[42] Luke 18

¹A sa vosataka vei ira e dua na vosa vakatautauvata, ka baleta tiko meda kakua ni dau guce ena masu,

²Sa tukuna: "Ena dua na koro e tiko kina e dua na turaga ni lewa, ka sega ni bau rerevaka na Kalou se me dokai ira na tamata.

³A sa tiko ena koro o ya e dua na yada; a sa lako tikoga mai vua, ka tukuna, mo ni dikeva tale mada na kisi kei koya keirau veilewai tiko.

⁴A sa bese mada ni cakava kina e dua na ka; ia sa qai tukuna tale o koya, e lomana, oi au e sega ni dua na tamata me'u doka se me'u rerevaka na Kalou,

⁵"Ia ni sa mai vakasosataki au tikoga na yada oqo au sa na cakava kina e dua na ka, baleta ni sa mai vakaocai au ena vuku ni nona lako tikoga mai."

⁶Sa qai tukuna na Turaga, dou sa rogoca na vosa e tukuna na turaga ni lewa sega ni dodonu o ya.

⁷Me qai rawa vakacava vua na Kalou oqo, me sogota na qara ni daligana vei ira na Nona digitaki ena nodra masuti koya siga kei na bogi, ena rawa li vua me vakaberaberataka?

⁸"Au tukuna vei kemudou ena saga o koya e dua na gaunisala totolo mena sotavi kina. Ia na taro oqo, vakacava na gauna ena lesu tale mai kina na luve ni tamata, ena kunea beka na vakabauta e vuravura se sega?"

⁹A sa tukuna talega o koya na vosa vakatautauvata oqo, ni so e ra sa vakadonui ira sara tu ga ena ka era cakava, ka ra sa qai dau raici ira sobu kina eso:

¹⁰E lewe rua na tamata e rau sa lako cake kina vale ni soro me masu, e dua na farisi ka dua na daukumuni vakacavacava.

¹¹A sa tucake tu na farisi ena dokadoka ka vaka oqo na nona qaqa ni masu, na Kalou, au vakavinavinakataki iko ni'u sega ni tautauvata kei ira na tamata era tu mai kea, era daubutabutako, era dau veivakaisini, era dauveibutakoci se me'u vakataki koya na daukumuni vakacavacava ka tu oqo.

¹²Au dau lolo vakarua ena veimacawa; au dau solia nai katini ni veika kecega au rawata.

¹³Ia o koya na daukumuni vakacavacava sa tucake tu ga mai vakayawa, ka sa dredre mada ga vua me tacake na matana ki lomalagi, a sa tavia na lomaserena, ka tukuna vaka oqo ne, kemuni na Kalou, oi au na tamata i valavala ca, au kerea mo ni lomani au mai!'

¹⁴"Au tukuna vei kemudou, na tamata oqo ni sa lako e nodratou sa lako ena yalo e galala ni sa vakadonui, mai vei koya na kena i karua; ke dua sa laveti koya cake ena vakamalumalumutaki sobu, ia ke dua sa vakamalumalutaki koya sobu ena laveti cake."

¹⁵A ra sa kauta talega mai Vua na gone lalai me bau tarai ira o koya; ia ni ratou sa raica na tisaipeli na ka oqo e ratou sa vunauci ira.

¹⁶Ia sa kacivi iratou mai vua o Jisu, ka tukuna, dou laivi ira na gone lalai me ra lako mai vei au, dou kakua ni tarovi ira; ni o ira na lewe ni matanitu ni Kalou sa vaka na gone lalai.

¹⁷Au tukuna vei kemudou na ka dina, ke dua e sega ni tu vua na yalo me vaka na yalo ni gone ena dredre me curuma na matanitu ni Kalou."

¹⁸A sa tarogi koya e dua nai liuliu, ka tukuna, "Oi kemuni na qasenivuli uasivi, a cava me'u cakava me'u rawata kina na bula Sega ni mudu?"

¹⁹Sa tukuna vua o Jisu, cava beka o tukuna kina ni'u sa rui uasivi? Ni sega tale ni dua e uasivi, ia e dua ga, sai koya na Kalou.

²⁰"O iko sa kila vinaka nai vunau: mo kakua ni veibutakoci, mo kakua ni laba, mo kakua ni butako, mo kakua ni lasulasu, mo dokai rau na tamamu kei na tinamu."

²¹A sa tukuna o koya, "Mai na gauna ni noqu gone ka yacova mai oqo, na veika kece oqo au muria vinaka tu mai."

²²Ni sa rogoca o Jisu na nona vosa, sa tukuna vua, e dua walega na ka o se bera ni o cakava tiko. Mo volitaka kece na ka o taukena ka wasea vei ira na dravudravua na kena i lavo, o sa na qai vakaiyau kina mai lomalagi; ka oti mo lako mai, ka muri Au."

²³Ia ni sa rogoca o koya na vosa oqo, sa lomabibi vakalevu, ni sa tamata vutuniyau.

²⁴Ni sa raica o Jisu ni sa rui lomabibi vakalevu, sa tukuna, "O ira na vutuniyau sa bau dredre toka vei ira mera curu kina matanitu ni Kalou!

²⁵"Sa rawarawa cake vua na kameli me curuma na mata ni i cula, mai vei koya na vutuniyau me curu kina matanitu ni Kalou."

²⁶O ira sa rogoca na vosa sa tukuni oqo, era sa tukuna, "Kevaka sa vaka tu o ya, o cei beka sa na qai bula rawa?

²⁷Ia sa tukuna o koya, "Na ka sa dredre vua na tamata sa rawa vua na Kalou."

²⁸Sa qai tukuna o Pita, "Raica, keitou sa biuta laivi na veika kece ka muri Kemuni."

²⁹A sa tukuna vei iratou o koya, Au tukuna vei kemudou na ka dina, kevaka e dua me vakataki kemudou me biuta na nona vale, na nonai tubutubu, o ira na tacina se watina se luvena, ena vuku ni matanitu ni Kalou,

³⁰"E sa na sega ni taqea rawa na veivakasaututaki ni Kalou vua ena bula mada ga oqo, e sa na qai duatani sara na bula sa bera mai, oqori na bula sega ni mudu."

³¹Sa qai kauti iratou na lewe tinikarua vakatikitiki, ka tukuna vei iratou, "Ka raica, edatou sa na lako ki Jerusalemi, na veika kece era vola na parofita, me baleti Koya na luve ni tamata ena vakayacori taucoko.

³²Ena soli yani o koya vei ira na kai matanitu tani, era na qai vakalialia Koya, era na vakadredrevaka ka kasiviti Koya.

³³"Era na vakanakuitataka ka vakamatea. Ena i katolu ni siga ena qai tucake tale mai.

³⁴Ia na veika oqo era lecaikataka; ni ra sa sega ni kila na ka sa cavuti ni sa sesewa vei ira.

³⁵A sa lako o koya ki Jeriko ni sa volekata yani na koro, a sa dua na tamata mataboko sa dabe ena bati ni sala me dau kerekere.

³⁶Ena nona sa rogoci ira na lewe vuqa nira sa lako tiko, sa taroga se cava sa yaco.

³⁷A ra sa tukuna vua ni o Jisu na kai Nasareci sa lako tiko o ya.

³⁸Sa qai kaci yani o koya, ka vaka, "I Jisu, na luve i Tevita, mo ni yalololoma mai vei au!"

³⁹A ra sa karalaki koya mai o ira sa taubale tiko e liu vua, me galu na gusuna ka tiko lo; ia sa qai tosoa cake ga o koya na domona, "Na luvei Tevita, ni yalololoma mai vei au!"

⁴⁰A sa tu vakadua o Jisu ka vakarota yani me kau mai Vua. Ni sa volekati Koya mai, sa taroga,

⁴¹ka vaka, "A cava o vinakata vei Au me'u cakava vei iko?" sa tukuna o koya, "Turaga, o au me rai ga na mataqu."

⁴²A sa tukuna vei koya o Jisu, "Me rai na matamu; na nomu vakabauta sa vakabulai iko."

⁴³Vakasauri sa rai na matana, ka sa muri Koya sara, ka vakalagilagia na Kalou. O ira taucoko na tamata ni ra sa raica na veika sa yaco, a ra sa vakavinavinaka vua na Kalou.