[23] Aisea 63

¹O cei oqo sa lako mai Itomi, ka daramaka tu nai sulu kesavi ni Posira, o Koya qo sa vakaiukuuku na Nonai sulu, ka lako vata tiko mai kei na Nona kaukauwa kece?”"Oi Au ka dau vosa vakadodonu, sa kaukauwa na noqu veivakabulai."

²Cava sa damudamu kina na Nomu i sulu, sa vaka na kote sa butubutuki ena I keli ni waini?

³"Au a butulaka sobu nai keliwaini vakai Au ga, e sega ni dua vei ira na lewe ni vanua me tiko kei Au. Ni'u a buturaka ena Noqu cudru, ka butuka ena Noqu cudru katakata; na kena dra e sikava mai na noqu i sulu, ka tauvi dra na Noqu kote kece.

⁴Na Yaloqu sa kila tiko na siga me'u na veisausaumi kina, ka sa qai yaco mai oqo na yabaki nei koya Noqui vakabula.

⁵Au rai yani, ia ka sega sara ga ni bau tu e dua me veivuke, Au kurabui ni sega ni dua me laurai; o koya oqo na ligaqu ga sa qai ia na veivakabulai vei Au; ka sa maroroi Au na Noqu cudru katakata.

⁶Au a butulaki ira sobu na tamata ena Noqu cudru, ka kolotaka sobu i ra na nodra kaukauwa."

⁷Au na tukuna na yalololoma i Jiova kei na vakavinavinaka i Jiova, me vaka na ka levu sa vakayacora vei keda, kei na nona loloma levu sa vakayacora ena mataqali i Isireli, me vaka na Nona lomani ira, kei na Nona loloma e sega yalani.

⁸Ka sa vosa dina, "O ira oqo na Noqu tamata, na luvequ ka sega vei ira na lasu." Ka sa yaco o Koya me nodra i Vakabula.

⁹Ena nodra veigauna rarawa, sa rarawa vata kei ira o Koya, na Agilosi ka dau tu e Matana sa qai vakabulai ira; ena Nona loloma kei na Nona lomalomani ira sa vakabulai ira kina; ka soli bula ena vukudra ka keveti ira ena veigauna sa oti yani.

¹⁰Ia o ira era talaidredre ga, ka vakararawataka na Nona Yalo Tabu; ka sa vuki tale kina o Koya me kedra meca, ka veivaluti kei ira.

¹¹Era sa qai nanuma na veigauna sa oti, ni tukuna o Mosese kei ira na nona tamata; "E vei o Koya ka kauti ira cake mai ena loma ni wasawasa kei nai vakatawa ni Nona sipi? E vei o Koya ka vakatikora ki yalodra na Nona Yalo Tabu,

¹²Ka liutaki ira ena veituberi ni ligai matau i Mosese ena ligana vakaiukuuku, ka wasea na wai e matadra, me rawa ni vakatetea kina na kaukauwa e tu ena Yacana e sega ni yalani rawa,

¹³Ka tuberi ira ena vanua titobu, me vaka na ose ena vanua dravuisiga, me sega ni tarabe?"

¹⁴Me vaka na manumanu kila ni lako sobu kina bula, sa dau vakakina na Yaloi Jiova ni sa dauvakacegui ira, sa dau tuberi ira vinaka Nona tamata o Jiova, me vakalagilagi kina na Yacamuni.

¹⁵Mo ni rai sobu mai lomalagi, ka raica mai ena Nomuni tikotiko tabu vakaiukuuku, sa E vei na Nomu lomakatakata kei na Nomu kaukauwa, na gagadre ni yalomuni kei na Nomuni loloma mai vei au? A sa sega ni vakavotui mai?

¹⁶Sai Kemuni na Tamai keimami, e dina ni sega ni kilai keimami o Eparama, ka sega ni bau kauwaitaki keimami o Isireli, Oi Kemuni Jiova, na Tamai keimami, Oi kemuni na neimami i vakabula sa Sega ni mudu na yacamuni.

¹⁷I Jiova cava o ni vakavuna kina me keimami butu sevata na Nomuni sala, ka vakayalokaukauwataki keimami me keimami sega ni rere kina ni torovi Kemuni? Mo ni lesu mai ena vukudra na nomuni tamata, na mataqali ni Nomuni votavota.

¹⁸Era na taukena o ira na Nomu tamata sa savasava ia ena vakalailai ga, na keimami meca era butuka sobu Nomuni vale tabu.

¹⁹Keimami sa qai vaka na tamata o ni sega tu ni lewai ira, mai na gauna makawa, o ira era sega ni vakayacani ena yacamuni.