[29] Joeli 1

¹Na vosa i Jiova sa lako mai vei Joeli na luve i Pecueli.

²Dou rogoca mada oi kemudou na qase, ka vakatudaliga mai na lewe ni vanua! Sa dua na ka vakaoqo sa bau yaco mada ena nomudou gauna, se na nodra gauna na nomudou qase e liu?

³Dou tukuna vei ira na luvemudou, o ira na luvemudou vei ira na luvedra, kei na luvedra vei ira nai taba tale e tarava mai.

⁴Na ka e vakavoca na vodre daukana, era na qai kania mai na i vavakoso vodre; ena ka e vakavoca na vavakoso vodre, ena qai kania mai na vodre dauqasi, kei na ka e vakavoca na vodre dauqasi, ena qai kania mai na vodre dau kana yavuta.

⁵Dou yadra mada, na daumateni, ka tagi; ka tagi yaso oi kemudou na daugunu waini, ena vuku ni waini vou, ni na tamusuki koso mai na gusumudou.

⁶Ni sa dua na matanitu sa lako cake mai kina Noqu vanua, e kaukauwa ka sa sega ni wili rawa; a batidra sa vaka na bati ni laione, ka sa gata na batina me vaka na laione dau vala.

⁷E cavuraka laivi na noqu vei loga vaini, ka vakarusa laivi noqu vuni lolo; e siviraka na kulina ka biuta tani na veitabana me madu mai.

⁸Mo tagi rarawa ka vakaisulu taga me vaka na goneyalewa vua na watina ena nona sa mai takali.

⁹Nai madrali laukana kei na madrali gunuvi sa mai yalani ena vale i Jiova; na bete ka ra dau veiqaravi tu vei Jiova era sa tabalaka na tagi vakararawa.

¹⁰Sa vakalalai na veiwere, era sa tagi na lewe ni vanua; ni sa vakacacani na sila, sega na waini vou, sa sega talega na waiwai.

¹¹Dou madua, na dauteitei, ka qoqolou na dausamaki vaini; ena vuku ni witi kei na parile; ni sa vakacacani na lewe ni teitei mai na were.

¹²Sa tekivu mira sobu na vaini; na vuni lolo sa malai; na vuni pomekareneti, na vuni balabala, kei na wi ” na kau ni vanua kece sa malai sobu; ka na yali talega na reki vei ira na luve ni tamata.

¹³Oi kemudou na bete, dou vakaisulu taga, ka tagi lako; vei kemudou na qarava nai cabocabo ni soro dou tagi qoqolou; dou lako mai, ka davo vata kei nai sulu taga, vei kemudou nai vota mate ni noqu Kalou, ni sa mai tarovi tu nai madrali laukana kei na madrali gunuvi mai na vale ni nomuni Kalou.

¹⁴Dou vakarautaka e dua na siga ni lolo, kaciva me dua nomuni lotu vata; vakasoqoni ira na qase kei ira na lewe ni vanua, kina vale i Jiova na nomudou Kalou, ka dou masuti Jiova.

¹⁵Ulei na siga o ya! Ni sa voleka na siga i Jiova; ena vakayacori kina na veivakarusai mai vei Koya sa kaukauwa sara.

¹⁶E sega ni na kautani mai matada na kakana, na reki kei na marau mai na vale ni noda Kalou?

¹⁷Sa vuca na sore ni sila ena loma ni qele, na vale ni maroroi yaya sa dukaveluvelu; sa kasura na vatavata ka sa raqosa ka luca na sila.

¹⁸Era dau kudru vakacava na manumanu! Era sa veiseseyaki na bulumakau, ni sa sega na veico bulabula; o ira talega na sipi sa mai yacovi ira talega na cudru oqo.

¹⁹Vei kemuni Jiova, au tagici kemuni, ni sa mai vakarusa na veico bulabula na kama kei na kena yameyame, e vakamatea vakadua na kena vei vunikau.

²⁰Era tagi talega vei kemuni na manumanu ni vanua ni sa maca kece na vei wai drodro, na veico bulabula ena taudaku ni koro era sa vakacacani talega ena buka waqa.