[18] Jope 3

¹Sa oti oqo sa qai vosavakacacataka na siga ni nona sucu o Jope.

²Ia sa vosa o Jope, ka vaka:

³"Me rusa na siga au a sucu kina, Kei na bogi sa tukuni kina, 'Sa sucu e dua na gonetagane.'

⁴Me butobuto na siga o ya; Me kakua ni vakasaqara na Kalou mai cake, Se me cilava talega na rarama.

⁵Me rau na tukuna ni nodrau o butobuto kei na yaloyalo ni mate; Me dua na o e na ubia voli; Me vakarerei koya sara ga na butobuto ni siga o ya.

⁶Ia ena bogi oqori, me taura ga na butobuto loaloa; Me kakua ni reki vata kei na veisiga ni yabaki, Me kakua ni lako mai ki nai wiliwili ni veivula.

⁷Raica, me tu duadua ga na bogi oqori! Me kakua ni rogo kina na kaila ni reki!

⁸Me ra vosavakacacataka o ira era vosavakacacataka na siga, o ira era vakarau tu me vakayadrata na Livaiacani.

⁹Me yaco na kena kalokalo ni mataka lailai; Me na qara na rarama, ka sega ni kunea, Me kakua talega ni raica na kida ni mataka;

¹⁰Baleta ni a sega ni sogota na katuba ni kete i tinaqu, Ka sega ni vunia na rarawa mai na mataqu.

¹¹"Na cava au a sega kina ni mate ni'u sa qai sucu mai? Na cava au a sega kina ni rusa ni'u a lako mai na kete?

¹²Na cava e a ciqomi au kina na duruna? Se na matanisucu, e dodonu me'u sucuma?

¹³Ia oqo ke'u a davo malua no ka galu ga, Ke'u a moce ga; ka'u a qai vakacegu talega

¹⁴Kei ira na tui kei ira na daunivakasala e vuravura, o ira era tara na ka sa rusa me nodra,

¹⁵Se kei ira na turaga era sa vakoula, era vakasinaita na nodra vale ena siliva;

¹⁶Se ena vuku ni cava au sega kina ni vunitaki me vaka na gone lutudole; Me vaka na gone lalai era se sega ni bau raica na rarama?

¹⁷Mai kea na tamata ca sa na cegu ni veivakararawataki, ia maikea era sa vakacegu o ira era oca.

¹⁸Mai kea era sa vakacegu vata o ira na vesuki; Era sega ni rogoca na vosa ni dauveivakasaurarataki.

¹⁹Na lalai kei na lelevu era sa tu maikea, Ka sa sereki na bobula maivua na nona turaga.

²⁰"Na cava e soli kina na rarama vei koya sa rarawa, Kei na bula vei koya e gaga na yalona,

²¹O koya e gadreva me mate, ia e sega ga ni yaco mai, sa vakasaqara vakalevu ka vakalailai nai yau sa vuni tu;

²²O koya sa reki vakalevu, Ka marau ni sa rawa ni kunea nai bulubulu?

²³Na cava e soli kina na rarama vua na tamata sa vuni tu na nona sala, o koya sa viribaita na Kalou?

²⁴Ni sa liu mai na noqu ceguoca ni bera ni'u kana, Kei na noqu vutugu sa tasova yani me vaka na wai.

²⁵Na ka au a rerevaka vakalevu sa yaco mai vei au, Kei na ka au a taqayataka sa yaco vei au.

²⁶Au sa sega ni tiko dei, se galu voli; au sa sega ni tiko vakacegu, ni sa lako mai na ka rarawa."