[18] Jope 34

¹Sa tomana na vosa oilaiu, ka vaka:

²"Dou rogoca na noqu vosa, oi kemudou na tamata vuku; Vakatu daligamudou vei au, oi kemudou na kila ka.

³Ni sa vakalewa na vosa na daliga, Me vaka sa tovolea na kakana na gusu.

⁴Tou digitaka me nodatou na lewa dodonu: Me tou kila vakataki kedatou na ka e vinaka.

⁵"Ni sa tukuna o Jope, 'Au sa yalododonu, Ia sa lewai au vakatani na Kalou;

⁶Me'u lasu beka e na ka au lewai kina? Na noqu mavoa sa na sega ni bula rawa, ia ka sega na ka ca e vuna.'

⁷O cei na tamata e vakataki Jope, Me gunuva na veivakalialiai me vaka na gunu wai,

⁸O cei sa sala vata kei ira na daucakava na ka ca, Ka lako voli kei ira na tamata ca?

⁹Ni sa tukuna o koya, 'Sa sega ni yaga vua na tamata, Me marautaki koya na Kalou.'

¹⁰"O koya oqo mo dou vakarorogo kina vei au, oi kemudou na tamata yalomatua; Me yawa vua na Kalou, me caka ca; Me yawa talega vua sa Kaukauwa, me sega ni dodonu.

¹¹Ni na solia vua na tamata me vaka na nona cakacaka, Ena kitaka talega me ra kunea na tamata yadua me tautauvata kei na nodra i valavala.

¹²E dina ga ni na sega ni caka ca na Kalou, Ena sega talega ni kauta vakatani na lewa o Koya sa Kaukauwa.

¹³O cei sa lesi koya me lewai vuravura? Se o cei e solia Vua na vuravura taucoko me maroroya?

¹⁴Ke sa nanuma na tamata o Koya, Ke sa kauta tale vua na yalona kei na nonai cegu,

¹⁵Ke sa na qai ciba vata kecega na tamata, Ka na lesu tale na tamata me kuvu-ni-qele.

¹⁶"Ia kevaka o sa vuku, mo rogoca oqo: Mo vakarorogo ki na noqu vosa:

¹⁷Me lewa beka o koya sa cata na ka dodonu? O na vakacalai Koya beka sa yalododonu sara?

¹⁸"Me dua beka e tukuna vua e dua na tui, 'Kemuni sa ca? Se vei ira na turaga, 'Dou sai valavala ca'?

¹⁹Me qai tukuna vakacava vei Koya sa sega ni vinakati ira loa na turaga, Ka sega ni nanumi ira vakalevu na vutuniyau, ka vakalailai na dravudravua? Ni ra sa cakacaka ni Ligana o ira kecega.

²⁰Era na mate vakasauri sara, Ka ra na kidroa na tamata ena lomaloma-ni-bogi, ka lako tani yani: Era na kau tani na qaqa ka sega na liga e kauta.

²¹"Ni sa rai tiko na Matana ki nai valavala ni tamata, Ka sa raica kecega na nonai lakolako.

²²Sa sega na butobuto, se na yaloyalo ni mate, Me ra vunitaki ira kina na daucaka ca.

²³Ni na sega ni tauca o Koya vua na tamata na ka e sega ni dodonu; Me rau ia kina na veilewai kei na Kalou.

²⁴Ena vorolaki ira ga na tamata qaqa ka na sega ni tarogi, Ka na lesi ira na tani eso me kedra i sosomi.

²⁵Ni sa kila na nodra cakacaka o koya, Ka sa vukici ira ena bogi, a ra sa rusa kina.

²⁶Sa yaviti ira ena matanavotu, Me vaka era tamata ca,

²⁷Ni ra lesu tani me ra kua ni muri Koya. Ka sega ni via nanuma na Nona sala,

²⁸Ia ena vukudra sa yaco kina Vua na nodra tagi na dravudravua: Ka sa rogoca o Koya na nodra tagi era sa rarawa.

²⁹Ni sa solia na vakacegu o Koya, o cei me qai ia na veivakararawataki? Ni sa vunia na Matana o Koya, o cei me qai raici Koya?”

³⁰Ka me kakua ni lewa na dauveivakaisini, De ra sa coriti o ira na tamata.

³¹"Sa dodonu ga me da tukuna vua na Kalou, 'Au sa vosota ga: au na sega ni ia tale na ca;

³²Na ka au sa sega ni kila, mo ni vakavulica vei au: Kevaka au sa caka ca au na sega ni cakava tale'?

³³Me caka beka vua me vaka na lomamu? Ena sauma ga o Koya, se o besetaka, se o vinakata; ka sega oi au: Ia mo tusanaka na ka o kila.

³⁴"Me ra tukuna vei au o ira na tamata yalomatua, Me vakarorogo talega vei au o koya sa vuku:

³⁵'Sa vosataka o Jope na ka sa sega ni kila, Ka sa sega ni vuku na nona vosa.'

³⁶Au sa vinakata me vakatovolei vakaoti mada o Jope, Ka ni sa totaki ira na tamata ca!

³⁷Ni sa kuria o koya na nonai valavala ca ena be: Sa vakasausau ena kedatou maliwa, Ka ia vakalevu na nona vosacataki koya na Kalou."