[58] Iperiu 4

¹O koya oqo, ni sa soli tu na vosa ni yalayala me da curu ki na Nona i vakavakacegu, me da qai rere, de qai dua e sega ni yaco dina kina.

²Ni sa vunautaki ki vei keda na kosipeli, sa vaka talega kina ki vei ira; ia na vosa era rogoca sa sega ni yaga vei ira, ni ra sa sega ni rogoca na vakabauta.

³Vei keimami sa vakabauta, sa curu ki nai vakavakacegu oqo, me vaka na ka sa tukuni: "Au sa bubului ena Noqu cudru katakata, era na sega ni curu ki na Noqu i vakavakacegu," e dina ga ni sa vakaoti na cakacaka mai na kena yavutaki o vuravura.

⁴Ni a sa cavuta o Koya ena dua na vanua ena i kavitu ni siga, me vaka oqo: "Sa vakacegu na Kalou ena i kavitu ni siga mai na Nona cakacaka kecega,"

⁵Vakarua tale ena vanua oqo: "era na sega ni curu ki na Noqui vakavakacegu."

⁶Ia, oqo sa vo tiko e so me curu, ia, ki vei ira sa vunautaki e liu vei ira nai tukutuku oqo, era na sega ni curu baleta na nodra talaidredre,

⁷Sa qai lewa tale o Koya e dua tale na siga, sa tukuna kina vei Tevita,"Ena siga oqo" ni sa oti e dua na gauna balavu, me vaka sa tukuni kina: "Ena siga oqo, kevaka dou sa via rogoca na Domoqu, dou kua ni vakaukauwataka na yalomudou me vaka taki ira na dauvuki tani.

⁸Kevaka sa solia vei ira o Josua na vakacegu, ena sega ni tukuna tale o Koya e dua tale na kena siga.

⁹Sa qai vo tiko oqo e dua nai vakavakacegu me nodra na tamata ni Kalou.

¹⁰Ni o koya sa curu ki na Nona i vakavakacegu sa cegu talega mai na nona cakacaka me vaka sa cegu na Kalou mai na Nona cakacaka.

¹¹O Koya oqo me da qai doudou sara me curu ki na nona i vakavakacegu, de qai dua e bale ni sa talaidredre vakakina.

¹²Sa bula tiko na Vosa ni Kalou, sa kaukauwa, sa gata cake mai nai selebati-rua, me suaka na i lati ni lomada kei na yaloda, nai lati ni sui kei na uto ni sui, ka sa vakalewa vinaka sara na vakanananu kei na i naki ni lomada.

¹³Sa sega na ka e vunitaki rawa mai Matana, sa luvaiwale na veika kecega ka tadola tu e Matana, o Koya e da na soli tukutuku vua

¹⁴Ni sa dua na noda Bete levu sara, o Koya sa lako siviti lomalagi, o Jisu na Luve ni Kalou, o Koya oqo me da taura matua kina na noda vakatutusa.

¹⁵Ni sa sega ni dua na noda Bete Levu sa sega ni rawa ni lomana na noda malumalu, ena veigauna kecega sa temaki me vakataki keda, ia sa sega ga ni valavala ca.

¹⁶Me da toro doudou mai kina i tikotiko ni loloma, me da taura kina na loloma ka kunea na veivuke ena gauna eda vinakata kina.