[58] Iperiu 10

¹Sa tiko ena i vunau nai yaloyalo ni veika vivinaka ena lako tiko mai, sa sega ni o koya dina na ka o ya, sa sega ni rawa ena i soro vata tiko ga, o koya sa dau vakacabori tikoga ena veiyabaki me vakataucokotaki ira sa vakacabora.

²Me sa dau vakacabori tikoga nai soro? O ira sa vakasavasavataki sa sega ni dodonu me ra nanuma tiko ga nai valavala ca.

³O ira sa vakacabora nai soro, sa tiko ga na vakananumi ni valavala ca ena veiyabaki.

⁴Ni sa sega sara ni rawata na dra ni bulumakau kei na dra ni me, me kauta tani nai valavala ca.

⁵Ni sa lako mai o Koya ki vuravura, sa tukuna o Koya: "nai soro kei nai madrali o ni sa sega ni vinakata, e dua na yago o ni sa vakaraitaka vei Au.

⁶Nai soro kama kei nai madrali ni valavala ca o ni sa sega ni marauataka."

⁷Au sa qai tukuna, "Raica Au sa lako mai, nai vola kece oqo sa volai me baleti Au, me'u cakava na ka o ni sa lewa na Kalou."

⁸Sa tukuni e liu, "Nai soro kei na madrali na i soro kama kei nai madrali ni valavala ca o ni sa sega ni gadreva ka sega ni marautaka," ni ra sa vakacabori me vaka nai vunau,

⁹Sa qai tukuna o Koya, "Raica, Au sa lako mai me'u vakayacora na Lomamuni na Kalou." Sa kauta laivi o Koya nai matai ka vakadeitaka nai karua.

¹⁰Ena lewa o ya e da sa vakasavasavataki ena kena vakacabori vakadua na yagoi Jisu Karisito.

¹¹Na bete kece, sa tucake tiko ena veisiga me vakacabora tiko nai soro, sa sega ni rawa ni kauta tani nai valavala ca.

¹²Ia, o Koya oqo, ni sa vakacabora oti e dua nai soro ni valavala ca me vakaotia vakadua, sa qai dabe na liga i matau ni Kalou.

¹³Mai na gauna o ya, e se wawa tikoga, me yacova ni sai butubutu ni Yavana o ira na meca.

¹⁴Ni sa dua ga nai soro, sa vakataucokotaki ira kina me sega ni mudu o ira kece sa vakasavasavataki tiko.

¹⁵Sa vakadinadina talega kina vei keda na Yalo Tabu, ni sa dau tukuna,

¹⁶Oqo na veiyalayalati Au na vakayacora vei ira ni sa oti na veisiga oqo, sa tukuna na Turaga: Au na vakatikora na Noqu Vunau kina yalodra, Au na vola ki na nodra mona,"

¹⁷Sa vakuria tale o Koya,"na nodra i valavala ca kei na nodra caka cala kecega, Au na sega ni nanuma tale:

¹⁸O koya oqo, ena vanua sa tiko kina nai sosomi ni veika oqo, sa sega ni gadrevi nai soro ni valavala ca.

¹⁹O koya oqo na veiwekani, me da doudou ni curu kina Tikina Tabu sara ena vuku ni dra i Jisu,

²⁰Ena sala, sa vou ka bula, sa vakatara vei keda o Koya, ena i lati. Oqori na yagona,

²¹Sa dua talega kina na kena Bete Levu ena Vale ni Kalou,

²²Me da qai toro voleka yani ena yalodina, ena veivakadeitaki ni vakabauta, ni sa kaburaki tani mai na yaloda na veika ca kei na yagoda sa savati ena wai savasava sara.

²³Me da taura matua sara na vakatusa ni veika eda sa nuitaka ka me kua talega ni yavala, baleta, ni o Koya sa yalataka sa dau dina tikotikoga.

²⁴Me da dau veinanumi vakaikeda ka vakatubura na nodra veilomani kei na cakacaka vinaka,

²⁵Me da kakua ni biuta na vakasoqoni vata, me vaka na nodra i valavala e so, me da veivakatataki cake ga, ka vakalevu ni da sa raica, ni sa toro voleka tiko mai na siga.

²⁶Kevaka eda sa i valavala ca tale ni da sa kila oti nai vakavuvuli ni ka dina, sa qai sega tale nai soro ni valavala ca oqori.

²⁷Sa qai vo ga, na noda waraka ena rere levu, na veilewai kei cudru waqawaqa sa dau kani ira na talaidredre.

²⁸O koya sa cata nai vunau i Mosese, sa vakamatei ka sega tale ni lomani, ena i vakadinadina e rua se tolu.

²⁹Ena qai vakacava sara na ca ni totogi ena soli vei ira sa butuka sobu na Luve ni Kalou ena yavadra, ka vakatawayagataka na dra ni veiyalayalati sa vakasavasavataki ira oti ka beca ena matana votu na Yalo ni loloma?

³⁰Ni, Oi keda, eda sa kilai Koya sa dau tukuna tiko," sa noqu na veisausaumi vakadodonu, Au na sauma Oi Au, sa tukuna na Turaga, Vakarua tale, Na Turaga ena lewai ira na Nona tamata."

³¹Sa ka rerevaki sara me da lutu ki na liga ni Kalou bula.

³²Dou vakananuma mada na nomudou veisiga e liu, dou a vakararamataki kina, dou sa vosota ga na dredre e veivakararawataki,

³³dou sa vakavotoki, dou sa vakalialiai ka vakararawataki, dou sa vosota tiko ga ni dou sa tiko vata kei ira talega sa caka tiko vei ira oqori.

³⁴Dou sa lomani au ena noqu vesuki tu, ena reki dou sa ciqoma na vakacacani ni nomudou i yaya, ni dou sa kila sa tiko e so na veika vivinaka sara, na veika sa tudei, sa tiko mai lomalagi me nomudou.

³⁵Dou kua ni viritaka laivi na nomudou tudei, sa levu dina na kena i sau.

³⁶Sa yaga veikemudou na vosota vakadede ni dou sa cakava oti na lewa ni Kalou, dou na rawata na ka sa yalataki.

³⁷Io, vakalailai mada, o Koya sa lako tiko mai, ena lako dina mai ka na sega ni berabera.

³⁸Oqo, o ira sa vakadonui era na bula ena vakabauta;

³⁹Ia, oi keda sa sega ni vakataki ira sa lesu tale yani, meda sa vakataki ira ga sa vakabauta tiko me vakabulai na yalo.