[29] Joeli 2

¹Na Siga I Jiova 1 Dou uvuca na davui e Saioni; ka kacivaka nai valu ena noqu ulunivanua tabu? Me ra rere na lewe ni vanua; ni sa lako mai na siga. Jiova, sa voleka dina mai:

²E dua na siga butobuto ka loaloa, a siga ni o loaloa ka vavaku, vaka na o ni mataka ni solega na veiulunivanua. Era na lako mai na tamata kaukauwa ka ra lewe levu, se bera vakadua ni ra laurai; ena sega ni dua me na tautauvata kei ira mai na gauna oqo kei na veisiga sa tu mai liu.

³Ena tiko mai matadra na bukawaqa; mai dakudra ena caudre tiko mai kina na yameyame, ena vaka na Were o Iteni nai rairai ni vanua e matadra, mai dakudra era na biuta mai e dua na dravuisiga; ena sega ni dua na ka me na dro bula mai matadra ni sa lako mai.

⁴Na kedra i rairai ni ra sa lako tiko mai e vaka e dua nai valu ose levu; e totolo sara nodra veitosoyaki.

⁵Vaka na rorogo ni qiqi ni valu ena dela ni ulunivanua ni ra sa toso ni veiladeyaki; sa vaka na rorogo ni yameyame ni sa yameca na vunisila, ka vaka na tamata i valu qaqa ni sa ukucavu tu me vala ena rara ni vala.

⁶Ena sega ni dua me tu rawa e matadra; ena vulaci na mata ena rere ni ra sa veisotavi kei na dua.

⁷Era cici me vaka na qaqa, era ladeva na bai vaka na sotia ni valu; era tayabe ni muri nai tuvatuva, e sega vei ira na veivakaisini.

⁸Era sega ni dau veibilibili; era vala ena vanua era kacivi kina mera vala kina. E dina ni so e laugasau e sega ga ni vakamalumalutaki ira.

⁹Era veiciciyaki ena veisaqata ni koro, era ciciva na bai; era ladeva na veivalevale, era curuma na katuba leka me vaka na daubutako.

¹⁰E yavala na vuravura vei ira, o lomalagi talega e sakure; na siga kei na vula e vuki me buto, ena yali nai serau ni kalokalo.

¹¹Ena solia nai vakaro vei ira, nona sotia o Jiova, ni sa kaukauwa sara nona mataivalu; ena qaqa o koya e muria na nona vosa. Ni sa vakadomobula ka vakarerevaki na siga i Jiova; o cei me na tudei rawa kina?

¹²"O koya oqo", sa tukuna o Jiova, "Dou lesu mai vei au ena yalomudou taucoko, dou lolo, dou tagi dula kei na nomudou tagi rarawa."

¹³Dou kavoro me kadresu na yalomudou, me kua ni dou dresuka nomudou i sulu; dou lesu vei Jiova nomudou Kalou, ni sa yalovinaka ka yalololoma, ni sa berabera ni cudru, ka sinal ena yalovinaka; ka rawa ni veisautaka na ka sa navuca oti tu me cakava.

¹⁴O cei e kila de na qai veisau me veivutuni, ka biuta me muri koya na veivakasaututaki O na i madrali lau kana kei na madrali gunuvi vei Jiova na nomu Kalou?

¹⁵Dou uvuca na davui mai Saioni, vakaraitaka yani me dua na lolo, me vakayacori e dua na lotu vei Jiova;

¹⁶Vakasoqoni ira vata na tamata, ka cakava na vei vakasavasavataki vei ira, kacivi ira vata na qase, mera kacivi vata talega mai na gone kei ira na gone se ra qarauni; vakatalai koya tani mai tuba na tagane se qai vakawati, kei na yalewa sa vakawati mai na rumu ni nona sasauni.

¹⁷O ira na bete ka ra dau vakaitavi ena cakacaka ni Kalou, me ra mai tagi vakamamasu ena tadrua ni loma ni vale kei nai cabocabo ni soro; ka mera tukuna mai, "Vakabulai ira nomuni tamata, i Jiova, ni kua ni soli ira na nomuni votavota me vakacacani, me lewai ira e dua tale na matanitu tani, mera qai vakadewataka vei ira na vo ni matanitu 'E vei na nodra Kalou?'"

¹⁸O Jiova ena vuvu ena vuku ni vanua, ka lomani ira nona tamata.

¹⁹Ena vosa mai o Jiova me sauma vei ira nona tamata, "Raica, au na solia vei kemudou na sila, na waini vou kei na waiwai, dou na vakamamautaki kina; au na sega ni na biuti kemudou mo dou vakaboicataki mai vei ira na matanitu tani.

²⁰"Ia au na kauta tani mai vei kemudou na mata sotia mai na vualiku, au na qai biuta kina e dua na vanua lala ka sega ni tawani, me na qarava yani na wasawasa ena Tokalau, me vakanadakua na wasawasa ena ra; ena basika mai na kena i boi vakasisila, kei na i boi ni ka mate mai vua, ena vuku ni nona vakayacora na i tovo lolovira."

²¹Dou kua ni rere, na vanua; dou reki ka marau, ni sa cakava na ka e veivakurabuitaki o Jiova!

²²Dou kua ni rere, na manumanu ni vanua; sa tubu tale mai na veico bulabula ka ra sa drokadroka vinaka tu; na vei vuni kau era sa solia tale mai na vanua totoka; na vuni vaini kei na vuni lolo e rau sa qai seraka vinaka mai.

²³Mo marau tiko, oi kemudou na gone ni Saioni; ka rekitaki Jiova na nomudou Kalou; ni na vakatauca vakaidina tale vei kemudou na uca taumada, ena vakatara o koya na uca me tauci kemudou sara ga mai O na uca taumada kei na uca taumuri, me vaka sara ga ena kena vula dina.

²⁴Ena sinai ka vutucoqa na vei vanua ena siga, ena sinai ka vuabale na tani ni waini vou kei na waiwai.

²⁵"Au na vakasuka lesu tale vei kemudou na vei ka era mai kanilaka na i soqosoqo vodre, o koya na noqu mataivalu au tala mai vei kemudou.

²⁶Dou na kana ka marau ka vo tale, dou na vakacaucautaki Jiova na nomudou Kalou, o koya sa cakava na ka e veivakurabuitaki vei kemudou; mera sega ni rogoca tiko na noqu tamata.

²⁷Mo dou kila au sa dautiko vata kei kemudou na Isireli: Oi au o Jiova na nomudou Kalou ka sega tale e dua. O ira noqu tamata era na sega ni na vakamaduataki tale.

²⁸"Ena qai yaco ena gauna mai muri au na sovaraka na yaloqu kivei ira na tamata kecega; o ira nomudou gone tagane kei ira nomudou gone yalewa era na parofisai, o ira nomudou qase era na tadrataka eso na tadra, o ira nomudou cauravou era na raica na raivotu.

²⁹O ira talega na dauveiqaravi tagane kei na yalewa au na sovaraka na yaloqu vei ira ena gauna o ya.

³⁰"Au na vakaraitaka eso na ka veivakurabuitaki e lomalagi kei vuravura: Na dra, na bukawaqa kei na duru kubou.

³¹Ena vakabutobutotaki na matanisiga, na vula me vaka na dra, o ya na veika ena yaco ni se bera na siga vakadomola ka rerevaki na siga i Jiova.

³²Ena qai yaco mai o koya ga e masuta na yaca i Jiova ena vakabulai. Mai na ulunivanua o Saioni kei Jerusalemi ena yaco kina na veisereki, me vaka sa tukuna o Jiova, sa kacivi ira oti tu eso vei kemudou ka sega tu ni kilai.