[59] Jemesa 1

¹Oi au o Jemesa, na i Talatala ni Kalou kei na Turaga o Jisu Karisito. Ki na yavusa e tinikarua e ra sa dui veiseyaki tu: Ni sa bula vinaka.

²Oi kemudou na wekaqu, dou nanuma me ka ni reki sara ni dou sa lutu ki na ka e vuqa sa dauveivakatovolei,

³Mo dou kila kina, ni sa dauvakatubura na dauvosota na vakatovolei ni nomudou vakabauta.

⁴Ia me tini vinaka na cakacaka ni dauvosota, mo dou vinaka taucoko sara, me kakua ni dua na ka me vakayali vei kemudou.

⁵Kevaka sa lailai na vuku vua e dua vei kemudou, me kerea Vua na Kalou, o Koya sa solia vakalevu kivei ira kecega na tamata, a sa sega ni dauveivakadirideini, e na solia ga vua o Koya.

⁶Ia me kerekere e na vakabauta, ka me kakua ni vakatitiqa, o koya e vakatitiqa sa vaka na ua ni waitui sa veicaginayaki e na cagi kecega.

⁷Me kakua sara ni nanuma na tamata o ya ni na rawata e dua na ka mai Vua na Turaga;

⁸O koya na tamata lomalomarua, sa yamekemeke na nona i valavala kecega.

⁹Me reki na tamata dravudravua e na nona laveti cake:

¹⁰Ia o koya e vutuniyau e na nona vakamaduataki, e na takali ga o Koya me vaka na se ni co.

¹¹Ni sa cabe cake na siga kei na cagi katakata sa vakaraqosataka sara na co, a sa mira na sena, a sa takali na kena rairai vinaka. E na takali yani vaka kina na tamata vutuniyau e na nona i valavala.

¹²Sa kalouvinaka na tamata sa vosota ni sa vakatovolei; e na gauna sa vakatovolei oti kina, e na rawata na i sala ni bula o koya sa yalataka na Turaga kivei ira sa lomani koya.

¹³Ni sa vakatovolei tiko e dua, me kakua ni tukuna, sa "Dauveretaki au na Kalou" e sega ni veretaka na Kalou na vuni ca, a sa sega ni dauveretaka e dua na tamata na Kalou.

¹⁴Sa dauveretaki na tamata yadua, ni sa vakaleqai koya ga na nona garogaro ca ka vu ni nona leqa.

¹⁵Na garogaro ni sa kunekunetaki, sa vakasucuma nai valavala ca, ni sa tubu me taucoko nai valavala ca, sa kauta mai na mate.

¹⁶Dou kakua ni vakacalai, oi kemudou na wekaqu lomani.

¹⁷Sa lako mai cake na i solisoli vinaka kecega kei na i solisoli e yaga sara vei keda, a sa lako sobu mai vei Koya na Tama ni rarama, ka sa sega Vua na veivukiyaki, se i yaloyalo ni veigoleyaki.

¹⁸E na Nona lewa sa vakatuburi keda kina o Koya ena vosa ni dina, me da vaka na i sevu ni veika sa bulia o Koya.

¹⁹O koya oqo, oi kemudou na wekaqu lomani, mo dou totolo ni vakarorogo mo dou berabera ga ni vosa, mo dou berabera talega ni cudru:

²⁰Baleta na cudru ni tamata ena sega ni vakatubura na yalododonu ni Kalou.

²¹O koya oqo mo dou qai biuta na ka ca kei na veika vakasisila, ka vakabauta e na yalomalumalumu na vosa sa tei e na lomamudou, o koya sa vakabula talega na yalomudou.

²²Ia dou muria na vosa, ka kakua ni rogoca walega ka vakaisini kemudou kina vakai kemudou.

²³Ia kevaka e dua sa rogoca walega na vosa ka sega ni muria, sa tautauvata kei na tamata sa la'ki ilovi koya e na iloilo;

²⁴Ni sa la'ki ilovi koya ka sa qai lako tani, a sa guilecava tale vakasauri se sa vakaevei na i rairai dina ni matana.

²⁵Ia o koya e raica na i vunau dina ni veisereki ka bula kina, sa sega ni daurogoca ka qai guilecava, sa vakayacora talega na cakacaka e na vakalouvinakataki koya kina.

²⁶Kevaka e dua vei kemudou sa nanuma sa lotu dina, ka sega ni tarova rawa na yamena, sa dauvakaisina na yalona, sa ka walega na nona lotu na tamata oqo.

²⁷Na lotu savasava ka sega ni cala e na mata ni Kalou o Tamada sa vaka oqo, me sa dauraici ira na luveniyali kei ira na yada, ni ra sa rarawa. Me sa qarauni koya talega me kakua ni tauvi koya e dua na duka vakavuravura.