[59] Jemesa 4

¹Sa vu mai vei na veiba kei na veivala vei kemudou? Sa sega li ni vuna na nomudou gagadre ca, sa veivala e na veitiki ni yagomudou?

²Dou sa daugagano ka sega ni rawata. Dou sa daulaba ka daukocokoco ka sega ni rawa ni dou taura. Dou veivala ka veiraravui. Sa sega ni dua na ka mo dou rawata ni sega ni dou duavata kina.

³Dou kerekere ka sega ni soli vei kemudou ni dou sa kerea na ka ca, mo dou la'ki vakamarautaka kina na nomudou gagadre ca.

⁴Oi kemudou na dauyalewa kei na dautagane, dou sa sega beka ni kila ni sa cata na Kalou na veivinakati kei vuravura? Sa veimecaki kei na Kalou o koya sa via veiwekani kei vuravura.

⁵Dou sa vakasama beka ni sa tukuna na i Vola Tabu, sa gadreva vakalevu sara na yalo sa tiko e lomada?

⁶Ia sa solia vakalevu o Koya na loloma. "O Koya sa tukuna kina, o ira sa viavialevu sa vorati ira na Kalou, sa solia na loloma vei ira era sa yalomalumalumu."

⁷O koya oqo mo dou qai vakamalumalumutaki kemudou vua na Kalou. Vorata na tevoro, e na dro tani kina vei kemudou o koya.

⁸Toro voleka yani Vua na Kalou e na qai toro voleka mai vei kemudou o koya. Vakasavasavataka na ligamudou, oi kemudou na i valavala ca; ka vakasavasavataka na yalomudou oi kemudou sa daulomalomarua.

⁹Dou tagi qoqolou e na rarawa! Me vuki na nomudou dredre me rarawa, kei na nomudou marau me mata veveku.

¹⁰Dou vakamalumalumutaki kemudou e na mata ni Turaga, ka na laveti kemudou cake o Koya.

¹¹Kakua ni dou veikaseti na veiwekani. O koya sa kaseta na wekana, ka via vakalewai koya, sa kaseta talega na i Vunau ka vakalewa talega na i Vunau: ia kevaka o sa via lewa na i Vunau o sa qai sega ni muria na i Vunau o sa via lewa ga.

¹²E dua ga e lewa na i Vunau, o Koya sa rawata me veivakabulai, kei na veivakarusai: O cei o iko mo lewa na tani?

¹³Dou lako mai oi kemudou sa dautukuna, e daidai se ni mataka e da na lako ki na koro o ya, ka tiko kina ka yabaki dua, ka veivoli kina ka rawata na i yau.

¹⁴Dou sa sega ni kila na ka e na yaco ni mataka. Na cava na nomudou bula? Na kabukabu walega Oi kemudou? Sa rairai ka dede vakalailai ga, sa qai seavu yani.

¹⁵O koya oqo mo dou tukuna kina, kevaka sa vinaka Vua na Turaga, e da na bula, ka kitaka na ka oqo se na ka o ya.

¹⁶Ia dou sa qai marau ka dokadokai kemudou. E ca na marau kecega sa vaka o ya.

¹⁷O koya sa ca kina vua sa kila me caka vinaka, ka sega ni kitaka.