[18] Jope 4

¹Sa qai vosa o Ilivasi na Temanaiti, ka vaka:

²"Kevaka sa vakatovolea e dua me vosa vei iko, o na oca beka? Ia, o cei me na tarovi koya rawa vakai koya me kakua ni vosa?

³E dina o a vakavulici ira e lewe vuqa, Ia o a dauvakaukauwataka na liga malumalumu.

⁴Na nomu vosa sa dautokoni koya sa voleka ni bale, o a dauvakaukauwataka na duru malumalumu;

⁵Ia oqo ni sa yacovi iko, ka o sa oca; Ni sa tarai iko, ka o sa kidroa.

⁶E sega beka ni nomu vakarokorokotaki sa vuni nomu yalodei? Kei na nomu yalodina ena nomui valavala sa vu ni nomu nuidei?

⁷"Mo nanuma mada oqo, o cei mada me na vakarusai ni sega na nona cala? Se mai vei e na tamusuki kina na yalododonu?

⁸Me vaka ga na ka au a dauraica, o ira era sa daucukita na caka ca Ka kaburaka nai valavala ca era na tamusuka ga na ka o ya.

⁹Mai na cagi kaukauwa ni Kalou era sa rusa kina, Ia mai nai cegu ni Nona cudru era sa tilomi kina.

¹⁰Na tagi ni laione, Na domo ni laione vakarerevaki, Kei na batidra na luve ni laione sa vorolaki.

¹¹Sa mate na laione qase ni sa lailai na kena, Ka ra sa dui veiseyaki na luve ni laione yalewa.

¹²"Ia oqo e dua nai tukutuku sa kau lo mai vei au, ia na daligaqu sa rogoca e dua na vakasolokakana.

¹³Ena sosa ni vakanananu me baleta na raivotu ni bogi, Ni sa bikai ira na tamata na moce lutu,

¹⁴Sa yacovi au mai na rere, kei na sautaninini, sa vakavuna me yavavala na suiqu kecega.

¹⁵Sa qai tavali e mataqu e dua na yalo; Sa se kina na votoqu.

¹⁶Sa tu vakadua, ia au a sega ni kila rawa na kenai rairai. Sa tu e mataqu na vatukana; Sa vagagalu ga; Au a qai rogoca e dua na domo ni tukuna:

¹⁷'E na rawa li me uasivi cake na nona yalododonu na tamata vua na Kalou? Se savasava cake beka na tamata vua ka buli koya?

¹⁸Kevaka e sega ni na vakadinati ira na nona tamata, Kevaka e na beitaki ira na nona agilose e na cala,

¹⁹Ena qai vakaevei o ira era tiko ena veivale qele, o ira e nodra yavu na kuvu-ni-soso, o ira era butuqaqi e matadra na bebe?

²⁰Era sa vorolaki vakamatailalai tiko mai na mataka me yacova na yakavi; Era sa rusa me sega ni mudu, ka sega e nanumi ira.

²¹Ena sega li ni takali yani na nodra vinaka? Era na mate ga, e dina mada ga ke sega vei ira na vuku.'