[28] Osea 14

¹O iko Isireli, mo lesu tale vei Jiova na nomu Kalou, ni o sa mai bale sobu ena nomu caka cala;

²Vakarautaka vinaka nomu vosa, ka lesu vei Jiova. Tukuna vua "Mo ni kauta tani noqu caka cala kece; mo ni ciqomi keimami ena loloma, ni keimami na cabora na vua ni tebe ni gusui keimami.

³Ena sega ni vakabulai keimami o Asiria, keimami na sega ni vodoka na ose, keimami na sega ni na tukuna tale kina cakacaka ni ligai keimami, 'Ni kemuni sa neimami Kalou.' Ni o Kemuni ga ena kune loloma tiko kina na luveni yali."

⁴"Au na vakabulai ira mai na nodra dau vuki tani, Au na lomani ira tikoga, na noqu cudruvi ira Au sa vakasuka tani.

⁵Au na vaka na tegu vei Isireli, ena tubu o koya me vaka na viavia, ka ti na wakana me vakataki Lepanoni;

⁶Ena duitete na tabana; me vaka na vuni olive na kena totoka, kei na kenai boi kamica ena vakataki Lepanoni.

⁷Era na lesu mai ka tiko sobu mera vakaruru ena yaloyalona; era na bula cake mai me vaka na sila, ka tubu cake me vaka na vaini. Na kenai boi yawa ena vaka na waini ni Lepanoni.

⁸"Ena tukuna o Ifereimi, 'Cava tale na kena yaga vei au na matakau?' Au sa rogoca ka'u sa vakadikeva tiko na noqu bula sa vaka mai na vuni damanu drokadroka vinaka; ka sa basika tu na vuana vei au."

⁹O cei sa vuku? Me macala vua na ka oqo. O cei sa qaseqase? Me kila sara. Ni sa dodonu vinaka na sala i Jiova; ka ra muria tiko na yalododonu, ia o ira na talaidredre era na bale kina.