[24] Jeremaia 31

¹"E na gauna o ya," sa tukuna talega o Jiova. "Au na qai nodra Kalou na veimataqali kecega ni Isireli, ia era na qai noqu tamata."

²Sa tukuna talega o Jiova, "Era sa kune loloma mai na veikau o ira na tamata era sa vo bula mai nai seleiwau, ni'u a la'ki vakacegui ira na Isireli."

³Sa rairai e liu vei au o Jiova ka tukuna; "Io, Au sa lomani iko e na loloma sa sega ni mudu: O koya oqo Au sa vakadedetaka kina na loloma vei iko.

⁴Au na baci tarai iko tale, ia o na qai tara, o iko na goneyalewa ni Isireli; o na baci vakaiukuukutaki tale e na nomu tibereli, ia o na bau yani e na nodra meke era sa ia na marau.

⁵O na baci tea tale na veivaini e na ulu-nivanua mai Samaria: era na tea o ira na dauteitei, ka kana vakailoa kina.

⁶Ni na yaco e dua na siga, era na kacivaka kina nai vakatawa mai na ulunivanua o Ifereimi, 'Dou cavu tu ka me da lako cake ki Saioni vei Jiova na noda Kalou.'"

⁷Ni sa tukuna vakaoqo o Jiova; "Dou meke e na marau e na vuku i Jekope, ka kaikaila e na vuku i koya sa liu e na veimatanitu: dou vakarogoya, dou vakavinavinaka, ka tukuna, 'Mo ni vakabulai ira, Jiova, na nomuni tamata, na Isireli sa vo!'

⁸Raica, Au na kauti ira mai na vanua mai na vualiku, ka vakasoqoni ira mai nai yalayala kei vuravura, o ira vata kei na mataboko kei na lokiloki, kei na yalewa sa bukete kei koya sa taratara: e dua nai vavakoSolevu ena lesu mai ki ke.

⁹Era na lako mai ka tagi tu, ia Au na tuberi ira mai ka ni ra vakamamasu tu: Au na vakalakovi ira mai e na bati ni wai drodro e na sala dodonu, era na sega ni tarabe kina: ni keirau sa veitamani kei Isireli, ia o Ifereimi, sa Noqu ulumatua.

¹⁰"Dou rogoca na vosa i Jiova, na veimatanitu, ka tukuna yani ki na veiyanuyanu sa yawa, ka vaka, 'O koya sa vakasevi Isireli ena vakasoqoni koya tale, ka maroroi koya, me vaka nai vakatawa na nona qele ni sipi.'

¹¹Ni sa vakabulai Jekope o Jiova, ka sa kaliraki koya mai na liga i koya sa kaukauwa vei rau.

¹²O koya oqo era na lako mai kina ka meke e na dela-ni-koro o Saioni, ka drodro vata mai ki na loloma i Jiova, e na vuku ni witi, kei na waini, kei na waiwai, kei na luve ni sipi kei na bulumakau: ia na yalodra, ena vaka na were sa levu na kena wai; a ra na sega sara ni rarawa tale.

¹³"Ena qai marau na goneyalewa e na meke, o ira vata na cauravou kei na qase: ia Au na vukica na nodra tagi me ra reki, ka vakacegui ira, ka vakamarautaki ira me mudu na nodra rarawa.

¹⁴Ia Au na vakamamautaka na yalodra na bete e na ka sa uro, ia na Noqu tamata era na mamau e na Noqu loloma, sa tukuna o Jiova."

¹⁵Sa tukuna vakaoqo o Jiova; "Sa dua na domo sa rogo mai Rama, na qoqolou, kei na tagi levu; o Rejeli, sa tagicaki ira na luvena, ka sa bese ni vakacegui ni ra sa yali vua o ira na luvena."

¹⁶Sa tukuna vakaoqo o Jiova; "Mo kinoca na domomu, mo kakua ni tagi; ka me kakua ni vakawai na matamu: ni na saumi ga na nomu cakacaka, sa tukuna o Jiova; ia era na lesu tale mai na vanua ni meca.

¹⁷ia sa tu na ka mo vakanuinuitaka e na nomu gauna emuri sa tukuna o Jiova, ni ra na lesu tale mai o ira na luvemu ki na nodra i yalayala.

¹⁸"Au a rogoci Ifereimi vakaidina ni sa tagicaki koya, ka vaka, 'O ni sa vakanakuitataki au, ia au sa vakanakuitataki, me vaka na bulumakau sa sega ni veilasamaki kei nai vua: ni saumaki au mai, au na qai saumaki; ni sai kemuni Jiova na noqu Kalou.

¹⁹E dina ni'u sa saumaki mai, au sa qai veivutuni; ia ni'u sa qai kila, au sa sabica na sagaqu: au sa madua, io au sa taqaya, ni sa luvuci au na ka ka'u sa rogo ca kina ni'u a cauravou.'

²⁰Sa Noqu gone ni toko o Ifereimi, se sega? Sa gone daulomani, se sega? Ni'u a vosataki koya vakaca, Au sa daunanumi koya tikoga: O koya oqo sa yavala kina na utoqu e na vukuna; Au na lomani koya sara, sa tukuna o Jiova.

²¹"Mo vakaduria na nomui vakatakilakila ni sala, mo cakava na nomui tuvatuva cecere: mo vakasara na lomamu ki na salatu, na sala o a lako yani kina: mo lesu mai, na goneyalewa ni Isireli, mo lesu mai ki na nomu veikoro oqo.

²²Na cava na kena dede ni nomu dauveilakoyaki tu, o iko na goneyalewa dauvuki? Ni sa bulia o Jiova e dua na ka vou e vuravura” ena rawa na tagane e dua na yalewa."

²³Sa tukuna vakaoqo o Jiova ni lewe vuqa, na nodra Kalou na Isireli; "Era na cavuta tale na vosa oqo e na vanua o Juta kei na kena veikoro, Ni'u na kauti ira tale mai era a vakabobulataki; 'Me vakalouvinakataki iko o Jiova, nai tikotiko ni lewa dodonu, na ulunivanua tabu!'

²⁴"Ia ena tiko ga e Juta, kei na kena veikoro kece talega, o ira sa dau caka were, kei ira era veilakoyaki kei na qele ni sipi.

²⁵"Ni'u sa vakaceguya na yalodra era sa oca, ia Au sa vakamamautaka na yalodra kecega sa rarawa."

²⁶Sa oti oqo Au a qai yadra, ka vakaraica; ia na noqu moce sa kamikamica vei au.

²⁷"Raica, sa tukuna o Jiova ena yaco na gauna, Au na kaburaka kina na mataqali i Isireli kei na mataqali i Juta e na kawa ni tamata, kei na kawa ni manumanu.

²⁸"Ia ena yaco, me vaka ni'u a dauvakaraici ira, me'u cavuta, ka basuka sobu, ka talaraka, ka vakarusa, ka vakarawarawataka; ka'u na dauvakaraici ira vakakina me'u tara, ka me'u tea, sa tukuna o Jiova.

²⁹"E na gauna o ya era na sega ni tukuna tale, 'O ira na qase era sa kania na vua-ni-vaini wiwi, ia na batidra na luvedra sa rara kina.'

³⁰"Ni sai ira yadua, era na dui mate ga e na vuku ni dui nona cala: na tamata yadua sa kania na vua-ni-vaini wiwi, ena rara ga kina na batina o koya.

³¹"Raica, sa tukuna o Jiova ena yaco na gauna, Au na cakava kina kei na mataqali ni Isireli kei na mataqali Juta e dua na veiyalayalati vou”

³²"Ena sega ni vaka na veiyalayalati Au a cakava kei ira na nodra qase e na siga ka'u a taura kina na ligadra me'u tuberi ira mai na vanua o Ijipita; ni ra sa vakacataka na Noqu veiyalayalati o ya, ia oi Au, Au sa watidra ga, sa tukuna o Jiova.

³³"Ia sa vakaoqo na veiyalayalati Au na cakava kei ira na mataqali ni Isireli; Ni sa oti na gauna o ya, sa tukuna o Jiova, Au na tugana na Noqu vunau ki na lomadra, ka'u na vola talega ki na yalodra: ia ka'u na yaco me'u nodra Kalou, ka ra na yaco o ira me ra noqu tamata.

³⁴"A ra na sega ni dui veivakatavulici tale na tamata kei na kai nona, kei na wekana, ka tukuna, 'Mo kilai Jiova:' ni ra na kilai Au ga o ira kece, o ira sa tamata wale kei ira talega era sa turaga, sa tukuna o Jiova: ni'u na bokoca na nodra caka cala, ia na nodra i valavala ca Au na sega ni nanuma tale."

³⁵Sa tukuna vakaoqo o Jiova, o Koya sa solia na matanisiga me kena rarama na siga, ka lesia na vula kei na kalokalo me rarama kina na bogi, o Koya sa vakamaravutaka na wasawasa ni sa vadugu na kena biau: (O Jiova ni lewe vuqa na Yacana):

³⁶"Ke sa yali e Mataqu nai lesilesi oqo, sa tukuna o Jiova, ke sa qai kua ni matanitu tiko e Mataqu ka sega ni mudu o ira talega na kawa i Isireli."

³⁷Sa tukuna vakaoqo o Jiova, "Ke sa vakarauti rawa na lomalagi mai cake, ka vakadikevi rawa na yavu kei vuravura e ra, ke sa qai rawa talega me'u biuta tani na kawa i Isireli kecega e na vuku ni ka kece era sa cakava, sa tukuna o Jiova.

³⁸"Raica, sa tukuna o Jiova ena yaco na gauna, ena tara kina na koro me nei Jiova, mai na valececere i Ananeli ka yacova na Matamata-ni-koro, mai na Tutu-ni-koro.

³⁹"Ia ena yaco tale yani na wa i vakarau me vakadodonu ki na dela-ni-koro o Karepi, ka lako voli yani ki Koaca.

⁴⁰"Ia na buca kecega ni yagomate, kei na dravusa, kei na vanua kecega ka yaco ki na soniwai o Kitironi, ka yaco sara ki na tutu ni Matamata-ni-koro ni Ose vaka ki Natuicake, ena tabu me nei Jiova; ena sega ni cavuti tale, se talaraki sobu e na dua na gauna."