[18] Jope 13

¹"Raica, na mataqu sa raica na ka kecega oqo, Sa rogoca na daligaqu ka sa kila.

²Na ka dou kila, au kila talega; Au sega ni ca sobu vei kemudou.

³Ia au na viavosa vei Koya sa Kaukauwa, Au na vinakata me keirau veitarogi kei na Kalou.

⁴Ia oi kemudou sa daubulia na lasu, Dou sa vuniwai e sega walega na betena.

⁵Oi, ke dou tiko lo mada, Ena qai nomudou vuku sara ga oqori!

⁶Dou rogoca mada na noqu vakatutusa, Ka vakarorogo ki na vakatakekere ni tebenigusuqu.

⁷Dou na vosa ca beka ena vuku ni Kalou, Ka vosa vakaveivakaisini ena Vukuna?

⁸Dou na vakaraitaka beka na nomudou totaki Koya? Dou na ia li na veileti ena vuku ni Kalou?

⁹Ena vinaka beka ni sa vakasaqarai kemudou o Koya? Se rawa beka vei kemudou mo dou vakalialiai Koya, me vaka sa ia e dua vua na tamata?

¹⁰Ena vunauci kemudou vakaidina o Koya, Kevaka dou sa vakadonui ira lo na tamata.

¹¹Ena sega beka ni vakarerei kemudou na Nona i tovo vakaturaga, se na sega ni kani kemudou na rerevaki Koya?

¹²Na nomudou vosa vakaibalebale sa dravusa ga, Na nomudoui sasabai nai sasabai qele.

¹³"Dou galu mada ga, ka laivi au me'u vosa, qai veitalia na cava me na yacovi au!

¹⁴Na cava me'u katia kina na lewequ e batiqu, Ka taura e ligaqu na noqu bula?

¹⁵Ke sa vakamatei au o Koya, ia au na vakararavi ga Vua. E vaka kina, au na vakadinadinataka na noqui valavala e Matana.

¹⁶O Koya talega me noqui Vakabula, Ni sega na tamata dauveivakaisini me toro rawa vua.

¹⁷Dou rogoca vakavinaka na noqu vosa, Kei na noqui tukutuku ena daligamudou.

¹⁸Raica, oqo au sa vakarau tu ki na veilewai, Au sa kila ni'u na vakadonui.

¹⁹O cei o Koya ena veilewai kei au? Ke'u na galu ga oqo, au na rusa.

²⁰"E rua ga na ka Mo ni kakua ni cakava vei au, Au na qai sega ni vunitaki au vei Kemuni;

²¹Mo Ni kauta vakayawa tani vei au na Ligamuni, Me kakua talega ni vakarerei au na Nomuni rerevaki.

²²Mo ni kaci, au na qai rogo yani; Se me'u vosa mada, Mo ni qai rogo mai vei au.

²³E vica beka na noqu caka cala, kei na noqui valavala ca? Mo ni vakatakila vei au na noqu talaidredre kei na noqui valavala ca.

²⁴Na cava o ni vunia kina na Matamuni, Ka kilakasamataki au me'u Kemuni meca?

²⁵O ni na vakarerea beka na drau-ni-kau sa cagina vaka ka vaka? Ka vakasava na vu-ni-sila malai?

²⁶Ni o ni sa vola na kequi vola gaga, Ka vota me noqu na noqui valavala ca ni'u a cauravou.

²⁷O ni sa vesuka talega na yavaqu e nai vesu kau, ka vakaraica matua na noqui lakolako kecega. Ka biuta nai yalayala ni qeteqete ni yavaqu.

²⁸"Na tamata sa luca mai me vaka na ka sa vuca, Me vaka nai sulu sa kania na sarasara.