[18] Jope 12

¹Sa qai sauma o Jope, ka vaka:

²"E dina ni dou sa tamata ga, Ia na vuku ena mate vata kei kemudou!

³Ia e tu talega vei au na lomavuku me vaka sa tu vei kemudou; Au sa sega ni ca sobu vei kemudou. E dina, o cei e sega ni kila na ka vakaoqori?

⁴"Oi au e dua era sa vakalialia na nonai tokani, E dua e masu vua na Kalou, ka sa rogoci koya o Koya, Na tamata yalododonu ka sega ni cala era sa vakalialia.

⁵Na cina e beci ena nona vakanananu e dua sa tiko vakacegu; E vakarautaki ga me baleti koya sa voleka ni tidara na yavana.

⁶Na nodra veivale laca na daubutako sa sautu, Kei ira na dau vakacudruya na Kalou era sa tiko dei “ ena ka sa dausolia vei ira na Kalou.

⁷"Ia oqo mo tarogi ira mada na manumanu kila, era na vakavulici iko; Kei ira na manumanu vuka, ia era na tukuna vei iko;

⁸Se vosa ki na vanua, ia ena vakavulici iko; Kei na ika ni waitui ena vakamacalataka vei iko.

⁹O cei vei ira oqori me sega ni kila Ni sa cakava na ka oqo na Liga i Jiova,

¹⁰Sa tiko e ligana na nodra bula na ka kecega sa bula, Kei nai cegu ni tamata kecega?

¹¹E sega li ni vakatovolea na vosa na daliga ka tovolea talega na kena kakana na gusu?

¹²Sa tu na vuku vei ira na qase, Kei na yalomatua vei ira sa vua na nodra siga.

¹³"Sa tu vei Koya na vuku kei na kaukauwa, Sa Nona na lewa dina kei na yalomatua.

¹⁴Kevaka sa basuka sobu o Koya e dua na ka, ena dredre me tara cake tale; Kevaka sa vesuka o Koya e dua na tamata, ena sega ni sereki rawa tale.

¹⁵Kevaka sa tarova o Koya na wai, ena mamaca na vanua; Kevaka sa vakadrodroya tale o Koya na wai, ena luvuci vuravura.

¹⁶Sa tu vei Koya na kaukauwa kei na vuku. E Nona o koya sa vakacalai kei koya sa veivakacalai.

¹⁷Sa kauti ira tani vakabobula na daunivakasala, Ka vakasesei ira na daunilewa.

¹⁸Sa sereka na kedra i vesu na tui, Ka vauca na tolodra ena i vau.

¹⁹Sa kauti ira tani vakabobula na turaga, Ka vakabalei ira na qaqa.

²⁰Sa tabaki ira sobu na tamata dina me ra kua ni vosa, Ka kauta tani na nodra yalomatua na qase.

²¹Sa sovaraka na Nona veibeci vei ira na turaga, Ka kauta tani na nodra i yaragi na qaqa.

²²Sa vakarairaitaka na veika titobu mai na butobuto, Ka kauta mai na yaloyalo ni mate ki na rarama.

²³Sa vakalewevuqataki ira na veimatanitu, Ka sa vakarusai ira tale; Sa vakalevutaka na veimatanitu, Ka sa tuberi ira.

²⁴Sa kauta tani na nodra yalomatua na turaga ni kai vuravura, Ka sa vakasesei ira voli ena lekutu sa sega kina na sala.

²⁵Era vakayayamo voli ena butobuto ka sa sega na rarama, Ka cakava o Koya mera tatabalebale tu me vaka na tamata mateni.