[24] Jeremaia 9

¹Me sa wai mada na uluqu, kei nai vurevure ni wai na mataqu, me'u tagi kina e na siga kei na bogi ena vuku ni nodra vakamatei na luvena yalewa na noqu tamata!

²Me tu mada mai na veikau e dua Noqu bure ni vulagi; Me rawa ni'u biuti ira tu na noqu tamata, ka lako tani vei ira! ni ra sa tamata dauveidauci kecega, nai soqosoqo ni daulawaki.

³"Ia sa vaka nodra dakai ni ra sa loveca na yamedra ki na lasu. Era sa sega ni qaqa me ra totaka na dina e vuravura. Ni ra sa lako yani mai na ca ki na ca, ka ra sa sega ni kilai Au," sa tukuna o Jiova.

⁴"Dou dui qarauni kemudou vinaka ena vuku ni kai nona, ia mo kakua ni vakararavi vua e dua na tacimu; ni ra na dauveiqaseni vei ira kecega na veitacini, kei ira kecega na kai nomu era na daulako vata kei ira na daukakase.

⁵Era na dui vakaisina kecega na kai nona, ka ra na sega ni vosataka na dina; Era sa vakavulica na yamedra me vosa lasu; Ia era sa dauvakaocataki ira ena caka ca.

⁶Na nomu vale sa tu ena loma ni veivakaisini; Ena vuku ni veivakaisini era sa bese ni kilai Au," sa tukuna o Jiova.

⁷O koya oqo sa tukuna kina o Jiova ni lewe vuqa: "Raica, Au na vakaririgi ira ka vakatovolei ira; Se cava me'u cakava vua na luvena yalewa ni Noqu tamata?

⁸Sa gasau vanataki na yamedra; Sa vosataka na veivakaisini; E dua sa vosa vinaka vua na kai nona ena gusuna, ia ena vu ni yalona sa tu kina na lawaki.

⁹Me'u sega ni cudruvi ira beka ena vuku ni veika oqo?" Sa tukuna o Jiova; "Me'u sega beka ni sauma na ca ki na matanitu sa vakaoqo?"

¹⁰Au na ia na tagi ena vuku ni veiulunivanua, ia ena vuku ni veikoro mai veikau e dua na tagi lagalaga, baleta ni ra sa kama yavu, me sega e dua e takosova rawa; se me rogoci tale na tagi ni bulumakau. Na manumanu vuka kei na manumanu ni vanua era sa dro; Era sa yali.

¹¹"Au na qisi Jerusalemi me dua nai binibini benu, me qara ni koli-kata. Au na vakalala na veikoro vaka Juta, me sega e tiko kina."

¹²O cei na tamata vuku, me yalomatua rawa ena ka oqo? Ia o cei o koya sa vosa kina na gusu i Jiova, me na vakatakila na ka o ya? Na cava sa rusa ka kama yavu kina na vanua me vaka na vanua liwa, me sega kina ni dua e kosova rawa?

¹³Ka sa tukuna o Jiova, "Baleta ni ra sa biuta na Noqu vunau Ka'u a tauca e matadra, ka ra sa sega ni talairawarawa ki na Noqu vosa se vakamuria,

¹⁴"Ia era sa muria ga na lewa ca ni yalodra, kei ira na Peali, me vaka ka vakavulici ira kina o ira na nodra qase,"

¹⁵O koya oqo sa tukuna kina vakaoqo o Jiova ni lewe vuqa, na Kalou ni Isireli: "Raica, Au na vakani ira na tamata oqo ena kau gaga, ka vagunuvi ira ena wai gaga.

¹⁶"Au na dui vakasavi ira talega ki na veimatanitu tani, e sega ni dua vei ira se o ira na nodra qase me kila. Ka'u na tala me muri e dua nai seleiwau me yacova Ni'u sa vakaoti ira."

¹⁷Sa tukuna vakaoqo o Jiova ni lewe vuqa: "Dou vakanananu ka kacivi ira na yalewa dau ni tagi, me ra lako mai; ka dou tukuna mera lako mai na kena daunilele.

¹⁸Me ra kusarawa mai me ia na tagi-yaso ena vukuda, me dave yani mai na matada na wai-nimata, ka tovure na wai mai na dreke-ni-matada.

¹⁹Ni sa dua na domo ni tagi-yaso sa rogo mai Saioni, sa tukuna, 'Ulei na noda vakacacani! Eda sa madua vakalevu, ni da sa biuta na vanua, baleta ni da sa vakasavi tani mai na noda i tikotiko.'"

²⁰Ia dou rogoca na vosa i Jiova, oi kemudou na yalewa, ka ciqoma ena daligamudou na vosa ni Gusuna; Vakavulici ira na luvemudou yalewa ena tagi-yaso, kei ira yadua na kai nona na lele.

²¹Ni sa curu mai e na noda katuba-leka o mate, sa curuma o koya na noda vale vakaturaga, me vakamatei ira na gone ” mera kua ni tiko mai taudaku! Kei ira na cauravou ” mera yali mai na salatu ni koro!

²²Mo vaka, "Sa tukuna vakaoqo o Jiova, 'Ia na yago mada ga ni tamata e na bale me vaka na benu e dela ni vanua, ka vaka na sila sa biuta laivi o koya na dau-tatamusuki, ka sa sega e dua me na kumuni ira.'"

²³Sa tukuna vakaoqo o Jiova, "Me kakua ni dokai koya na vuku ena nona vuku, me kakua talega ni dokai koya na kaukauwa ena nona kaukauwa, me kakua ni dokai koya na vutuniyau ena nonai yau;

²⁴Ia o koya sa dokai koya me dokai koya ena ka oqo, ni sa yalomatua me kilai Au, ni sai Au o Jiova, sa dauia na yalololoma, kei na lewa kei na cakacaka dodonu, e vuravura. Ni'u sa dauvinakata na veika oqori," sa tukuna o Jiova.

²⁵"Raica, na veisiga sa lako mai," sa tukuna o Jiova, "Ni'u na cudruvi ira kece kina era sa cili kei ira sa sega ni cili”

²⁶"O Ijipita, kei Juta, kei Itomi, na kawa i Amoni, Moapi kei ira kece mai na veiyalayala, era sa tiko ga mai na veikau. Ni ra sa sega ni cili o ira na veimatanitu kecega oqori, ia na mataqali kece ni Isireli sa sega ni cili na yalodra."