[18] Jope 17

¹"Sa kavoro na utoqu, sa oti na noqu siga, Sa waraki au tu nai bulubulu.

²E sega li ni ra tiko kei au na dauveivakalialiai? Ka sega li ni qara tiko na mataqu ki nodra veivakacudrui?

³"Ia oqo Mo ni biuta mada e dua na veiyalayalati vei au kei Kemuni. O cei mada o koya ena lululu kei au?

⁴Ni o ni sa tabonaka na lomadra me ra kakua ni vuku; o koya oqo o ni na sega kina ni vakalevulevui ira.

⁵O koya e vosaveicavilaki vei ira na wekana, Ena boko na matadratou na luvena.

⁶"Ia sa cakava o Koya mera vosabeci au na tamata, ka'u sa vaka e dua era sa kasivita na matana o ira na tamata.

⁷Sa buwawa talega na mataqu ena vuku ni rarawa, Ka sa vaka na yaloyalo na tikiqu kecega.

⁸Ena kurabui o ira na yalododonu e na ka oqo, Ena yavala o koya na sega cala me vorati koya na dauveivakaisini.

⁹Io na yalododonu ena lako dei tiko e nona sala, Kei koya talega sa liga savasava ena kaukauwa cake tikoga.

¹⁰"Dou yalovinaka, dou lesu tale mai, oi kemudou kecega, Ni'u sa sega ni kunea vei kemudou e dua na tamata vuku.

¹¹Sa oti yani na noqu siga, sa muduki tani na noqui naki, E vaka kina na nanuma ni lomaqu.

¹²Era sa vukica na bogi me siga; 'Sa voleka na rarama, 'era kainaka ki na mata ni butobuto.

¹³Ke'u sa waraka nai bulubulu me noqu vale, Ke'u sa cakava na noqui mocemoce ena butobuto,

¹⁴Ke'u sa tukuna ki na vuca, 'O iko na tamaqu,' Se ki na baca-ni-qele, 'O iko na tinaqu kei na ganequ,'

¹⁵Sa qai e vei na noqui nuinui? Ia na noqui nuinui, o cei ena raica rawa?

¹⁶Era na lako sobu li ki na matamata kei Etesi? Eda na kunea vata beka na vakacegu ena kuvu-nisoso?"