[18] Jope 20

¹Sa qai sauma o Sofa na Neamataiti, ka vaka:

²"O koya oqo sa uqeti au kina na nanuma ni lomaqu me'u vosa, Ka'u sa kusarawa e na vuku ni ka oqo.

³Au sa rogoca na vunau me'u madua kina: A sa uqeti au matua na yaloqu me'u sauma yani.

⁴"O a sega beka ni kila makawa na ka oqo, Mai na gauna e vakatikori kina na tamata e vuravura,

⁵Ni dau lekaleka ga na nodra marau ni qaqa nai valavala ca, Kei na nodra reki na dauveivakaisini e vakalailai walega?

⁶E dina ke yacovi lomalagi mada ga na nona totoka, Ka yaco ki na o na uluna,

⁷Ia o koya ena rusa laivi ga me vaka na nona benu; o ira era a raici koya era na tukuna, 'E vei o koya?'

⁸O koya ena vuka tani yani me vaka na tadra, ka na sega ni kune tale; Io, o koya ena vakasavi tani me vaka na raivotu e na bogi.

⁹Na mata e a raici koya ena sega ni kunei koya tale, Se me na kunei koya tale na nona vanua.

¹⁰Na luvena era na qara na nodra veitokoni na dravudravua, Kei na ligana ena vakasuka tale mai na nonai yau.

¹¹Na suina e sinai tu e na nona i valavala kaukauwa vakacauravou, Ia ena davo sobu kei koya e na kuvu-ni-soso.

¹²"E dina ga ni kamikamica e gusuna nai valavala ca, Ka vunia tu o koya e ruku ni yamena,

¹³E dina ga ni maroroya tu o koya, ka sega ni cakitaka, Ka se kubuta tu ga e na gusuna,

¹⁴Ia sa gaga mai na kena kakana e ketena; Ka sa weli gaga ni gata mai e lomana.

¹⁵Sa tiloma sobu nai yau, ka luaraka cake tale; Na Kalou e biuta tani mai na ketena.

¹⁶Ena domica o koya na weli gaga ni gata; Na yame ni gata ena vakamatei koya.

¹⁷O koya ena sega ni raica na wai drodro, Na uciwai e drodro tu kina na o ni kei na uro ni waini- sucu.

¹⁸O koya ena vakasuka tale na vua ni nona buno, ka na sega ni tiloma; Mai nai yau e rawa ena bisinisi o koya ena sega ni rekitaka.

¹⁹Ni sa vakasaurarataka ka biuta na dravudravua o koya, E kovea o koya na vale e a sega ni tara.

²⁰"Baleta ni sega kila o koya na malumalumu ni yalona, Ena sega ni maroroya o koya e dua na ka e domona.

²¹E sega ni vo e dua na ka vua me kania; o koya oqo ena sega kina ni tudei na ka e rawata.

²²Ena nona rawati koya vinaka ena veilecayaki kina; Na liga kecega ni vakaloloma ena tarai koya.

²³Ni sa vakarau me vakatawana na ketena, Ena sova vua na Kalou na Nona cudru katakata, Ka na vakatauca vua ni sa kana tiko.

²⁴Ena dro tani o koya mai nai yaragi kaukamea, Ia na gasau ni dakai varasa ena laubasikati koya.

²⁵Sa vanataki, ka sa laubasikataka na yagona; Io, na matana makamakalivata ena laubasikataka na mina. Sa kani koya na domobula;

²⁶Na butobuto e taucoko e vakarautaki tu me baleta na nonai yau. Na bukawaqa e sega ni irivi ena kati koya; Ena ca vei koya sa vo tiko e nona vale.

²⁷O lomalagi ena vakaraitaka na nonai valavala ca, Ena tucake me veivala kei koya o vuravura.

²⁸Ena lako tani na ka e tubu e nona vale, Kei na nonai yau ena drodro laivi e na siga ni nona cudruvi.

²⁹Oqo nai votavota mai vua na Kalou me nona na tamata i valavala ca, Nai votavota sa lesia na Kalou me nona."