[18] Jope 5

¹"Mo kaci mada ni kua; de dua beka me na via rogo mai vei iko? Ia o cei vei ira na yalosavasava mo na goleva?

²Ni sa vakamatea na tamata lialia na cudru kaukauwa, ia sa vakarusai koya sa sega ni vuku na vuvu.

³Au sa kunea na lialia ni sa vakawakana tu; Ia e vakasauri ga au sa vosacataka na nonai tikotiko.

⁴E ratou sa yawa mai na tiko vinaka oiratou na luvena, e ratou sa butuqaqi mai na matamata ni koro, ia e sega ni dua me vakabulai iratou.

⁵Baleta ni sa kania na kena vuata o ira sa viakana, era sa kauta tani talega mai na loma ni ka votovotoa, kei na nodra i yau sa kovea o koya na dautudai.

⁶E dina sa sega ni tubu na ca mai na kuvu-nisoso, sa sega ni tubu mai na qele na rarawa.

⁷Sa sucu ga na tamata me rarawa, Me vaka ni sa dauvuka cake na lidi-ni-buka.

⁸"Ia vei au, au na vakasaqara na Kalou, kei na noqui tuvatuva kecega au na vakalaiva vua na Kalou.

⁹O koya sa cakava tiko na ka levu ka sa sega ni kilai rawa; Na ka e veivakurabuitaki sa sega ni wili rawa.

¹⁰O koya sa vakatauca na uca ki vuravura, Ka solia na wai ki na veiwere:

¹¹Me vakatikori ira kicake era tiko e ra; Me ra vueti cake me ra tiko vinaka o ira sa dautagi.

¹²Sa vukica o koya na nodra i lawaki na tamata qaseqase, Ka sa sega kina ni kitaka rawa na ligadra na ka era vakasaga tiko.

¹³Sa coriti ira na vuku ena nodra qaseqase, Kei na nodra i vakasala na tamata lawaki ca e na lesuvi ira tale vakatotolo.

¹⁴Era sotava na butobuto ena sigalevu, Ka ra vakayayamo voli ena siga levu me vaka ena bogi.

¹⁵Ia sa vakabula o Koya na dravudravua mai nai seleiwau; Mai na gusudra na kaukauwa, Kei na ligadra.

¹⁶E na ka oqo sa nuidei kina o koya na dravudravua, Ia sa sogorubu na gusui koya sa sega ni lewa dodonu.

¹⁷"Raica, sa kalouvinaka na tamata e vunauci koya na Kalou; o koya oqo mo kakua ni beca ni sa vakanakuitataki iko o Koya sa Kaukauwa.

¹⁸Ni sa butuqaqia o Koya, ia sa qai vauca tale; Sa vakamavoataka, ia na ligana sa vakataucokotaka.

¹⁹O Koya ena sereki iko mai na ka rarawa e ono, Io, ena kenai ka vitu, ena sega na ca me tarai iko.

²⁰Ni sa dausiga ena vakabulai iko mai na mate, Ia e nai valu mai na kaukauwa ni seleiwau.

²¹O na vunitaki mai na kaukauwa ni vosa, o na sega ni rerevaka ni sa lako mai na veivakarusai.

²²O na dredrevaka na veivakarusai kei na dausiga, o na sega talega ni rerevaka na manumanu kila ni vanua.

²³Ni o na cakava e dua na veiyalayalati kei na veivatu ni vanua, ia era na veivinakati kei iko na manumanu kila ni vanua.

²⁴Ia o na kila talega ni na sautu na nomu vale; Ia o na taleva na nomui tikotiko ka kunea ni sega na ka e yali kina.

²⁵O na kila talega ni ra na lewe vuqa na luvemu, Kei na nomu kawa ena vaka na co e vuravura.

²⁶O na yaco ki na nomui bulubulu ni o sa qase sara mai, Me vaka nai vau sila sa matua ena kena gauna.

²⁷Raica, na ka oqo keitou sa vaqaqa; Sa ka dina: Mo rogoca, ka mo kila talega vakai iko."