[58] Iperiu 13

¹Me ia tikoga na veilomani vakaveitacini

²Kakua ni guilecava na vakamarautaki ira na vulagi, ni cakava oqo, e so era sa dau vakacegui ira na agilosi, ni ra sega tu ni kila.

³Dau nanumi ira na kaivesu me vaka sara ga dou sa vesuki vata tu; kei ira sa vakamavoataki, ni Oi kemudou kei ira o ni sa yago e duabau.

⁴Sa ka vakarokorokotaki na bula vakawati vei keda kecega, kei nai davodavo e sega ni vakadukadukalitaki; na Kalou, ena lewai ira vakadodonu na dauyalewa kei na dauveibutakoci.

⁵Me kua ni kocokoco na nomudou i valavala, mo dou yalovinaka ga ena veika sa tu vei kemudou. Ni sa tukuna oti o Koya, "Au na sega ni biuti kemudou se weletaki kemudou."

⁶Sa rawa kina vei keda meda tukuna; "sa noqu i vukevuke na Kalou, Au na sega ni rerevaka na cava ena rawa ni cakava vei au na tamata?

⁷Mo ni nanumi ira sa liutaki kemuni, era sa vakavulici kemuni ka vunautaka vei kemuni na vosa ni Kalou, vakamuria na nodra vakabauta ni kemuni sa raica matua na nodra i valavala.

⁸O Jisu sa sega ni veisau rawa, mai na veisiga sa oti, e daidai kei na veisiga ni mataka.

⁹Mo ni qarauna, mo ni kakua ni kau vakatani, ena vuku ni vakavuvuli vou e vuqa. Sa vinaka mo ni vakadeitaki tikoga ena loloma ka sega ena kakana, ni sa sega ni yaga vei ira sa dau cakava tiko.

¹⁰Sa dua tiko na noda i cabocabo ni soro, o ira mada ga sa veiqaravi ena vale ni soro sa sega ni dodonu mera kana kina.

¹¹Na yago ni manumanu sa kau mai na kena dra ki na vale ni soro mai vua na bete levu, sa vakamai mai na taudaku ni bai.

¹²Sa vakatalega kina o Jisu, me rawa ni vakasavasavataki ira kina na tamata ena Nona dra, ni sa vakararawataki ena taudaku ni bai.

¹³O koya oqo me da lako sara yani Vua ki na taudaku ni tikotiko, ni da sa colata tiko na Nona cudruvi.

¹⁴Ni sa sega ni dua na noda koro ni vakai tikotiko eke, eda sa vakasaqara tikoga e dua sa lako tiko mai.

¹⁵O koya oqo, ena Vukuna, me da sa vakacabora tikotiko ga ena vukuna nai soro ni vakacerecerea na Kalou. Oqori na vua ni tebenigusuda sa vakavinavinaka tikoga Vua.

¹⁶Me kua ni guilecavi na caka vinaka kei na veiwasei ena ka sa tu vei keda, ni soro sa vakaoqo sa rui loma vinaka kina na Kalou.

¹⁷Mo ni talairawarawa vei ira sa liutaki kemuni, mo ni vakarorogo vei ira ni ra sa dau yadrava tiko na yalomuni, me vaka, ni ra na soli tukutuku kina vua na Kalou. Me ra cakava sara ena reki ka me kua ena rarawa, ni sa sega ni yaga vei kemuni oqo.

¹⁸Mo ni masulaki keitou vakalevu, ni keitou sa doudou, ka sa galala na neitou lewa e loma, ena veika kecega keitou sa via bula ga vakavinaka.

¹⁹Au sa kerei kemuni vakabibi sara mo ni vakayacora oqo, me keitou vakatikori lesu kina veikemuni ena kena gauna totolo sara.

²⁰Na Kalou ni veivakacegui, o Koya sa vakaturi Jisu cake tale mai na mate, nai Vakatawa levu ni sipi, ena dra ni veiyalayalati ka sega ni mudu,

²¹Me vakataucokotaki kemuni ena cakacaka vinaka kecega na veika sa vinaka e matana, ena vuku i Jisu Karisito, o Koya sa Nona na lagilagi kei nai ukuuku, me sega ni mudu, Emeni.

²²Au sa vakamasuti kemuni, na veiwekani me noda vata na vosa ni veivakatataki cake, au sa vola vei kemuni ena vosa e vica ga.

²³Mo ni kila, ni o Timoci na tacida sa sereki, keirau na lako yani veikemuni kevaka sa lako mai vakatotolo.

²⁴Mo ni kauwaitaki ira sa liutaki kemuni, kei ira kece sa vakabauta. Era sa vakabula tiko yani o ira mai Itali.

²⁵Na loloma rairai vinaka ni Kalou, me sa tiko vakayadua kei kemuni. Emeni.