[18] Jope 35

¹Sa ia tiko na vosa o Ilaiu, ka vaka:

²"O nanuma beka ni ka dodonu oqo, Mo tukuna, 'Sa uasivi cake na noqu yalododonu, sa uasivi sobu na nona yalododonu na Kalou'?

³Ni o sa taroga, 'Na cava na betena vei au ke sa sega vei au nai valavala ca?'

⁴"Au na tukuna vei iko, Vei iratou talega na nomui tokani ka tiko vata kei iko.

⁵Mo ta cake mada ki na lomalagi, ka raica: Ka vakaraica na o O sa cecere cake vei iko.

⁶Kevaka o sai valavala ca, na cava o sa cakava vua? Ia kevaka sa vakalevutaki na nomu talaidredre, na cava o sa kitaka vua?

⁷Kevaka o sa caka dodonu, na cava o sa solia vua: Se cava sa rawata mai vei iko o Koya?

⁸Ena ca beka ena nomui valavala ca e dua na tamata vakataki iko: Ka na yaga beka na nomu caka dodonu vua e dua na luve ni tamata.

⁹"Ni sa levu na veivakasaurarataki, era sa tagi kina o ira era sa vakasaurarataki: Era sa qoqolou ena vuku ni ligadra na kaukauwa.

¹⁰Ia sa sega ni dua e tukuna, 'Sa E vei na Kalou ka Buli au, o Koya sa solia na sere ena bogi,

¹¹O Koya sa vakavulici keda vakalevu, ka vakavulici ira vakalailai na manumanu ni vanua; Ka sa qisi keda me da vuku cake vei ira na manumanu vuka?'

¹²Era tagi mai kea ka sega ni dua e vosa mai, Ena vuku ni nodra viavialevu na tamata ca.

¹³E dina ena sega ni vakarogoca na ka wale na Kalou, Ena sega talega ni goleva o Koya sa Kaukauwa.

¹⁴Ia ni o sa tukuna o na sega ni kunei Koya rawa, Sa tiko ga vua na lewa dodonu: O koya oqo mo vakararavi kina vua.

¹⁵Ia oqo, ni sa sega ni nanuma vakalevu na viavialevu,

¹⁶Sa dalaga wale kina o Jope, Sa vakalevutaka na vosa sa sega ni vuku."