[58] Iperiu 11

¹Na vakabauta sa vakarairaitaki kina na veika eda sa nuitaka tiko, sa vakadinadinataka na veika sa sega ni kunei.

²Na vakabauta era sa rawata kina na rogorogo vinaka o ira na qase.

³Ena vakabauta eda sa kila kina ni sa buli na vuravura ena Vosa ni Kalou, na veika sa kune tu oqo, sa sega ni buli mai na veika sa tu oti.

⁴Ena vakabauta sa vakacabora kina o Epeli nai soro e vinaka vakalevu sara mai nai soro nei Keni, oqo sa rawata kina o Epeli nai vakadinadina ni sa yalododonu, sa dau tukuna tiko na Kalou na nona i solisoli; e dina ga sa mate o Epeli, ia e se vosa tikoga na veika e cakava.

⁵Ena vakabauta "sa kau bulabula yani kina oinoke ka sa sega ni raica na mate, sa sega ni laukune o koya baleta ni sa kauti koya na Kalou," ni se bera ni kau yani, sa tu ga vua nai vakadinadina ni sa vinakati koya na Kalou.

⁶Kevaka sa sega na vakabauta, sa sega ni rawa vua e dua me vakaloma-vinakataka na Kalou. O koya sa via lako mai vua na Kalou, e dodonu me vakabauta ni sai Koya ga, sa dau saumi ira talega sa dau vakasaqara vakagumatua na Kalou.

⁷Ena vakabauta o Noa, ni sa vakasalataki koya oti na Kalou, ena veika sa sega tiko ni yaco, sa toso ena rerevaka na Kalou,sa vakarautaka na waqa me ra bula kina na nona vuvale, sa qai vunauca kina na vuravura, sa qai yaco mei taukei ni yalododonu me vaka ga na vakabauta.

⁸Ena vakabauta, o Eparama, sa talairawarawa, ni sa kacivi me lako ki na vanua e a qai nona i votavota e muri. Sa lako ga o Koya, e dina ga ni sa sega ni kila na vanua ko ya.

⁹Ena vakabauta, sa lako ki na vanua sa yalataki, na vanua sa vulagi vua, sa tiko ga ena valelaca vata kei Aisale kei Jekope, oi rau na kena kawa ni vosa ni yalayala;

¹⁰Ni sa waraka tiko o koya e dua na koro levu sa vakayavu, sa tara ka cakava na Kalou.

¹¹Ena vakabauta, o Sera vakataki koya sa rawata na kaukauwa me kunekunetaki na kawa, sa vakasucuma na gone ni sa sivia na gauna me kunekunetaki kina e dua baleta o Sera sa vakadinati Koya sa yalataka oti.

¹²O koya oqo, mai vua ga e dua na tagane, sa vinaka ga me vaka e dua sa mate, era sa qai sucu mai vua na lewe vuqa me vaka na kalokalo ni lomalagi, sa sega ni wili rawa, e vaka na veinuku ni matasawa.

¹³Era sa mate kece oqo ena vakabauta ni se bera ni ra taura na vosa ni yalayala, ia era sa raica vakayawa tiko ga yani ka sa vakadeitaki vei ira, ka ra sa taura matua, era sa vakatusa voli ena vuravura oqo.

¹⁴O ira sa cavuta tiko na veika oqo, era sa tukuna tiko ga vakamatata ni ra sa vakasaqara tiko e dua tale na vanua.

¹⁵Sa dina sara, kevaka era sa vakananuma tiko ga na vanua era sa lako tani mai kina, sa na tiko vei ira e so na galala me ra lesu take kina.

¹⁶Oqo, era sa gadreva e dua na vanua e vinaka cake, na vanua vakalomalagi. Sa sega ni madua kina na Kalou, me kacivi me nodra Kalou, ni sa vakarautaka tiko o Koya e dua na koro levu me nodra.

¹⁷Ena vakabauta, o Eparama ni sa vakatovolei, sa soli Aisake, o koya ni sa rawata na yalayala, sa vakacabora na luvena tagane e duabau ga,

¹⁸O koya sa tukuni kina, mai vei Aisake ena tubu mai kina na nomu kawa;

¹⁹sa kilai kina ni na vakatubura cake na Kalou, io, kevaka mada ga sa mate, sa tauri koya talega ena vakasama ni dua nai vakaraitaki.

²⁰Ena vakabauta, o Aisake sa vosa vakalouvinakataki Jekope kei Iso ena vuku ni veika sa lako tiko mai.

²¹Ena vakabauta, o Jekope ni sa mate tiko, sa vakalouvinakataki iratou na luvei Joseva, ka lotu ni sa taura matua tiko ena nona i titoko.

²²Ena vakabauta o Joseva, ni sa mate tiko, sa tukuna rawa na nodra sa na lako tiko na Isireli ka sa solia rawa tiko na i vakasala me baleta na nona sui.

²³Ena vakabauta ni sa sucu o Mosese sa vunitaki me tolu na vula vei na nona i tubutubu, baleta ni rau sa raica ni gone rairai totoka; ni rau sa sega ni rerevaka nai vakaro ni tui.

²⁴Ena vakabauta, o Mosese ni sa matua mai, sa besetaka ni cavuti vua me luvena na luvei Fero yalewa,

²⁵sa digitaki me vosota na rarawa vata kei ira na tamata ni Kalou, mai na nona via marautaka na veika ni valavala ca ni vuravura,

²⁶sa kila na veivakacacani ena vuku i Karisito sai yau levu ka lailai nai yau kece mai Ijipita, oqori na kena i sau sa raica tiko o koya.

²⁷Ena vakabauta, sa biuti Ijipita kina o koya, sa sega ni rerevaka na nona cudru waqawaqa na tui; ni sa dei tikoga na nona raici Koya sa sega ni laurai.

²⁸Ena vakabauta, sa maroroya na lako sivia kei na kureitaki ni dra, de qai tarai ira o Koya sa dau vakamatei ira na ulumatua.

²⁹Ena vakabauta, era sa lako curuma kina na wasawasa damudamu me vaka na vanua mamaca, ia ni ra sa lakova yani na kai Ijipita, era sa luvu ga.

³⁰Ena vakabauta sa kabasu kina na bai kei Jeriko ni sa oti e vitu na siga na kena lako wavokiti.

³¹Ena vakabauta, o Reapi na yalewa dautagane sa sega ni rusa vata kei ira sa sega ni vakabauta, ni sa ciqomi rau na yamata ena marau.

³²Na cava tale me'u tukuna? Ena sega na gauna kevaka au sa tukuni Kitione kei Beraki kei Samisoni, kei Jevica, o Tevita talega kei Samuela ke ira na parofita:

³³O ira oqo, ena vakabauta era sa vakamalumalumutaka na veimatanitu, era sa cakacaka vakadodonu, era sa rawata na veika sa yalataki, era sa sogota na gusu ni laioni,

³⁴era sa bokoca na katakata ni bukawaqa, era sa qaqa mai na yame ni seleiwau, era sa qaqa mai na malumalumu, era sa yatedei ena i valu, era sa vukici ira na meca me ra veidrovaki.

³⁵O ira na yalewa era sa taura lesu mai na mate ni ra sa vakabulai tale, eso era sa vakararawataki, era sa sega ni vinakata me ra sereki me ra rawata kina na veika e vinaka cake, o ya na tucake tale mai na mate.

³⁶O ira tale e so era sa vakacacani, era sa vakalolomataki, io, era sa vesuki ena senicodo.

³⁷Era sa vakaviriki, ena vatu, era sa varoti rua ena i varo, era sa temaki vakalevu, era sa vakamatei vakadua ena i sele. Era sa veilakoyaki voli ena kuli ni sipi kei na kuli ni me, era sa biu ka guilecavi tu ka vakalolomataki vakaca sara “

³⁸sa sega ni yaga vei ira o vuravura, Era sa dauveilakoyaki voli ena veivanua dravuisiga ena veiulunivanua ena veiqara vatu walega.

³⁹Ena veika kecega oqo, ni ra sa rawata na veitukuniyalo vinaka ena vuku ni vakabauta, era se bera ga ni rawata na vosa ni yalayala.

⁴⁰Na Kalou sa vakarautaka e dua na ka e vinaka cake vei keda, me da vakataucokotaki vata, me kua ni o ira duadua ga.