[18] Jope 14

¹"Na tamata e sucu mai vua na yalewa sa vica walega na nona siga, ka sa levu na nona leqa.

²Sa tubu mai o koya me vaka na se ni kau, ka sa malai tale yani; Sa dro talega me vaka na yaloyalo, ka sa sega ni tomana tikoga.

³Ia o ni sa yadrava beka e dua e vakaoqo, Ka kauti au mai me daru veilewai kei Kemuni?

⁴O cei e na kauta rawa mai e dua na ka savasava mai na ka e sega ni savasava? E sega ni dua!

⁵Me vaka ni sa lokuci tu na nona siga, Nai wiliwili ni nona veivula sa tu vei Kemuni, o ni sa lesia na nonai yalayala me kakua ni lako sivia.

⁶Mo ni rai tani mada mai vua me rawa ni vakacegu o koya, Me vakaotia mada na nona siga, me vaka na tamata e saumi na nona cakacaka.

⁷"Ni sa nuitaka na vunikau, kevaka sa ta sobu, ena tubu tale, ia na kadre mai ni wakana malumu ena sega ni oti.

⁸Ke sa qase mai na wakana ena qele, ka sa mate na vuna ena loma ni qele,

⁹Ni sa boica ga na wai ena tubu mai Ka na vakatubura na tabana me vaka na vunikau.

¹⁰Ia sa mate na tamata, ka sa bulu yani; Io ni sa solia nai otioti ni nonai cegu, ka sa e vei o koya?

¹¹E vaka ni sa yali na wai mai na wasawasa, ka sa yaco me di ka mamaca na uciwai,

¹²Sa davo sobu vakakina na tamata ka sega ni tu cake tale. Me yacova ni sa yali o lomalagi, Era na sega ni yadra se vakaturi cake mai na nodra moce.

¹³"Oi, Mo ni vunitaki au mada ena i bulubulu, Ka tabonaki au me oti mada na Nomuni cudru, ka lokuca vei au e dua na siga, ka nanumi au!

¹⁴Kevaka sa mate na tamata, ena bula tale li o koya? Na noqu veisiga kece ni veiqaravi kaukauwa au na wawa, Me yaco mada na veisau vei au.

¹⁵O ni na kaci mai, au na rogo yani vei Kemuni; o ni na vinakata na cakacaka ni Ligamuni.

¹⁶Ia oqo o ni sa wilika na noqui kalawa kecega, Ia Mo ni kakua ni yadrava na noqui valavala ca.

¹⁷Sa dregati e loma ni taga na noqu talaidredre, Ia o ni sa ubia na noqui valavala ca.

¹⁸"Ia me vaka sa lutu e dua na ulunivanua qeqera yani, se me vaka na vatu sa kau tani mai na kena tikina;

¹⁹Me vaka sa solota na vatu na wai, kei na dobui ni sa kuitaka laivi na qele mai na delai vuravura; Sa vakakina ni o ni sa vakarusa nai nuinui ni tamata.

²⁰O ni sa gumatua tikoga vua ka sega ni mudu, ka sa takali yani o koya, o ni sa veisautaka nai rairai ni matana, ka vakatalai koya tani yani.

²¹E ratou sa vakarokorokotaki mai na luvena, ka sa sega ni qai kila o koya; E ratou sa vakasivoi, ka sa sega ni raica o koya.

²²Ia ena rarawa ga na lewena ena ka o ya, Ena tagi talega kina na lomana."