[24] Jeremaia 29

¹Ia oqo na vosa ni vola sa vakauta mai Jerusalemi o Jeremaia na parofita vei ira na kena vo ni qase era sa kau tani vakabobula, vei ira talega na bete, kei na parofita, kei na tamata kece sa kauta vakabobula mai Jerusalemi ki Papiloni o Nepukanesa.

²(ni ra sa lako tani oti mai Jerusalemi o Jekonaia na tui, kei koya na ranadi, kei ira na euniki se matanivanua, kei na turaga ni Juta kei Jerusalemi, kei ira na matai tani.)

³Ka sa kauta o Elasa na luve i Safani, kei Kimaraia na luve i Ilikaia, (Oi rau ka tala o Setekaia na tui Juta ki Papiloni vei Nepukanesa na tui Papiloni,) ka sa vakane,

⁴Sa tukuna vakaoqo o Jiova ni lewe vuqa, na Kalou ni Isireli vei ira kecega era vakabobulataki, o ira Ka'u a lewa me ra kau tani mai Jerusalemi ki Papiloni:

⁵Dou tara vale, ka tiko kina; dou tea na were, ka kania na vanua.

⁶Dou vakawati, mo dou vakatubura na gonetagane kei na goneyalewa; ka kauta na yalewa eso me watidra na luvemudou tagane, ia na luvemudou yalewa dou musuka vei ira na tagane me watidra, me ra vakasucuma na luvedra tagane kei na luvedra yalewa; mo dou lewe vuqa mai kea”ka sega ni lewe lailai.

⁷Ia dou gumatua me sautu na koro Au a lewa mo dou kau vakabobula kina, ka masulaka vei Jiova: ni sa sautu o ya, dou na sautu talega.

⁸Ni sa tukuna vakaoqo o Jiova ni lewe vuqa, na Kalou ni Isireli; Me ra kakua ni vakacalai kemudou o ira na nomudou parofita kei na nomudou rairai, era tiko e na kemudou maliwa, dou kakua talega ni rogoca na nomudou tadra dou sa cakava me tadrataki.

⁹Ni sa ka lasu na ka era sa parofisaitaka vei kemudou e na Yacaqu: Au sa sega ni talai ira, sa tukuna o Jiova.

¹⁰Ni sa tukuna o Jiova, Me oti mada e vitusagavulu na yabaki mai Papiloni Au na qai talevi kemudou, ka vakayacora vei kemudou na Noqu vosa vinaka, Ni'u sa vakalesui kemudou tale mai ki na yasana oqo.

¹¹Ni'u sa kila oi Au na lewa ni lomaqu e na vukumudou, sa tukuna o Jiova, na lewa mo dou vinaka, ka sega ni ca, ka Me'u solia vei kemudou nai nuinui vinaka ni gauna emuri.

¹²Dou na qai tagi kivei Au, ka la'ki masu vei Au, ia Au na rogoci kemudou.

¹³Ia dou na golevi Au, ka kunei au, ni dou sa golevi Au sara mai na vu ni lomamudou.

¹⁴dou na qai kunei Au, sa tukuna o Jiova: ia Au na vakalesui kemudou mai na nomudou veivakabobulataki, ka vakasoqoni kemudou mai na veivanua kecega, kei na veiyasana kecega Au sa vakasavi kemudou kina, sa tukuna o Jiova; ia Au na kauti kemudou tale mai ki na yasana Au a lewa mo dou kau tani mai kina.

¹⁵Ni dou sa tukuna, "Sa vakatubura vei keimami o Jiova eso na parofita mai Papiloni"”

¹⁶O koya oqo sa tukuna o Jiova e na vuku ni tui sa tiko e nai tikotiko i Tevita, ena vukudra kece talega na tamata era tiko e na koro oqo, kei na wekamudou era sa sega ni lako tani vata kei kemudou”

¹⁷Sa tukuna o Jiova ni lewe vuqa; Raica, Au na vakayacora vei ira nai seleiwau, kei na viakana, kei na mate dauveiveitauvi, ka cakavi ira me ra vaka na lolo ca sa sega ni laukana rawa, ni sa ca.

¹⁸Ia Au na vakacacani ira e nai seleiwau, kei na viakana, kei na mate dauveiveitauvi, ka soli ira me ra kau tani ki na veimatanitu e vuravura”me ra vosavosacati, ka vakurabuitaki, ka vakasiusiutaki, ka vakalialia, e na veivanua kecega Au sa dui vakasavi ira kina,

¹⁹ka ni ra sa sega ni rogoca na Noqu vosa, sa tukuna o Jiova, o koya Au sa talai ira na Noqui talatala na parofita me ra tukuna, Au sa sou e na mataka ka tala, ia dou a sega ni vakarogoca, sa tukuna o Jiova.

²⁰Ia dou rogoca mada na vosa i Jiova, oi kemudou kece sa vakabobulataki, ka'u sa vakatala tani mai Jerusalemi ki Papiloni.

²¹Sa tukuna vakaoqo o Jiova ni lewe vuqa, na Kalou ni Isireli, e na vuku i Eapi na luve i Kolaia, kei Setekaia na luve i Meesea, e rau sa parofisaitaka na ka lasu vei kemudou e na Yacaqu: Raica, au na soli rau ki na liga i Nepukanesa na tui Papiloni; ena vakamatei rau o koya e na matamudou.

²²Ia o ira kece na Juta era vakabobulataki mai Papiloni era na vatonaki rau, ka vaka, "Me vakayacori iko o Jiova mo tautauvata kei Setekaia ka tautauvata kei Eapi, sa vakamai rau o tui Papiloni e na bukawaqa";

²³ni rau sa cakava na ka ca sara e Isireli, ka sa dauyalewa kei na wati ni kai nodrau, ka sa cavuta talega na vosa lasu ga e na Yacaqu, ka'u a sega ni vakarota vei rau, ia oi au Au a sa kila, ka tukuna, sa tukuna o Jiova.

²⁴Ia mo tukuna talega vei Semaia na Niilamaiti, ka vaka,

²⁵Sa tukuna vakaoqo o Jiova ni lewe vuqa, na Kalou ni Isireli, ka vaka, o iko, ni o sa vakauta e na yacamu ga nai vola vei ira kece na tamata mai Jerusalemi, vei Sefanaia talega na luve i Meesea na bete, kei ira kecega na bete, ka tukuna,

²⁶"Sa lesi iko o Jiova mo bete mei sosomi i Jioiata na bete, mo dou ovisa ni vale i Jiova, e na vuku ni tamata yadua sa curumi, ka viavia parofita, mo vakacurumi koya ki na vale ni veivesu, kei nai vesu kau.

²⁷Ia na cava o sa sega kina ni vunauci Jeremaia na kai Anacoci, sa viavia parofita vei kemudou?

²⁸Ni sa ka ga o ya sa talai kina o koya vei keimami ki Papiloni, ka tukuna, 'Sa na dede na tiko vakabobula oqo: Dou tara vale, ka tiko kina, ka tea na were, ka kania na vuana.'"

²⁹A sa wilika o Sefanaia na bete nai vola oqo kivei Jeremaia na parofita.

³⁰Sa qai yaco na vosa i Jiova vei Jeremaia, ka vaka:

³¹Mo talaki vei ira kece sa vakabobulataki, ka vaka, Sa tukuna vakaoqo o Jiova e na vuku i Semaia na Niilamaiti: Ni sa ia na parofisai vei kemudou o Semaia, ia oi Au ka'u sa sega ni talai koya, ka sa vuna ni dou vakaraviti kemudou ki na ka lasu ga”

³²O koya oqo sa tukuna kina vakaoqo o Jiova; Raica, Au na cudruvi Semaia na Niilamaiti, kei ira na nona kawa: ena sega e dua na tagane mai vua me tiko kei ira na tamata oqo; ena sega talega ni raica na ka vinaka Au na cakava vei ira na Noqu tamata, sa tukuna o Jiova; ni sa vakatavulica na vuki tani mai vei Jiova.