[43] Joni 7

¹Sa oti oqo, sa veilakoyaki voli o Jisu mai Kaleli; ni sa sega ni via veilakoyaki voli e Jutia, baleta ni ra sa vakasaqarai Koya na Jiu me ra vakamatea.

²Sa qai yaco mai na nodra solevu ni vale vakacevaceva na Jiu.

³Era sa tukuna vei Jisu na tacina, "Biuta na vanua oqo, ka lako ki Jutia, me ra raica talega na Nomu tisaipeli na veika o sa dau cakava.

⁴"Ni sa sega e dua sa dau cakava vuni na ka, kevaka sa vinakata me ra kila na tamata na ka o ni sa daucakava. Kevaka o sa cakava oqo, vakaraitaki Iko yani ki vuravura."

⁵O iratou mada ga na tacina e ratou sa sega ni vakabauti Koya.

⁶Sa qai tukuna vei iratou o Jisu, "E se bera ni yaco mai na Noqu gauna, na nomuni gauna na tamata sa tu oqo.

⁷"O vuravura ena sega ni rawa ni cudruvi kemuni, sa cati Au ga o vuravura baleta, ni'u sa tukuna tikoga na ca ni veika sa cakava tiko o koya.

⁸"Dou lako cake ki na Solevu, Au na sega, baleta ni se sega ni yaco taucoko mai na Noqu gauna."

⁹Ni sa tukuna oti na veika oqo vei iratou na tacina, sa tiko ga e Kaleli o Koya.

¹⁰Ena gauna e ratou sa lako cake kina na tacina, sa lako cake vakavuni talega o Jisu ki na Solevu, sa sega ni vakaraitaki Koya.

¹¹Era sa vakasaqarai Jisu ena solevu o ya o ira na Jiu, ka vakataroga tiko, "E vei o Koya?"

¹²Sa levu sara na veivosaki era sa cakava na tamata ena Vukuna. Era sa tukuna e so "Sa tamata vinaka o Koya," So tale era sa tukuna, e sega, e ca o Koya, sa dau vakaisini ira na tamata."

¹³Sa sega ga ni dua e vosa ena matana votu me baleti Jisu, ni ra sa rerevaki ira na Jiu.

¹⁴Ni sa vakacagau tiko na soqo, sa lako cake ki na valenisoro o Jisu ka vakatavuvuli.

¹⁵Era sa qoroqoro ka tukuna mai, "Sa kila vakacava o Koya na i Vola Tabu, ni sa sega ni vulica?"

¹⁶Sa sauma vei ira o Jisu ka vaka, "Na i vakavuvuli sa sega ni Noqu, sa nei Koya sa talai Au mai.

¹⁷"Kevaka e dua sa via muria na Lomai Tamaqu, ena kila na vei ka baleta nai vakavuvuli, se sa mai vua na Kalou, se mai na Noqu kaukauwa ga.

¹⁸"O koya sa vosa ena vukuna ga, sa vakasaqara ga na nona dokai, ia o koya e vakasaqara na dokai i Koya sa veitalai mai sa qai dina, sa sega sara vua na veivukiyaki!

¹⁹"Sa sega beka ni solia vei kemuni nai vunau o Mosese, ia, sa sega sara vei kemuni sa maroroya nai vunau? Na cava o ni sa via vakamatei Au kina?"

²⁰Era sa vosa mai na tamata ka vaka: "Sa tiko vei iko na tevoro, "O cei sa vinakata me vakamatei iko?

²¹Sa sauma vei ira o Jisu, "Au cakava e dua ga na ka, o ni sa qoroqoro kina.

²²"Sa cakava vei kemuni o Mosese na veicilivi, (na veicilivi oqo sa mai vei ira na qase) ia, o iko sa cakava na veicilivi ena siga ni vakacecegu.

²³"Kevaka e dua sa cakava na veicilivi ena siga ni vakacecegu me kua ni voroki kina na i vunau i Mosese, o ni sa cudruvi Au baleta Ni'u sa vakataucokotaka e dua na tamata ena siga ni vakacecegu.

²⁴"Mo ni kua ni via vakalewa me vaka ga na kenai rairai, mo ni lewa ena vakalelewa e dodonu."

²⁵Eso vei ira e Jerusalemi era sa taroga, "Sa sega beka ni o Koya ga oqo, era sa vakasaqara tiko me ra vakamatea?"

²⁶"Ni raica mada, sa vosa dina tiko vakadoudou ka ra sa sega ni rawa ni tukuna e dua na ka vua. Era sa kila tiko beka na veiliutaki ni sai Koya dina oqo na Karisito?

²⁷"Eda sa kila se sa lako mai vei o Koya oqo, ni sa lako mai na Karisito, ena sega ni dua e kila se sa lako mai vei."

²⁸Sa kaci vakadomoi levu o Jisu ni sa veivakavulici tiko ena valenisoro ka vaka: "O ni sa kilai Au, ka sa kila talega na vanua Au sa lako mai kina; Au sa sega talega ni lako mai vakai Au ga, o Koya sa talai Au mai sa Dina, o Koya dou sa sega ni kila?

²⁹"Au sa kilai koya, Ni'u sa lako mai Vua, ka sa talai Au mai o Koya."

³⁰Era sa vinakata me vesuki Koya, ia, sa sega ga e via tarai Koya, ni se bera ni yaco mai na Nona gauna.

³¹Sa levu talega na tamata era sa vakabauti Koya, ka tukuna, "Ni sa lako mai na Karisito, ena cakava na veika lelevu mai na veika sa cakava na Tamata oqo.

³²Era sa rogoca na Farisi ni ra sa vosa kudrukudru tiko na lewe ni vanua ena vuku i Jisu, era sa vakatala sara yani eso na tamata me ra vesuki Koya.

³³Sa tukuna vei ira o Jisu, "Au na tiko vata kei kemudou vakalailai ga, Au na qai lako tale vei koya sa talai Au mai.

³⁴"O ni na vakasaqarai Au, o ni na sega ni kunei Au, na vanua Au na lako kina, o ni na sega ni lako rawa yani kina.

³⁵Era sa veivosaki vakai ira na Jiu ka vaka: "Sa via lako tiko ki vei o Koya “ meda sega kina ni lako rawa vua? Sa via lako beka vei ira na veiseyaki ki Kirisi, me la'ki vakavulici ira na kai Kirisi?

³⁶"Na cava oqo, ni sa tukuna tikoga, o ni na vakasaqarai Au, ia, o ni na sega ni lako rawa mai ena vanua Au sa tiko kina?"

³⁷Ena i otioti ni siga ni solevu, sa tucake o Jisu ka kacivaka yani, "Kevaka e dua sa via gunu me lako mai ka gunu.

³⁸"O koya sa vakabauti Au, me vaka sa tukuna na i Vola Tabu, ena tovure mai yalona na vei uciwai ni bula."

³⁹Sa tukuna tiko oqo o Jisu na veika me baleta na Yalo Tabu vei ira era sa vakabauti Koya, ni se bera tiko ni yaco mai na Yalo Tabu, ni se tiko oqo o Jisu ka e se bera ni kau cake.

⁴⁰Era sa lewevuqa, ni ra sa rogoca na vosa i Jisu, era sa tukuna, "sa dina, sa Parofita o Koya oqo."

⁴¹Era sa tukuna talega eso, "O Koya oqo na Karisito," era sa tukuna talega eso, "Me lako li mai Kaleli na Karisito?"

⁴²"Sa sega li ni tukuna na i Vola Tabu, ni na lako mai na Karisito mai vei Tevita, mai Peceliema na vanua sa tiko kina o Tevita?"

⁴³Sa kune na duidui vei ira na tamata me baleti Jisu.

⁴⁴Sa so vei ira na Jiu, era sa via vesuki Jisu, ia, sa sega e via tarai koya.

⁴⁵Era sa lako mai na dauveiqaravi, "Kivei ira na bete levu kei ira na Farisi, "Ena cava o ni sa sega ni kauti Koya mai kina?" Sa tarogi yani vei ira.

⁴⁶Era sa sauma mai na dauniveiqaravi, "Sa sega ni dua e vosa me vakataki Koya oqo!"

⁴⁷"O ni sa vakacalai talega ena vukuna?" Era sa taroga mai na Farisi.

⁴⁸"Sa dua beka na veiliutaki se na Farisi sa vakabauti koya?

⁴⁹Sa sega ni dua vei ira na lewevuqa sa kila ni sa cudruvi nai vunau.

⁵⁰O Nikotimo, e dua sa lako mai vei Jisu ena bogi, sa dua talega vei ira na Farisi, sa tukuna yani,

⁵¹"Sa lewai beka e dua ena i vunau, ni bera ni rogoci o koya, me kilai kina na ka e cakava?"

⁵²Era sa sauma ka tukuna vua, "O iko talega mai Kaleli? Vakasaqara mada mo raica, ni sa sega na parofita e basika mai Kaleli."

⁵³Era sa dui lesu tale ki na nodra veivale na tamata.