[18] Jope 7

¹"E sega beka na siga ni nona cakacaka vakararawa na tamata e vuravura? E sega beka ni tautauvata na nona siga kei na siga ni tamata sa voli?

²Me vaka na tamata dauveiqaravi e gadreva vakaidina na rurugu, ka tautauvata talega kei na tamata cakacaka ni namaka voli na kenai sau,

³Sa votai vakakina vei au na veivula wale, kei na veibogi ni vutugu sa lesi vei au.

⁴Ni'u davo sobu, au sa tukuna, 'Au na duri ninaica, ni sa oti kina na bogi?' Ni'u a kila talega na ca ni veivukiyaki voli me yacova na kida ni mataka.

⁵"Sa vakaisulu na lewequ ena baca kei na kuvu ni qele, Sa kakaca na kuliqu ka sa boi ca mai.

⁶"Na noqu veisiga sa totolo cake mai na nona tali na dautali sulu, ka sa vakaoti ga ka sega nai nuinui.

⁷Mo nanuma ni noqu bula sa cagi walega! Ena sega ni kunea tale na ka vinaka na mataqu.

⁸Na matai koya sa raici au ena sega ni qai raici au tale; Ni sa vakaraici au tiko na matamuni, au sa sega ni qai kune.

⁹Me vaka ni sa seavu na o ka lako tani yani, Sa vakakina o koya sa lako sobu ki nai bulubulu ni na sega ni lako cake tale mai.

¹⁰Ena sega ni lesu tale mai ki nona vale, Se me kilai koya tale na nona yasana.

¹¹"O koya oqo au na sega kina ni tarova na gusuqu; Au na vosa ena rarawa bibi ni yaloqu; Au na didi e na gaga ni lomaqu.

¹²Oi au beka e dua na wasawasa, se dua na gata ni wasawasa, o ni sa lesia kina e dua me vakatawai au?

¹³Ni'u sa tukuna, 'Ena vakacegui au na noqui mocemoce, Na noqui davodavo e na vakaceguya na noqu didi,'

¹⁴O ni sa qai vakarerei au ena tadra ka vakadomobulataki au ena raivotu,

¹⁵Sa mani digitaka kina na yaloqu na kukuna kei na mate ni vinaka cake ka ca na yagoqu.

¹⁶Au sa vakasisilataka na noqu bula; Au na sega ni bula tikoga me sega ni mudu. Mo ni laivi au ga, ni sa cagi walega na noqu veisiga.

¹⁷"Na cava na tamata, Mo ni vakalevulevui koya kina, Mo ni vagolea kina kivua na Yalomuni,

¹⁸Mo ni sikovi koya kina ena veimataka, Ka vakatovolei koya ena veigauna kecega?

¹⁹Me vakacava na kena dede? Mo ni na sega ni vagolea tani na Matamuni mai vei au, Ka laivi au tu me yacova ni'u sa tiloma na noqu weli?

²⁰Au sai valavala ca li? Na cava au a cakava vei Kemuni, Oi Kemuni sa dau-wanonova na tamata? Na cava o ni a digitaki au kina me'u Nomuni takete, Au sa yaco kina me'u ka ni oca vei au ga?

²¹Ena vuku ni cava o ni sega kina ni bokoca na noqu caka cala, ka kauta tani na noqui valavala ca? Ia oqo au na qai davo sobu ena kuvu-ni-soso, ka o ni na qai vakasaqarai au vagumatua, Ia au sa sega ga ni kune."