[59] Jemesa 5

¹Dou lako mai, oi kemudou na vutuniyau, dou tagi ka qoqolou e na vuku ni nomudou veika rarawa e na tarai kemudou mai.

²Na nomudou i yau sa ca, kei na nomudou i sulu talega sa kania na sarasara.

³Na nomudou koula kei na siliva sa veveka; e na tukuni kemudou na kena veveka, ka na kania na lewemudou me vaka na bukawaqa. Dou sa kumuna vata na i yau ena gauna e muri sara.

⁴E ra na tagica na kedra i voli na tamata daucakacaka, e ra sa tamusuka na nomudou veiwere, o koya dou sa bureitaka, ka sa rogoca na Turaga ni lewe vuqa na nodra tagi ni ra sa tamusuka.

⁵Dou marau tikoga e vuravura, dou daukana tiko; dou dauvakania na lomamudou, e na siga sa vakayacori kina na veivakamatei.

⁶Dou lewai Koya na yalododonu, dou a vakamatea ia sa sega ni vorati kemudou o Koya.

⁷O koya oqo, na veiwekani, mo dou qai vosota me yaco mada na Nona lako mai na Turaga. Raica na i vakatawa ni teitei sa waraka na vua ni qele e talei, a sa wawa vakabalavu, me rawata mada na uca sa liu, kei na uca sa muri.

⁸Dou wawa talega oi kemudou. Vakataudeitaka na yalomudou, ni sa voleka mai na siga ni Turaga.

⁹Dou kakua ni dou veikudruvi, na veiwekani, de dou cudruvi. Raica sa tu e na mata ni katuba na Turaga ni Lewa!

¹⁰Oi kemudou na wekaqu, vakadamurimuri ira na parofita, e na nodra vosota na ka rarawa, kei na nodra dauvosota e ra a vosa e na yaca ni Turaga.

¹¹Raica e da a dauvakatokai ira era sa dauvosota me ra kalouvinaka. Dou sa rogoca na dauvosota nei Jope, ka raica talega ni sa tinia vakaevei na Turaga; ni sa yalovinaka sara na Turaga ka dauloloma.

¹²Ia na ka levu sara oqo, oi kemudou na wekaqu, mo dou kakua sara ni bubului, kakua ki lomalagi, se ki vuravura, se kina dua tale na ka. Ia me "Io" ga na "Io", Ka me "Sega" ga na "Sega" de dou cudruvi kina.

¹³E dua li vei kemudou sa vakararawataki? Me masu tiko. E dua li sa marau me sere?

¹⁴E dua li vei kemudou sa tauvimate? Me kacivi mai o ira na qase ni Soqosoqo Lotu me ra qai masulaki koya, ka me ra lumuti koya e na waiwai e na yaca ni Turaga.

¹⁵Na masu ni vakabauta e na vakabulai koya sa tauvimate, e na vakaturi koya cake na Turaga. Kevaka e i valavala ca, e na vosoti o koya.

¹⁶Dou dui vakatusa na nomudou i valavala ca, ka veimasulaki, mo dou vakabulai kina. Sa yaga vakalevu na nona masu vagumatua na tamata yalododonu.

¹⁷A tamata sa vakataki keda ga o Ilaijia, a sa masu vagumatua sara me kakua ni tau na uca; A sa sega kina ni tau mai na uca e na vanua, me oti mada e yabaki tolu ka vulaono.

¹⁸Sa qai masu tale, ka sa tadola mai na lomalagi me tau na uca, ka sa tubu mai na vua vinaka e na qele.

¹⁹Oi kemudou na veiwekani, kevaka e dua vei kemudou sa butusevata na i vakavuvuli dina, dou vakalesui koya tale mai.

²⁰Me kila o koya oqo, o koya sa vakalesui koya tale na tamata caka cala mai na nona i valavala e cala kina sa vakabula na yalona mai na mate, ka ubia talega na levu ni valavala ca.