[23] Aisea 64

¹Mo ni sea mada na lomalagi! Ka lako sobu mai! Me ra yavala e matamuni na veiulunivanua”

²Me vaka na kama ni kau madu, sa bue kina na wai katakata” Me kilai kina na yacamuni vei ira na Nomuni meca, era na domobula na veimatanitu e matamuni!

³O ni cakava e so na ka e sega ni rawa ni vakamacalataki, keimami a sega ni raica, ni o Ni lako sobu mai, e yavavala na veiulunivanua e matamuni.

⁴E nai vakatekivu kei vuravura, a sega ni rogoci ena daliga, se me laurai e mata e dua na Kalou me tautauvata kei Kemuni. Ni o ni dau veivuke ena gauna o Ni gadrevi kina.

⁵O ni dau sotava o koya e reki tiko ka kitaka na ka dodonu, ka dau vakanananu ki na nomuni i valavala. O ni a cudruvi keimami ni keimami a valavala ca ” keimami sa sega ni cakava tale, ka keimami gadreva na veivakabulai.

⁶Ia keimami sa vaka na ka sa sega ni savasava Oi keimami kecega ka sa vaka nai sulu madra na neimami valavala dodonu, keimami malai vaka na drau ni kau, kei na neimami caka cala sa vaka na cagi, na kena vukaci tani.

⁷Sa sega tale e dua me masuta na yacamuni, ka vakauqeti koya ga me tatakube vei keimuni; Ni o ni sa vunia na matamuni vei keimami, ka vakaoti keimami vakadua ena vuku ni neimami caka cala.

⁸Ia, oqo Jiova, o ni sa Tamai keimami; Oi keimami na tete, Oi kemuni na dautuli kuro; keimami na mawe ni ligamuni.

⁹Mo ni kua ni cudru vakalevu, i Jiova, mo ni kua ni nanuma na neimami caka cala; mo ni raica ka kila mada”ni keimami sa Nomuni tamata Oi keimami kecega!

¹⁰A nomuni koro lelevu sa veitalasiga, o Saioni sa veitalasiga, o Jerusalemi sa lala tu.

¹¹Na neimami vale tabu rairai totoka, na vanua era dau laveti Kemuni kina na neimami qase, sa vakamai ena buka waqa, kei na neimami yaya vakamareqeti sa vakarusai kece.

¹²O ni na vosoti keimami Jiova ena vuku ni ka oqo? O ni na tarovi kemuni mai kina, se vakararawataki keimami vakalevu sara?