[58] Iperiu 3

¹O koya oqo oi kemuni na veiwekani dina, kei kemuni sai taukei ni veikacivi vakalomalagi, mo ni raica mada na Apositolo, na Bete levu ni noda vakatutusa, o Jisu Karisito,

²Sa rui dina o Koya vei Koya sa kacivi Koya, me vaka sa dina o Mosese ena Nona vuvale taucoko.

³O Koya oqo, sa wiliki Vua me kilikili, me uasivi na Nona i ukuuku, mai vei Mosese, ni sai Koya sa tara na vale sa uasivi mai na vale.

⁴Na veivale kece sa tara e dua na tamata, ia, na Kalou sa tara na veika kecega.

⁵O Mosese sa dina ena nona vakabauti, ena Nona vuvale taucoko na Kalou, me vaka e dua na dauveiqaravi, mei vakadinadina ena veika ena qai dau tukuni e muri.

⁶O Karisito, na Gone e dua ga ena Nona lomanivale, sai keda na vale o ya, kevaka, eda sa taura matua na kena vakadeitaki kei na kena rekitaki nai nuinui dei ki nai vakataotioti.

⁷Me vaka sa tukuna na Yalo Tabu: Ena siga oqo, kevaka o sa rogoca na domona,

⁸Kua ni vakaukauwataka na yalomudou, me vakataki ira na dauvukitani, ena gauna ni veivakatovolei ena vanua liwa,

⁹Na vanua era sa vakatovolea kina na Kalou o ira na tamamuni, ka ra sa vakadinadinataka na cakacaka ni Kalou ena vasagavulu na yabaki.

¹⁰O koya oqo, Au a cudruvi ira kina nai taba tamata o ya ka tukuna kina, "O ira oqo, sa dau lako sese na yalodra, ka ra sa sega ni kila na Noqu sala."

¹¹Au sa bubului kina ena Noqu cudru, "Era na sega ni curu ki na Noqu i vakavakacegu."

¹²Mo ni qarauni kemuni vinaka, de dua vei kemuni sa tiko vua na yaloca, na sega vakabauta, me lako tani mai kina vua na Kalou bula;

¹³Mo ni dui veivakatakatai kemuni vakai kemuni ena veisiga, me vaka na ka sa tukuni, "Ena siga oqo, de dua veikemuni sa vakaukauwataka na yalona ena veivakaisini ni valavala ca."

¹⁴Ni keimami sai taukei vata kei Karisito, kevaka Keimami sa taura matua nai vakatekivu ni bula vakadeitaki me yacova nai otioti,

¹⁵Ni a sa tukuni: ena siga oqo kevaka o ni sa via rogoca na domona, "mo ni kua ni vakaukauwataka na yalomuni me vakataki ira na dauvukitani."

¹⁶O cei sa rogoca, qai vuki tani? Sa sega beka ni o ira kece sa lako mai Ijipita, ni ra liutaki mai vei Mosese?

¹⁷Sa cudruvi cei beka o Koya me vasagavulu na yabaki? Sa sega beka vei ira sai valavala ca? na yagodra mate sa tu mai na vanua liwa?

¹⁸Ki vei cei sa yalayala kina o Koya ni ra na sega ni curu ki na nona i vakavakacegu, o ira beka sa sega ni rogoca ka talairawarawa ki na nona vosa?

¹⁹Keimami sa kila ni ra na sega ni curu ena vuku ni sega vakabauta.