[24] Jeremaia 30

¹Sa dua na vosa sa yaco vei Jeremaia mai vei Jiova, ka vaka,

²"Sa tukuna vakaoqo o Jiova na nodra Kalou na Isireli, 'Mo vola e na dua nai vola me tu vei iko na vosa kecega Ka'u sa tukuna oti vei iko.

³Ni sa tukuna o Jiova, 'Raica, ena yaco mai na gauna,' ka 'Au na vakalesui ira tale mai kina na Noqu tamata na Isireli kei na Juta era a vakabobulataki,' sa tukuna o Jiova: 'Ia Au na vakalesui ira tale mai ki na vanua Ka'u a solia ki na nodra qase, ka ra na taukena.'"

⁴Ia oqo na vosa sa tukuna o Jiova e na vukudra na Isireli kei na Juta.

⁵"Ni sa tukuna vakaoqo o Jiova; 'Na domo ni sautaninini keitou sa rogoca, sa yaco na rere, ka sega na vakacegu.

⁶Dou veitarogi mada, ka vakaraica se dua na tagane sa taratara? Na cava Au sa raica kina na tamata yadua ni sa dui toka na ligana e tolona, me vaka na yalewa sa taratara, ka sa matacea mai na matadra kecega?

⁷Ulei! sa qai dua tani na siga o ya, sa sega e dua me vakakina: io, sa kena gauna ni rarawa i Jekope: ia ena vakabulai o koya mai na ka oqo.

⁸'Ni sa tukuna o Jiova ni lewe vuqa, Ena yaco e na siga o ya,' Au na musuka tani na nonai vua mai na domomu, ia 'Au na drutilaka tale ga na kemu i vesu ka ra na sega ni na vakasaurarataki koya tiko o ira na tani

⁹Ia era na qaravi Jiova na nodra Kalou, kei Tevita na nodra tui, o koya kau na vakatubura vei ira.

¹⁰'Ia o iko Jekope na Noqu tamata mo kakua ni rere,' sa tukuna o Jiova, 'Io kakua ni o taqaya, Isireli, ni sai Au, raica, ena vakabulai iko mai na vanua vakayawa, kei na nomu kawa mai na vanua era sa bobula kina; ia ena lesu mai o Jekope, me tiko vinaka ka vakacegu, ka na sega e dua me vakarerei koya.

¹¹Ni'u sa tiko kei iko,' sa tukuna o Jiova, 'Me'u vakabulai iko: Ni'u na vakaotia sara na veimatanitu kecega ka'u sa vakasavi iko kina, kau na sega ni vakaotia sara: ka'u na vakanakuitataki iko vakavinaka ga, ni o na sega ni dro bula sara.'

¹²"Ni sa tukuna vakaoqo o Jiova, 'Sa sega ni bula rawa na nomu ramusu, sa ka rarawa sara na nomu mavoa.

¹³Sa sega e dua me lewai iko vinaka, mo viviraki: sa sega ni kemu i botani mo bula kina.

¹⁴O ira kece era lomani iko era sa guilecavi iko; era sa sega ni mai raici iko; ni'u sa vuetaki iko ena kuita ni vakatawa-loloma, me vaka Au sa nomu meca ena vuku ni kena levu ni nomu caka cala: ni sa vuqa tiko na nomu i valavala ca.

¹⁵Na cava o sa tagicaka kina na nomu mavoa? Sa sega ni malumu rawa na nomu rarawa ena vuku ni kena levu ni nomu caka cala: ni sa vuqa tiko na nomui valavala ca.

¹⁶'Ia o ira era tilomi iko era na tilomi; o ira talega na nomu meca era dui vakabobulataki kecega; o ira sa vakacacani iko era na vakacacani, o ira kece talega sa totaki iko, Au na soli ira mera tokitaki.

¹⁷Ni'u na vakamavotaka na nomu mavoa ia Au na vakabulai iko,' sa tukuna o Jiova; 'Io, ka ni ra cavuti iko mo luveniyali, "Oqo o Saioni ka sa sega e dua me lakova."'

¹⁸"Sa tukuna vakaoqo o Jiova; 'Raica Au na vakalesuya tale na nodra valelaca na Jekope ka ra vakabobulataki; ia Au na yalololoma ki na nodra i tikotiko; ena tara na koro ena kena yavu dina; ia na vale vakaturaga ena toka tale me vaka na kenai valavala.

¹⁹Ena rogo talega yani maikina na vakavinavinaka kei na domodra era marau: ia Au na vakalewevuqataki ira, ka ra na sega ni lewe lailai; Au na vakalevulevui ira, ka ra na sega ni tamata wale.

²⁰Na luvedra talega ena vaka e liu: kei na nodra i soqosoqo e na vakataudeitaki e Mataqu;' ia ka'u na cudruvi ira kecega era vakasaurarataki ira.

²¹A nodra turaga talega ena tubu mai vei ira: kei koya na nodra tui ena lako mai na kedra maliwa: ka'u na vakauqeti koya me toro voleka mai, ia ena toro voleka mai vei Au: ia o cei o koya oqo sa vinakata na lomana me torovi Au mai?' Sa tukuna o Jiova.

²²"Ia dou na yaco mo dou Noqu tamata, ia oi Au, Au na yaco me'u nomudou Kalou.'"

²³Raica, na cagilaba i Jiova sa lako yani ka sa cudrucudru, na cagilaba ni veivakarusai: ena tau tiko ki na uludra na tamata ca.

²⁴Ena sega ni malumu na cudru katakata i Jiova, ena cakava mada ga, ka vakayacora dina na ka sa nakita o Koya: ena kena gauna mai muri, dou na qai vakananuma kina.