[65] Juta 1

¹O Juta, na i talatala i Jisu Karisito, ka taci Jemesa, vei ira sa kacivi, ka vakasavasavataki mai vua na Kalou na tamada, ka maroroi mai vei Jisu Karisito.

²Me vakalevutaki vei kemudou na yalololoma, na vakacegu, kei na loloma.

³Oi kemudou sa lomani, au sa saga vakaukauwa me'u vola vei kemudou ena vuku ni bula sa noda kecega, ka au raica ni vinaka cake na noqu via volavola vei kemudou, mo dou marautaka ka vakacegui ga ena vakabauta sa soli vei ira sa lotu.

⁴Ni sa curu lo mai na tamata eso ka sega ni kilai, ni ra sa vakadinadinataki mai liu ena nodra bula, ka era sega ni lotu, ka era vukica vakatani na loloma ni Kalou mera cakava na ka vakasisila, ka cakitaki Jiova na Kalou duadua ga kei na noda Turaga o Jisu Karisito.

⁵Ia au vinakata me'u vakananumi kemudou kina, e dina ni dou sa kila, ni sa vakabulai ira na tamata mai Ijipita o Jiova, e qai vakamatei ira na sega ni vakabauta.

⁶O ira na agilosi era sega ni dei ena nodra i tutu dina, ia ka ra biuta mai na nodra i tikotiko, ka sa vakarautaki tu vei ira na sinucodo ni veivakararawataki ena vanua butobuto, ka me yaco mada na siga ni lewa.

⁷Sa vaka kina o Sotoma kei Komora kei ira na veikoro volivolita “ ni ra sa soli ira ki na veidauci vakaveitalia kei na veiyago vata, oqo sai vakaraitaki ni rarawa levu kei na veivakararawataki ni bukawaqa e sega ni mudu.

⁸Sa vaka kina o ira na dautatadra ka dauvakadukadukalitaka tiko na yagodra, ka ra beca na veiliutaki, ka era vosa vakacacataki ira na turaga.

⁹Io, o Maikeli na agilosi uasivi, e veileti kei na tevoro, ka veiletitaka na yagoi Mosese, sa sega ni doudou me vosavakacacataki koya, ka vaka, "me cudruvi iko o Jiova!"

¹⁰Ia o ira oqo era vosacataka na ka era sega tu ni kila; na ka era sa kila tu, era tautauvata tu ga kei na manumanu kila rerevaki, era sa vakarusai ira tikoga vaka i ira.

¹¹Ena ca vei ira! Ni ra sa muria nai valavala i Keni, era kocova na i yau me vakataki Pelami, ka ra na mate me vaka na talaidredre nodra na luve i Kora.

¹²Oqo na lewa ena basika ena nomudou kana magiti, era na sega ni rere nira kana vata kei kemudou, era na nanumi ira ga ni ra sa kana. Era na vaka na o ka sega na kena uca, era na dau veitosoyaki tu ga vaka na cagi; era vaka na vuni kau tubu vinaka ka sega tu ni dua na vuana, era mate vakarua, na wakadra e cavuraki laivi;

¹³Na kaukauwa ni ua ni wasawasa, e vakavotua cake na ka mera na madua kina; na kalokalo dau veitosoyaki sa waraki ira tu, me na vakacilava vei ira na butobuto loaloa e sega ni mudu.

¹⁴O Inoke, nai kavitu ni taba tamata mai vei Atama, ka e parofisaitaka talega na nodra bula na tamata oqo, ka vaka, raica, o Jiova sa lako vata mai kei ira na tini na udolu na yalosavasava.

¹⁵"Me ia na veicudruvi vei ira kecega, ka me na lewai ira na sega ni lotu, ena nodra i valavala era vakayacora ka sega ni Vakalou, kei na veivosa ca kece era tukuna Vua, o ira era sa sega ni kila na Kalou."

¹⁶Sai ira oqo na dauvosakudrukudru, ka dauvakaduiduile, ka dau muria na gagadre ca ni yagodra; kei na gusudra edau cavuta na veivosa veibeci lelevu, ka vakarokoroko veivakaisini vei ira na tamata, me ra veirawai kina.

¹⁷Ia, oi kemudou, sa lomani, dou nanuma na vosa era cavuta nai apositolo ni noda Turaga o Jisu Karisito:

¹⁸Ni ra sa tukuna vei kemudou, ni na so na dauveivakasesewani ena i vakataotioti ni gauna oqo, era na dau vakaivalavalataki ira ena dodoma ca vakasisila.

¹⁹Sai ira oqo na dau taleitaka na marau vakavuravura, ka era dau vakavu veisei, ka sa sega ni tu vei ira na Yalo Tabu.

²⁰Ia, oi kemudou, sa lomani, dou vei vakatataki cake vakai kemudou ena nomudou tara cake na vakabauta, mo dou masu tiko ena Yalo Tabu.

²¹Dou maroroi kemudou mo dou tuga ena loloma ni Kalou, ka raica na loloma ni noda Turaga o Jisu Karisito, ena vuku ni bula Sega ni mudu.

²²Dou lomani ira na tamata, ka me kune na kena duidui.

²³Ia eso, ena nodra rere, ni sa vakarau tarai ira na yameyame ni buka, ka ra luvata tani nai sulu ka vakavuna tiko nodra leqa.

²⁴Vei koya ga sa rawata me maroroi kemudou mai na nomudou bale sobu, me vakaraitaki kemudou talega e matana vakaiukuuku, ena marau vakaidina sara ni dou sa sega ni cala.

²⁵Me ia vua na Kalou na noda i vakabula, o koya duadua ga na vuni vuku, me nona na dokai kei na vakarokoroko, na lewa kei na kaukauwa ena gauna sa oti, e daidai, ka sega ni mudu. Emeni.