[18] Jope 31

¹"Au a cakava oti na veiyalayalati kei na mataqu; Na cava na vuna me'u qai via raica kina e dua na goneyalewa?

²Na cava nai votavota mai vua na Kalou mai cake, Kei na ka e taukena o Koya sa Kaukauwa mai cake?

³E sega beka ni veivakarusai vei ira na tamata ca, Kei na ka rarawa vei ira na dau cakava nai valavala ca?

⁴E sega beka ni raica o Koya na noqui lakolako, Ka wilika kecega nai cavucavu ni yavaqu?

⁵"Kevaka au a lako voli kei na ka lasu, se kusarawa na yavaqu me'u veivakaisini,

⁶Me'u qai vakavakatovolei mada ena i vakarau dodonu, Me kila kina na Kalou na noqu yalodina.

⁷Kevaka sa butu cala na yavaqu mai na sala, se muria na yaloqu na rai ni mataqu, se kabita na ligaqu e dua na ka qeleqelewa,

⁸Me'u qai teitei oi au, ka dua tani me kania; Io, laiva na noqu vua ni qele me cavuraki.

⁹Kevaka sa veretaka na yaloqu e dua na yalewa, se'u wawa vakavuni toka mai na nona mata ni katuba wekaqu,

¹⁰Me qai laiva na watiqu me qaqi sila vua e dua tani, Ka laivi ira na tamata tani me ra cuva sobu vua.

¹¹Ni oqori nai tovo ca; Io, oqori nai valavala ca e dodonu me na lewai.

¹²Ni oqori na buka waqa ena kana voli ki na rusa, Ka na cavuraka laivi kecega na ka me'u tubu kina.

¹³"Kevaka au a beca na noqu dauveiqaravi tagane se yalewa Ni rau sa vosa kudrukudru e na vukuqu,

¹⁴Na cava au na qai cakava ni sa tucake na Kalou? Ni sa veivakanakuitataki o Koya, au na sauma rawa vakacava Vua?

¹⁵E sega li ni o Koya e a buli au ena kete e buli ira talega? E sega beka o Koya dua bau ga e a buli keda ena kete?

¹⁶"Kevaka au a tarovi ira na dravudravua mai na ka era gadreva, se'u vakavuna me raisara na matana na yada,

¹⁷Se'u kania duadua ga na qau kakana, Me kakua ni kana maikina na luveniyali

¹⁸(Ia mai na gauna ni noqu cauravou au a susugi koya me vaka na tama, Ia mai na ketei tinaqu au a tubera na yada);

¹⁹Kevaka au sa kunea ni dua e rusa ni sega na nonai sulu, Se dua na tamata dravudravua e sega na nonai tutuvi;

²⁰Ke a sega ni vosavakalouvinakataki au na yalona, Ke a sega talega ni katakata o koya ena vutika ni noqu sipi;

²¹Ke'u a dodoka cake na ligaqu me vorati ira na luveniyali, Ni'u sa kila sa tiko na noqui vukevuke mai na matamata-ni-koro;

²²Qai laiva me lutu tani na ligaqu mai na tabaqu, Laiva na ligaqu me taluva tani mai na veisema ni sui.

²³Ni veivakarusai mai vua na Kalou e ka vakadomobula vei au, Ia baleta na Nona cecere au sa sega ni vosota rawa.

²⁴"Ke'u a cakava me noqui nuinui na koula, Se tukuna ki na koula talei, 'O iko au sa nuidei kina';

²⁵Ke'u a reki ni'u sa vutuniyau sara, Baleta ni rawata nai yau levu na ligaqu;

²⁶Ke'u a vakaraica voli na mata-ni-siga ni sa cila mai, Se na vula ni toso voli kei na kena ramase,

²⁷Me sa dauveretaki lo na lomaqu, Ka sa reguca na ligaqu na gusuqu;

²⁸Oqo talega nai valavala ca e dodonu me tau kina nai totogi, Ni'u na qai cakitaka na Kalou o Koya sa tiko mai mai cake.

²⁹"Ke'u a reki ni sa rusa o koya sa cati au, Se vakalevulevui au ni sa kunei koya na ca

³⁰(E dina au a sega ni laiva na gusuqu mei valavala ca Me'u a kerea me yaco ki na yalona na ca);

³¹Kevaka era sega ni tukuna o ira e na noqu vale, 'O cei e tiko oqori ka sega ni mamau tiko ena kena lewe ni manumanu?'

³²(Ia e sega vulagi me moce e na gaunisala, Ni'u a dolava na katuba ni noqu vale vua vulagi);

³³Ke'u a ubia na noqu talaidredre me vakataki Atama, Ena noqu a vunia na noqui valavala ca e lomaserequ,

³⁴Ni'u a rerevaki ira na lewe vuqa, Ka domobula e na nodra be na veivuvale, Me'u tiko lo ga Ka kakua ni curu yani ki tautuba “

³⁵Sobo, me dua mada ga e rogoci au! Oqo na noqui vakadinadina. Oi, me bau sauma mada na noqu vosa o Koya sa Kaukauwa, Ni a vola talega e dua nai vola o Koya sa beitaki au!

³⁶E dina au na qai colata e na noqu i colacola, Ka vauca vei au me vaka nai sala vakaturaga;

³⁷Au na qai tukuna Vua nai wiliwili ni noqu cavui kalawa; Me vaka e dua turaga au na qai toro voleka vua.

³⁸"Kevaka sa beitaki au na noqu qele, Ka tagi vata kei na mawe ni siviyara;

³⁹Kevaka au sa kania na vuana ni sega nai lavo, Se vakavuna me ra mate na kenai taukei;

⁴⁰"Qai laiva me tubu na kau votovotoa mei sosomi ni witi, Kei na co ca mei sosomi ni parile." Sa oti na vosa i Jope.