[6] Josua 18

¹Era sa soqoni vata nai soqosoqo levu ni luvei Isireli e Sailo, ka vakaduria na vale vakacevaceva ni bose, ka sa tu na vanua e matadra.

²Ia, sa vo tiko vei ira na luvei Isireli e vitu na yavusa, era sa bera ni taura na nodra i votavota vanua.

³Sa tukuna o Josua vei ira na luvei Isireli: "Me cava soti na kena dede, dou wele tiko kina, mo dou lako cake ka taukena na vanua sa solia na Kalou o Jiova ni nomuni qase.

⁴"Me digitaki mai e tolu na tagane mai na tolu na yavusa, me'u talai ira; me ra tucake ka lakova na vanua, vakaraica vinaka me vaka na veiwasei sa oti, ka lesu mai vei au.

⁵"Me ra qai wasea vakavitu, o Juta me tiko ga mai na ceva kei ira na luvei Joseva me ra tiko ga mai na vualiku.

⁶"Mo ni qai vakaraica vinaka na vanua ena kena i wasewase e vitu, ka kauta mai vei au oqori, me'u viritaka kina na madigi eke ena vukumudou vua na noda Kalou o Jiova.

⁷"O ira na Livai sa sega ni vakaivotavota vata kei kemuni, sa nodra i votavota ga na cakacaka vakabete vei Jiova. O Kata kei Rupeni kei na veimama ni yavusa o Manasa era sa taura na nodra i votavota ena tai kadua ni Joritani, ena tokalau, me vaka sa solia vei ira o Mosese nai talai ni Kalou."

⁸Era sa tucake na tamata ka lako yani; sa vakaroti ira o Josua vei ira na laki yamata ka vaka, "Dou lako, ka laki butuka na vanua, ka vakaraica vinaka, ka lesu mai vei au ka me'u vakawiri madigi ena vukudra ena mata ni Kalou e Sailo."

⁹Era sa lako na tamata ka lako curuma na vanua kecega ka vola na ka era sa raica ena i vola wasei vakavitu na kena veikoro lelevu; era sa lesu mai vei Josua ena i tikotiko e Sailo.

¹⁰Sa cakava o Josua na vakawirimadigi ena vukudra e Sailo ena matai Jiova, e kea talega sa wasea kina o Josua na vanua ki vei ira na luvei Isireli me vaka na nodra dui wasewase.

¹¹Na nodra i wasewase na yavusa ni luvei Penijamini sa lako mai me vaka na nodra veivuvale, na yasana sa wasei, sa tiko ena kedra veimama o Juta kei Joseva.

¹²Nai yalayala mai na vualiku, sa tekivu ena Joritani, ka lako cake vaka ki Jeriko, ka lakova cake na veiulunivanua vaka ki na ra: me yacova na Vanua Liwa o Beci “ Aveni.

¹³Sa lako mai kea nai yalayala ki Lasei kei Peceli ena ceva; sa lako mai kea ki Ataroci Ada, volekata na veidelana sa davo toka mai na ceva kei Beci “ Oroni.

¹⁴Sa qai toso tale yani nai yalayala mai na ra ki na ceva, mai na veidelana kei Beci “ Oroni mai na ceva; ka laki cava ki Kirijaci Pealina (koya o ya o Kirijaci Jerimi) nodra koro levu na luvei Juta. Oqo ena yasayasa vaka ra.

¹⁵Mai na ceva sa tekivu ena i cavacava kei Kirijaci Peali ena i yalayala toso yani kina ra ka lako sara yani ki na i vurevure ni wai mai Nefatoa.

¹⁶Sa lako sobu mai nai yalayala ena i cavacava ni veidelana sa davo toka ena Buca ni luvei Inomi, na buca sa tiko ena Buca kei Refaimi ena vualiku, ka lako sobu ki na Buca o Inomi, ena yasadra na Jepusaiti na koro ena ceva ka gole sobu ki Ena “ Rokeli.

¹⁷Sa lako wavoki mai na vualiku, ka lako yani ki Ena“Semesi ka vakuria me donui Qeliloci sa tiko ena matani Delana o Adumimi ka lako sobu ki na vatu mai Boani na luvei Rupeni tagane.

¹⁸Sa lako sara yani vaka ki na vualiku kei Araba ka lako sobu mai ki Araba.

¹⁹Nai yalayala ni vanua sa cici vaka ki na yasana e cake kei Beci “ Okila ka qai mai cava ena yasana e cake ni wasawasa masima, ena yasana sara e ra ni Joritani. Oqo nai yalayala mai na ceva.

²⁰Sa kenai yalayala na Joritani ena tokalau. Oqo na nodra i votavota na luvei Penijamini, me vaka na kena i wasewase kece, me vaka na nodra veivuvale.

²¹Oqo na veikoro lelevu nodra na luvei Penijamini me vaka na nodra veivuvale, o Jeriko, o Beci “ Okila, o Ameke “ Kesisi,

²²O Beci “ Araba, o Semaraimi, o Peceli,

²³O Arimi, Para, Ofara,

²⁴O Kifa, o Aemoni, o Ofina kei Kaba, e tinikarua na koro lelevu kei na kena lalai;

²⁵O Kipioni, o Rama, o Bieroci,

²⁶O Misapa, o Jefira, o Mosa,

²⁷Rikemi, OIripeli, o Tarala,

²⁸O Sela, o Elefa, o Jebusu (Jerusalemi) o Kibeaci, kei Kirijaci, e tini ka va na koro lelevu kei na koro lalai. Oqo na nodra i votavota na luvei Penijamini me vaka na nodra veivuvale.