[59] Jemesa 3

¹Oi kemudou na wekaqu, me kakua ni lewe levu vei kemudou me dau vakavuvuli, ni da sa kila sa bibi cake kina na keda i totogi.

²Ni da sa cala kecega e na ka e vuqa. Kevaka sa sega ni cala e dua e na vosa, sa tamata uasivi sara o koya, a sa rawarawa vua me tarova na yagona taucoko.

³Raica kevaka e da sa vakacuruma na kedra i tarovi na ose ki na gusudra, me ra talairawarawa kina vei keda, e da sa qai saumaka na yagodra taucoko.

⁴Raica talega na waqa, ni sa ka levu vakaidina, a sa savu yani e na cagi kaukauwa, ia sa saumaki ga e na i uli lailai sara, ki na yasana sa vinakata o koya sa taura tiko na i uli.

⁵Sa vakatalega kina na yameda ni sa tikida lailai ga, a sa vosa vakaviavialevu. Raica sa vakacaudreva na buka waqa levu e dua ga na tiki ni buka lailai!

⁶Sa bukawaqa na yameda, sa vuravura ni ca. Na yameda sa tiki ni yagoda, sa rawa ni vakacacana na yagoda taucoko, sa rawa ni vakama na noda i tosotoso; sa veivakamai vaka oqori o Eli.

⁷Na veimanumanu yava i va kecega kei na manumanu vuka, manumanu sa qasi voli kei na ika ni wasa liwa, a sa vakamanoataki ira tu ga o ira na tamata.

⁸Ia e sega ni dua na tamata sa vakamanoataka rawa na yamena. Ni sa sinai e na ca ka sinai talega e na ka e dauveivakamatei.

⁹E da vakavinavinakataka kina na noda Turaga ka Tamada, ka da rukaki ira talega kina na tamata, e ra sa buli me tautauvata kei na Kalou.

¹⁰E dua ga na gusu sa lako tiko mai kina na vosa vinaka kei na vosa ca. Oi kemudou na wekaqu sa sega ni vinaka na veika vaka oqo.

¹¹E dua beka na mata ni wai me drodro mai kina na wai vinaka kei na wai ca?

¹²Oi kemudou na wekaqu, e dua beka na vuni lolo sa vuataka rawa na olive? Se dua li na vaini, na lolo? Sa vaka kina e dua na mata ni wai e tovure mai kina na waitui kei na wai dranu talega, e na sega ni rawa ni vaka kina.

¹³O cei vei kemudou sa vuku ka yalomatua? Me vakatakila e na i valavala vinaka na nona cakacaka e na vuku sa yalomalua.

¹⁴Ia kevaka sa tu e na lomamudou na dauvuvu kei na dauveiba, dou kakua ni vakalevulevui kemudou, se cakitaka na i vakavuvuli dina.

¹⁵A vuku vaka o ya sa sega ni lako mai cake, sa vakavuravura ga, sa vakayalomakawa ka vakatevoro.

¹⁶Kevaka sa tu na vuvu kei na veiba, sa tu kina na veisei kei na cakacaka kecega e ca.

¹⁷Ia na vuku mai cake sa savasava sara, e muri sa dau ia na veivakacegui ka yalomalua, sa vakamasuti rawarawa, sa sinai e na loloma kei na vua vinaka, sa sega ni digitaki ira vakatani na tamata, se dauveivakaisini.

¹⁸Na vua ni valavala dodonu sa kaburaki e na vakacegu vei ira na dauveivakacegui.