[18] Jope 15

¹Sa qai vosa o Ilivasi na Temanaiti, ka vaka:

²"Me sega li na betena na vosa ni kila ka ni tamata vuku, Ka vakamamautaki koya ena cagi ni tokalau?

³Ena vakadeitaki koya beka ena vosa e sega ni yaga, Se e nai vakamacala sa sega na betena?

⁴Io, o sa biuta tani na rere, Ka tarova na masu ena mata ni Kalou.

⁵Na nomui valavala ca sa vakavulica na gusumu, ka o sa digitaka na yame ni daulawaki.

⁶Na gusumu ga sa vakacalai iko, ka sega ni oi au, Io, na tebenigusumu ga sa beitaki iko.

⁷"O iko beka nai matai ni tamata ka sucu? Se o a buli e liu ka qai buli emuri na veiulunivanua?

⁸O a rogoca beka na bose vuni ni Kalou? Se o yalana li na vuku me nomu ga?

⁹Na cava o kila e sega ni keitou kila talega? Se cava o yalomatuataka ni sega ni tiko vei keitou?

¹⁰Oi rau ruarua na ulu sika kei na qase sara e rau tiko talega vei keitou, Era qase cake sara vei tamamu.

¹¹E lailai beka vei iko na veivakacegui ni Kalou, Kei na vosa malumu e cavuti vei iko?

¹²Na cava sa kauti iko vakatani kina na yalomu? Se ki na cava o bobo matai-dua kina,

¹³Mo vakatanitaka kina na yalomu vua na Kalou, Ka vakatara me lako mai gusumu na vosa vakaoqori?

¹⁴"Na cava na tamata, me rawa ni savasava o koya? Se o koya sa sucu maivua na yalewa, me rawa ni yalododonu o koya?

¹⁵Kevaka sa sega ni vakadinati ira na Nona era yalosavasava na Kalou, ka sa sega ni savasava na lomalagi e Matana,

¹⁶Sa qai vakaevei na tamata, o koya sa vakasisila ka dukadukali, o koya sa daugunuva na ca me vaka na wai!

¹⁷"Au na tukuna vei iko, rogoci au; Na ka kecega au a raica au na vakatakila,

¹⁸Na ka era a tukuna na vuku, era sega vunia e dua na ka e ciqomi mai vei ira na nodra qase,

¹⁹Kivei koya ga sa soli tu vua na vanua, ka sega na tamata tani me lako siviti ira:

²⁰Sa kana rarawa na tamata ca ena nona siga kecega, Ka sa vunitaki vua na dauivalavala kaukauwa na levu ni nona veiyabaki.

²¹Sa rorogo tu e daligana na ka rerevaki; Ni sa sautu tiko sa yacovi koya na dauveivakarusai.

²²Sa sega ni vakabauta ni na lesu tale mai na butobuto, Ni sa waraki koya tu nai seleiwau.

²³Sa vakasaqara voli na madrai, ka tukuna, 'Sa E vei?' Sa kila o koya ni sa voleka sara vua na siga ni butobuto.

²⁴Sa vakarerei koya na rarawa kei na yaluma; Era gumatua vua, me vaka na tui sa vakarau ki nai valu.

²⁵Ni sa dodoka o koya na ligana vua na Kalou, Ka sa vakaukauwataki koya me veivala kei Koya sa Kaukauwa,

²⁶Sa cici vakadomoqa vei Koya ena nonai sasabai kaukauwa, ka sukusukura.

²⁷"E dina ga ni sa ubia na matana e nona uro, Ka sa vakabibitaka na tolona ena uro,

²⁸Sa tiko ga o koya ena veikoro lala, Ena veivale sa sega e vakatawana, Ka sa nakiti tu me ra rusa.

²⁹Ena sega ni vutuniyau o koya, ena sega talega ni tomani tiko na nona rawa ka, Ena sega talega ni roboti vuravura na nonai yau.

³⁰Ena sega ni lako tani mai na butobuto; Ena raqosa na tabana ena yameyame-ni-buka, Ka na takali talega o koya e nai cegu ni gusuna.

³¹Me kakua ni vakararavi ena ka e sega na betena, ka vakaisini koya, Ni na nonai cocovi na ka e sega na betena.

³²Ni na rawati ni se bera na nona gauna, Ka na sega ni na drokadroka mai na tabana.

³³Ena kuretaka sobu o koya na vuana vou me vaka na vaini, Ka na mimira na sena me vaka na olive.

³⁴Ni na lala na nodra i soqosoqo na dauveivakaisini, Ia na buka waqa ena kania na nodra veivale na dauveivaqumi.

³⁵Era sa buketetaka na ca ka vakasucuma na lasu; Na ketedra sa vakarautaka tu na veivakaisini."