[23] Aisea 19

¹Na vosa ni parofisai bibi baleti Ijipita, ka raica, o Jiova sa vodo lako ena dua na o totolo ena qai lako mai ki Ijipita; na matakau ni Ijipita e ra na sautaninini e matana, ena waicala na yalona o Ijipita ena waicala e loma.

²"Au na cakava me rau veivala ga vaka i rau o Ijipita vata kei Ijipita; e ra na dui veivala ga vakaveitacini, e ra na dui veivala vakaveiwekani voleka, koro lelevu vata kei na koro lelevu, matanitu kei na matanitu.

³Ena sega ni rawata na lomana o Ijipita; au na vakarusa na nona lewe ni bose, e ra na laki taroga na kalou mate, kei ira na daulawaki, kei ira na daucaka mana lasu kei ira na daurairai.

⁴Au na soli Ijipita kina liga ni dua na Turaga dauveivakatotogani, ena dua na tui rerevaki ena liutaki ira," sa tukuna o Jiova ni lewe vuqa.

⁵Ena sega na wai mai wasawasa na uciwai ena mamaca ka sega ni yaga.

⁶Ena bona na uciwai, ena maca talega na veidrodro lalai ni wai, ena malai na gasau kei na kuta.

⁷Na veico mai na Uciwai, mai na bati ni uciwai kei na loga ni sila kecega mai na Uciwai, ena malai ka cagina tani yani.

⁸E ra na tagi talega na gonedau; e ra yalobibi ni ra viritaka tiko na nodra siwa, ena tarai ira tu, na veika rarawa ni ra viritaka na nodra lawa e dela ni wai.

⁹Era na madua o ira e ra cakacaka laino matailalai kei ira e ra dautali sulu vulavula;

¹⁰Na kena yavu ena ramusu kei ira kece e ra cakacaka baleta na kedra i sau ena rarawa kina na lomadra.

¹¹E dina sara e ra yalo lialia na ravouvou ni Soana; o ira na dauvakatulewa vuku nei Fero e ra solia tiko eso na i vakasala lialia. o na tukuna rawa vakacava vei Fero, "Au na luve ni vuku kei na luve ni tui ena veigauna makawa?"

¹²E vei o ira oqo? E vei o ira na nomu tamata vuku? Me ra tukuna rawa mai oqo, me rawa ni ra kila na cava sa nakita tiko o Jiova ni lewe vuqa me vakayacora vei Ijipita.

¹³O ira na ravouvou ni Soana sa ra lialia mai; o ira na ravouvou ni Nofi e ra sa vakaisini; ka ra sa vakacalai Ijipita na duru ni veimataqali.

¹⁴Sa solia o Jiova ki lomadra na yalo vakatani; ka ra vakaleqa kecega na cakacaka mai Ijipita, me vaka na nona yavavala ni dua e lualua ena levu ni mateni.

¹⁵Ena sega ni dua na cakacaka e rawa ni caka mai Ijipita, vei koya na uluna se vei koya na buina tabana se na tolona.

¹⁶Ena siga o ya ena domobula o Ijipita me vaka na yalewa ni sa raica na yavala ni liga i Jiova ni lewe vuqa.

¹⁷Na vanua vaka Juta ena vaka vu rere tiko vei Ijipita; o ira kece e ra na cavuta na vosa baleti Juta e ra na rere vakataki ira me vaka na Nona lewa o Jiova ni lewe vuqa sa vakataudeitaki oti tu.

¹⁸Ena siga o ya ena lima na koro lelevu ena vanua o Ijipita, ena vosataka na vosa vaka Kenani ka bubului vei Jiova ni lewe vuqa; e dua e na vakatokai na Koro Levu ni Veivakarusai.

¹⁹Ena siga o ya ena dua na i cabocabo ni soro vei Jiova ena loma ni vanua o Ijipita, ka na dua na duru me kena i yalayala ni vanua.

²⁰Ena tu e kea me i vakatakilakila ka vakadinadinataka tiko vei ira na kai Ijipita ni oqo o Jiova ni lewe vuqa; e ra na tagi vei Jiova ena vuku ni veika rarawa, ena qai tala o Koya vei ira e dua nai Vakabula sa Kaukauwa sara, e na qai sereki ira o Koya.

²¹Ena qai kilai mai Ijipita o Jiova e ra na qai kila dina sara ena siga o ya e ra na qai vakacaboi soro kina kei na i madrali; io e ra na ia na bubului vei Jiova ka vakayacora sara.

²²Ena qai taralaki Ijipita o Jiova, e na samuti ira ka vakabulai ira tale; e ra na qai lesu mai vei Jiova, e ra na vakamasuti Koya ka na vakabulai ira o Koya.

²³Ena siga o ya ena dua na gaunisala vou mai Ijipita ki Asiria, o ira na kai Asiria e ra na lako mai Ijipita o ira na kai Ijipita ki Asiria, e ra na veiqaravi vata o ira na Asiria kei Ijipita.

²⁴Ena siga o ya o Isireli ena kena i katolu vei Ijipita kei Asiria”ena vuni sautu tiko ena nodrau dui bula,

²⁵Sa vakasaututaka o Jiova ni lewe vuqa ka tukuna, "Ena sautu o Ijipita na noqu tamata, kei Asiria na cakacaka ni Ligaqu kei Isireli na noqu i votavota."