[18] Jope 33

¹"Mo yalo vinaka, Jope, rogoca mada na noqu vosa, ka vakatu daligamu ki na vosa kecega ni gusuqu.

²Raica, oqo au sa qai dalaga; Sa vosa tiko e gusuqu na yamequ.

³Na noqu vosa e lako mai na yaloqu e dodonu; Na tebe ni gusuqu e tukuna na kila ka.

⁴Na Yalo ni Kalou e buli au, Kei nai cegu i Koya sa Kaukauwa e solia vei au na bula.

⁵Kevaka o rawata mo sauma na noqu vosa, Mo tuva vakavinaka na nomu vosa e mataqu; Mo tauri iko vinaka.

⁶E dina, au sa vakai koya e dau vosa ena vukumu e na mata ni Kalou; Au a buli talega mai na qele.

⁷E vakakina ena sega ni vakarerei iko na rerevaki, Se me na bibi vei iko na ligaqu.

⁸"E dina ni o sa vosa oti ena noqu vakarorogo, Au a rogoca talega na domo ni nomu vosa, ni tukuna,

⁹'Au sa savasava, ka sega ni valavala ca; Au sa sega ni cala, ka sega vei au na caka cala.

¹⁰Ia, sa kunea o Koya na veika eso au ca kina, Sa wiliki au o Koya me'u kena meca;

¹¹Sa qamuta o Koya na yavaqu e nai vesu kau, Sa yadrava na noqu sala kecega.'

¹²"Raica, e na ka oqo o sa sega kina ni dodonu. Au na sauma vei iko, Ni levu cake na Kalou vua na tamata.

¹³Na cava o sa veivala kina kei Koya? Ni sega ni mai soli tukutuku o Koya e na vuku ni dua na Nona vosa.

¹⁴Ni na vosa na Kalou ena kenai valavala e dua, se duatani tale, Ia na tamata ena sega ni kila rawa.

¹⁵Ena dua na tadra, ena dua na raivotu e na bogi, Ni sa bikai ira na tamata na moce lutu, Ni ra sa moce no e nodra i davodavo,

¹⁶Sa qai basuka o Koya na daliga ni tamata, Ka vakadeitaka vei ira nai vakaro,

¹⁷Me rawa ni vagolea tani kina na tamata mai na nonai valavala, Ka tabonaka na dokadoka mai vua na tamata,

¹⁸E tarova o Koya na yalona mai nai Keli, Kei na nona me kakua ni mate e nai seleiwau.

¹⁹"Na tamata sa vakararawataki talega e na nona i davodavo, Kei na mosi levu e na vuqa na suina,

²⁰Ia na nona bula sa besetaka na madrai, Kei na yalona na kakana vinaka.

²¹Na lewena sa malai yani me sega ni laurai, Kei na suina sa votu ka sega ni rairai e liu.

²²Io, na yalona sa toro voleka ki nai Keli, Kei na nona bula vei ira na dau-veivakamatei.

²³"Kevaka e tiko vua e dua nai talai, E dua dautataro, e le dua ga vei ira na lewe udolu, Me vakaraitaka vua na tamata na Nona yalododonu,

²⁴Ena qai yalololoma vua o Koya, ka tukuna, 'Vakabulai koya mai na nona lako ki nai Keli; Au sa kunea e dua na kenai voli';

²⁵Na lewena ena vaka tale na lewe ni gone, Ena suka tale o koya ki na nona gauna vaka cauravou.

²⁶Ena masu vua na Kalou, ka na marautaki koya o Koya, Ena raica na matana ena reki, Ni sa vakalesuya vua na tamata na Nona yalododonu.

²⁷Sa raici ira na tamata o koya, ka sa tukuna, 'Au sai valavala ca, ka vakatanitaka na ka e dodonu, A sa sega ni yaga vei au.'

²⁸O Koya ena volia lesu na yalona me kakua ni lako sobu ki nai Keli, Ia na nona bula ena kunea na rarama ni bula.

²⁹"Raica, na Kalou e daucakava na ka kecega oqo, Vakarua, e dina, e vakatolu vua e dua na tamata,

³⁰Me vakalesui koya tani mai nai Keli, Me na vakararamataki talega e na rarama ni bula.

³¹"Mo vakatu daliga, Jope, vakarorogo vei au; Mo tiko lo mada, au na qai vosa.

³²Kevaka e dua na vosa o via cavuta, tukuna mai vei au; Mo vosa mai, ni'u sa gadreva me'u vakadodonutaki iko.

³³Ke sega, mo vakarorogo vei au; Mo tiko lo, au na qai vakavulica vei iko na vuku."