, ia oqo sa qai yaga vei iko, vei au talega.

¹²Au sa vakatalai koya lesu tale yani vei iko. O koya oqo mo vakacegui koya e na loloma ni sa vaka ga e tiki ni yagoqu dina sara.

¹³Au vinakata me sa tikoga vei au, me kemu i sosomi me sa qaravi au e na noqu vesu tu, e na vuku ni Tukutuku Vinaka.

¹⁴Ia ni'u se sega ni kila na lomamu, au se sega ni via cakava e dua na ka, me kakua ni vaka na ka ni vakasaurara na nomu loloma, me sa yalomu ga kina.

¹⁵O koya beka oqo sa lako tani yani kina vakalekaleka, mo tauri koya vakadua.

¹⁶Me kakua ni vaka e dua e bobula vei iko, me uasivi cake mai vei ira na bobula me tacimu ka wekamu voleka, e vakalevu sara vei au ia ka vakacava mada vei iko, ni sa wekamu vakayago ena vuku ni Turaga.

¹⁷Kevaka o wiliki au tiko me nomu i tokani, mo ciqomi koya me vakataki au.

¹⁸Ia kevaka e dua na ka e cala kina vei iko se tu na nona i dinau vei iko, mo vola vei au.

¹⁹Oi au o Paula, au sa vola ena ligaqu dina. Au na sauma lesu ka'u na sega ni na tukuna vei iko ni sa dodonu ga mo noqu talega o iko.

²⁰Io, taciqu, me'u rekitaki iko mada ena Turaga; vakaceguya na lomaqu ena vuku i Karisito.

²¹Ni ka'u sa vakadinata ni o na talairawarawa kina, ena ka au sa vola yani oqo vei iko, ni'u sa kila o na vakayacora me uasivi sara.

²²Ia mo vakarautaka talega e dua na vale me'u moce kina, ni'u sa vakabauta ni nomudou masu au na sauma lesu tale vei kemudou.

²³O Epafira na noqu i tokani keirau vesu vata tu ena vuku i Jisu Karisito, sa loloma yani,

²⁴Vaka talega kina o Marika, o Arisitako, o Timasa kei Luke oi iratou oqo na noqu i tokani.

²⁵Na loloma ni noda Turaga o Jisu Karisito me tiko ena yalomudou. Emeni.