[18] Jope 2

¹Ena dua tale na siga ni ra sa lako mai na luve ni Kalou me vakaraitaki ira e na mata i Jiova, sa lako talega mai o Setani e na kedra maliwa me vakaraitaki koya e na mata i Jiova.

²Ka sa tukuna o Jiova vei Setani, "O a lako tu mai vei?" Sa sauma vei Jiova o Setani, ka vaka, "Au a veilakoyaki tu ga e vuravura."

³Sa qai tukuna vei Setani o Jiova, "O bau vakanananu beka vua na noqu tamata o Jope, ni sega ni dua me rau tautauvata e vuravura, e tamata yalododonu ka sega na ka me beitaki rawa kina, e rerevaka na Kalou ka cata na ca? Ia e maroroya tikoga na nona yalodina, e dina ga ni o a mai uqeti Au me'u vuki tani mai vua, ka vakarusai koya walega ni sega na vuna."

⁴Sa mani vosa o Setani vei Jiova, ka vaka, "Nai sau ni kuli na kuli! Io, na ka kecega e taukena na tamata ena solia mei sau ni nona bula.

⁵"Ia Mo ni dodoka mada na Ligamuni, ka tara na suina kei na lewena, ena qai vosavakacacataki Kemuni dina e Matamuni!"

⁶Ia o Jiova sa tukuna vei Setani, "Raica, sa tu ga o koya e ligamu, ia mo vakavoca ga na nona bula."

⁷Sa mani lako yani o Setani mai na mata i Jiova, ka yaviti Jope ena vidikoso, mai na qeteqete ni yavana me yaco sara ki buradelana.

⁸Ka sa taura o koya nai caca ni bilo me kari koya kina ni dabe voli e na dela ni dravusa.

⁹Sa qai tukuna vua o watina, "O sa dei tiko beka ga e na nomu yalodina? Vosavakacacataka na Kalou, mo mate ga!"

¹⁰Ia sa tukuna vua o koya, "O iko o sa vosa me vaka e dua na yalewa lialia. Me da na ciqoma beka ga na vinaka mai vua na Kalou, me da kakua talega ni ciqoma na ca?" E na ka kecega oqo e sega kina ni cala o Jope ena gusuna.

¹¹Ia ni ratou sa rogoca nai tokani i Jope e lewe tolu na ka rarawa kecega oqo sa yaco vua, e ratou sa qai dui lako yadua mai ki na nonai tikotiko: o Ilivasi na Temanaiti, kei Vilitati na Suaiti, kei Sofa na Neamataiti. Ni ratou sa lokuca vata na siga me ratou lako mai kina ka tagi vata ka vakaceguya.

¹²Ia ni ratou sa raici koya vakayawa, ka sega ni kilai koya, e ratou sa tagi vakadomoilevu; ka ratou sa dui dresulaka na nonai sulu, ka kaburaka na kuvu-ni-soso ki na uludratou vaka ki lomalagi.

¹³E ratou sa mani dabe sobu kei koya ena qele me vitu na siga ka vitu na bogi, ka sega ni dua e vosa rawa vua, ni ratou sa raica ni sa ka levu sara na nona rarawa.