[43] Joni 6

¹Ni sa oti na veika oqo, sa lako ki na wasawasa mai Kaleli o Jisu, na wasawasa mai Taiperia.

²Era sa muri Jisu e dua nai wiliwili levu ni tamata, ni ra sa raica na veika lelevu sa cakava o Koya vei ira sa tauvimate.

³Sa lako cake o Jisu kina ulunivanua, ka sa tiko vata kei ira na Nona tisaipeli.

⁴Na Lakosivia, na nodra Solevu na Jiu, sa voleka mai,

⁵Sa rai yani o Jisu, ka raici ira na lewe vuqa ni ra sa lako tiko mai Vua, sa tukuna sara vei Filipe, "Me voli mai vei na madrai me ra kana kina oqo?"

⁶Sa tukuna o Jisu na veika oqo me vakatovolei Filipe kina, ni sa kila oti tu ga o Jisu na veika me na cakava.

⁷Sa sauma vua o Filipe, "Me limasagavulu na dola na madrai ena sega ni veiraurau kei ira oqo, me rawa mada ga ni ra vakalalai?"

⁸E dua vei ira na Nona tisaipeli o Adriu na taci Saimone Pita sa tukuna mai Vua,

⁹E dua na gone e tiko oqo, sa tiko vua e lima na madrai kei na rua na ika lalai, na cava oqo vei ira na lewe vuqa sa wawa tu.

¹⁰Sa qai vosa mai o Jisu ka vaka: "Cakava me ra dabe kece." Sa levu na vanua sa tu me ra dabe kina. Era sa dabe sobu, na tagane mada ga, e lima na udolu.

¹¹Sa taura na madrai o Jisu, ni sa vakavinavinaka oti, sa wasea sara vei ira na Nona tisaipeli, o ira na tisaipeli era sa wasewase sara vei ira sa dabe tiko; sa vakakina na ika me vaka na kena levu era sa vinakata.

¹²Ni ra sa mamau na tamata, o Jisu sa tukuna sara vei ira na Nona tisaipeli, "Mo ni kumuna mai na veika sa vo, me kumuni kece sara."

¹³Sa soqoni kece mai na kena vo ka vakatawani ena tinikarua na sova na vovo ni lima na madrai kei na rua na ika sa laukana vakavo tu.

¹⁴O ira na tamata oqo, ni ra sa raica na veika sa cakava o Jisu, era sa tukuna: "Sa i koya dina oqo na parofita e dodonu me na lako mai ki vuravura."

¹⁵Ni sa kila o Jisu ena nodra sa via tauri Koya vakaukauwa ka mera buli Koya me nodra tui, sa lako yani ki na dua na ulunivanua me tiko duadua kina.

¹⁶Ni sa yakavi mai, era sa lako na Nona tisaipeli ki wai,

¹⁷era sa vodoka e dua na waqa ka me muri wai yani vaka ki Kapenaumi. Sa buto tiko mai, ka e se bera ga ni yaco mai o Jisu.

¹⁸Sa tubu cake na ua lelevu baleta ni sa liwa vakaukauwa tiko na cagi.

¹⁹Ni ratou sa voce tiko me tolu se va na maile, e ratou sa raici Jisu ni sa lako tiko mai e dela ni wai ka sa volekata mai na waqa; e ratou sa rere vakalevu sara.

²⁰Sa vosa mai vei iratou o Jisu ka tukuna, "Sai Au ga oqo, dou kua ni rere.

²¹E ratou sa kacivi Jisu mai ki na waqa, vakasauri sa yaco ki vanua na waqa.

²²Ena siga ka tarava, ni ra sa raica o ira na tamata sa tiko mai na tai kadua ni wai ni sa sega tale na waqa sa vo, na waqa ga e ratou sa vodo tiko kina na Nona tisaipeli, ka ra sa sega ni vodo vata kei Jisu, o iratou duaduaga -

²³Sa so tale na waqa era sa lako mai Taiperia, volekata na vanua era sa kania kina na madrai kei na ika ni sa vakavinavinakataka oti o Jisu -

²⁴ni ra sa sega ni raici Jisu na tamata, se ira na Nona tisaipeli, era sa lako mai ki Kapenaumi me vakasaqarai Jisu.

²⁵Era sa raici Koya mai na tai kadua ni wai, ka ra tarogi Koya, "Rapai o ni sa lako mai vakacava e ke?"

²⁶Sa sauma o Jisu ka vaka: "Sa dina sara, Au sa tukuna vei kemuni, o ni sa vakasaqarai Au sega ni baleta nai vakatakilakila, sa baleta ga ni o ni sa kana ka mamau.

²⁷Mo ni kakua ni oca ena vuku ni kakana ena oti yani, mo ni oca ga ena kakana sa tudei ka sega ni mudu, sa solia ga na Luve ni Tamata, baleta ni sa solia o Tamana na kena i vakadei Vua na Luvena.

²⁸Era sa tukuna vua na tamata, "Na cava me keimami cakava, me keimami cakava kina na cakacaka ni Kalou?"

²⁹Sa sauma vei ira o Jisu ka tukuna, "Oqo na cakacaka ni Kalou, mo ni vakabauti Koya sa talai mai vua na Kalou."

³⁰Era sa tukuna vua, "Na vakatakilakila cava o ni na cakava, me keimami raica ka vakabauti kemuni kina? Na cakacaka cava o ni sa cakava?

³¹"O ira na tamai keimami era sa kania na Mana mai na vanua liwa; me vaka sa volai, "sa solia vei ira na madrai mai lomalagi me ra kania!"

³²Sa qai tukuna vei ira o Jisu, "Sa dina sara, Au sa tukuna vei kemuni, o Mosese sa sega ni solia vei kemuni na madrai mai lomalagi, o Tamaqu ga sa solia na madrai mai lomalagi."

³³"Ni sa madrai mai Vua na Kalou, o Koya sa lako sobu mai lomalagi, ka sa solia na bula ki vuravura."

³⁴Era sa tukuna Vua, "Turaga ni solia tikoga vei keimami na madrai oqori."

³⁵Sa tukuna vei ira o Jisu, o Au ga na madrai ni bula. O koya sa lako mai vei Au, ena sega tale ni via kana, kei koya sa vakabauti Au ena sega ni via gunu tale.

³⁶"Au sa tukuna oqo vei kemuni, ni kemuni sa raici Au, ia, o ni sa sega ga ni vakabauti Au.

³⁷"Na veika kece sa solia o Tamaqu vei Au, ena lako kece mai vei Au, ena sega sara ni dua me biu laivi.

³⁸"Ni'u sa lako sobu mai lomalagi, sega Ni'u mai cakava na lomaqu ga. Na lomai Koya ga sa talai Au mai.

³⁹"Sai koya oqo na loma i Tamaqu sa talai Au mai, o ira kece sa solia mai vei Au o Koya, me kua ni dua e yali, Me'u vakaturi ira cake ga ena siga mai muri.

⁴⁰"Oqo na loma i Koya sa talai Au mai, o ira vakayadua sa raica na Luvena, ka vakabauti Koya ena rawata na bula sega ni mudu, Au na vakaturi koya cake ena siga mai muri.

⁴¹Era sa vosa kudrukudru ena vukuna o ira na Jiu, ni sa tukuna, "Oi Au na madrai sa lako sobu mai lomalagi."

⁴²Era sa tukuna mai, e sega beka ni o Jisu ga oqo na luvei Joseva kei Meri, na tamana kei na tinana eda sa kila vinaka. Me tukuna rawa vakacava o koya, "Sai Au sa lako sobu mai lomalagi?"

⁴³Sa sauma yani o Jisu ka vaka “ "Mo ni kua ni vosa kudrukudru vakai kemuni."

⁴⁴"Sa sega ni rawa ni dua na tamata me lako mai vei Au, vaka vo kevaka sa vakayarayarataki koya mai o Tamaqu o Koya sa talai Au mai, Au na vakaturi koya cake talega e na siga mai muri.

⁴⁵"Era sa vola na parofita, era na vakavulici kecega mai vua na Kalou. O ira kece sa rogoca ka vuli mai vei Tamaqu era na lako mai vei Au.

⁴⁶"Sa sega ni baleti koya ga sa raica na Tamana, o Koya ga sa mai vua na Kalou; sai koya ga sa raica na Tamana.

⁴⁷"Sa dina sara, Au sa tukuna vei kemuni, o koya sa vakabauti Au, sa rawata na bula sega ni mudu.

⁴⁸"Sai Au ga na madrai ni bula.

⁴⁹"Era sa kania na mana na nomuni qase mai na vanua liwa, ka mate.

⁵⁰"Oqo na madrai sa lako sobu mai lomalagi, o koya sa kania na madrai oqo, ena sega ni mate.

⁵¹"Oi Au na madrai sa bula tiko sa lako sobu mai lomalagi. O koya sa kania na madrai oqo, ena bula me Sega ni mudu; na madrai Au na solia “ na yagoqu ga “ o koya Au na solia me bula kina o vuravura.

⁵²Era sa veiba vakataki ira na Jiu ka tukuna "Ena rawa beka vakacava vua na Tamata oqo me solia vei keda na yagona me da kania?"

⁵³Sa tukuna vei ira o Jisu, "Sa dina sara, Au sa tukuna vei kemuni, vakavo sara ni kemuni sa kania na yagona na Luve ni Tamata ka gunuva na Nona dra, sa sega vei kemuni na bula.

⁵⁴"O koya sa kania na Yagoqu ka gunuva na Noqu dra sa tu vua na bula sega ni mudu, Au na vakatucaketaki koya ena siga mai muri.

⁵⁵"Na yagoqu sa kakana dina, ka wainigunu dina na Noqu dra.

⁵⁶"O koya sa kania na Yagoqu ka gunuva na Noqu dra sa tu vei Au, oi Au talega vua.

⁵⁷"Me vaka sa bula tiko o Tamaqu, o koya sa talai Au mai, Au sa bula tiko ena vuku i Tamaqu, sa vakakina o koya sa sucu mai vei Au, ena bula ena vukuqu.

⁵⁸"Sai koya oqo na madrai sa lako sobu mai lomalagi “ sa sega ni vaka na mana era sa kania na nomuni qase ka ra sa mate kina. O koya sa kana mai na madrai oqo, sa bula ka Sega ni mudu."

⁵⁹Sa tukuna na veika oqori o Jisu ena vale ni lotu sa vakavuvuli kina o Koya mai Kapenaumi.

⁶⁰E vuqa na Nona tisaipeli ni ra sa rogoca mai vua na veika oqo, era sa tukuna mai “ "Sa dua na ka dredre oqo, o cei ena kila rawa?"

⁶¹Ni sa kila o Jisu na nodra veivosayaki na Nona tisaipeli ena vuku ni ka oqori, sa tukuna yani vei ira, "O ni sa leqa beka ena vuku ni veika oqo?

⁶²"Vakacava kevaka o ni sa raica na Luve ni tamata ni sa lako cake ki na vanua ea tiko ga kina e liu?

⁶³"Sai koya na Yalo sa solia na bula, sa sega ni yaga na yago. Na vosa Au sa vosataka vei kemudou sa Yalo, ka vaka vu bula.

⁶⁴"Sa so vei kemuni sa sega ni vakabauta," Ni sa kila o Jisu mai na i vakatekivu o cei sa sega ni vakabauta kei koya ena cakitaki Koya.

⁶⁵Sa tukuna o Jisu, "Au sa tukuna oti vei kemuni ni sega ni dua e lako rawa mai vei Au, vakavo, kevaka sa vakatara vua o Tamaqu.

⁶⁶Mai na gauna sara ga o ya, sa levu vei ira na Nona tisaipeli sa lesu tani mai vua, ka era sa sega tale ni lako vata.

⁶⁷Sa qai tukuna vei ira na lewe tinikarua o Jisu, "Dou sa via lako tani talega oi kemudou?"

⁶⁸Sa sauma yani o Pita, "Turaga me keitou lako tale vei cei? Sa tu ga vei Kemuni na vosa ni bula sega ni mudu."

⁶⁹"Keitou sa yaco talega me vakabauta ka kila, ni sai Kemuni na Karisito na Luve ni Kalou bula."

⁷⁰Sa sauma vei iratou o Jisu, "Sa sega beka Ni'u digitaki kemudou na lewe tinikarua, ka sa dua vei kemudou na tevoro?"

⁷¹Sa vosa ena vuku i Jiutasa Isikarioti na luvei Saimone, ni sai koya ena volitaki Jisu, ka dua vei ira na lewe tinikarua.