[42] Luke 19

¹A sa lako curumi Jeriko o Jisu.

²Ka raica, sa dua na vutuniyau ka nodra i liuliu na daukumuni vakacavacava na yaca ni tamata oqo o Sakiusa.

³A sa via raici Jisu se tamata vakacava o koya, ia sa dredre ni raica ena vukudra na lewe vuqa, ni sa rui tamata lekaleka.

⁴Sa qai ciciva yani e dua na vuni lolo ka tu sara mai liu, sa kabata cake me rawa ni raici Koya kina, ni na lakova mai na vanua o ya o koya.

⁵Ia ni sa donuya mai na vanua o ya o Jisu, a sa rai i cake, ka raici koya, ka tukuna vua, "I Sakiusa, mo siro sobu mai vakatotolo i ra qo, e daidai Au na tiko kina ena nomu vale."

⁶A sa siro sobu mai vakatotolo era o koya, ka ciqomi Koya ena yalo e reki.

⁷Ia ni ra sa raica, era sa vosavakacacataka kece, ka vaka, "A sa lako o koya vua e dua na tamata i valavala ca me la'ki nona vulagi."

⁸A sa tucake o Sakiusa ka tukuna vua na Turaga, "Ni raica, Turaga, e veimama ni noqu i yau au solia vei ira na dravudravua; kevaka au taura vakatawa dodonu na nonai yau e dua tale, e sa na sega ni caka rawa na i yau au taukena."

⁹A sa tukuna vua o Jisu, e daidai sa yaco na bula ena vuvale oqo, baleta o koya talega sa luvei Eparama;

¹⁰"ni sa lako mai na luve ni tamata me vakasaqara ka vakabulai koya na tamata sa yali tu."

¹¹Ni ra sa rogoca na veika oqo, sa vosataka tale o koya e dua na vosavakatautauvata, baleta ni sa toro volekati Jerusalemi yani o koya, a ra sa nanuma kina ni na yaco mai vakasauri na matanitu ni Kalou.

¹²O koya oqo sa tukuna kina o koya: a sa dua na turaga sa lako kina dua na vanua vakayawa, me la'ki vakayacori vua na veibuli me dua na tui o koya ka oti me lesu tale mai.

¹³"A sa kacivi ira mai e lewe tini na nona dauveiqaravi, ka solia vei ira yadua e tini na paudi, ka tukuna vei ira, dou cakava kina na nomudou bisinisi me yacova na noqu lesu mai.

¹⁴Ia era sa sega ni taleitaki koya o ira na nona lewe ni vanua, ka ra tala e dua na mata me la'ki tukuna vua, ni ra sega ni taleitaki koya me nodra tui.

¹⁵Ni sa lesu mai ni oti na veibuli vaka tui vua, a sa vakarota me ratou kau mai vua oiratou na dauveiqaravi ka solia kina o koya nai lavo se ratou sa cakacakataka se sega.

¹⁶"A sa lako mai na kenai matai, ka tukuna, noqu turaga na nomu i lavo sa rawa tale mai kina e tini na paudi.

¹⁷Sa tukuna vua o koya, "Vinaka vakalevu, o iko na dauveiqaravi vinaka, ena vuku ni nomu yalodina ena veika lalai, mo lewa e tini na koro lelevu.

¹⁸A sa lako mai na kena i karua, ka tukuna, noqu turaga, na nomu i lavo sa rawata tale mai e lima na paudi.

¹⁹"Sa tukuna talega vua o koya, mo lewa e lima na koro lelevu.

²⁰A sa lako tale mai e dua, ka tukuna vua, noqu turaga, oqo na nomu i lavo ka'u maroroya vinaka ena noqu ologa ena i tavoi.

²¹Ni'u a rerevaki kemuni, ni o ni sa rui tamata lomaqa. Ka o ni mai taura na ka o ni sega ni biuta tu, ka tamusuka na ka o ni sega ni kaburaka.

²²"A sa qai tukuna vua o koya, na ka o cavuta mai e gusumu au na lewai iko kina, tamata viavialevu o iko. Ni o sa kila ni'u tamata lomaqa ka'u taura na ka au sega ni biuta tu, ka'u tamusuka na ka au sega ni kaburaka.

²³Na cava o sega ni vakacuruma kina na noqu i lavo ena baqe, me'u na taura kina eso na kena tubu ni'u sa lesu mai oqo?'

²⁴Sa qai vuki yani o koya vei ira sa wavu voleka tu, ka tukuna, dou taura tani mai vua nai lavo, ka solia vei koya sa tini na paudi sa tiko rawa vua.

²⁵("Ia era sa tukuna vua, kemuni saka turaga, e tini na paudi sa tu vua.)

²⁶Ka'u tukuna vei kemudou, o koya sa tu rawa vua na ka ena soli tale vua na ka; ia vei koya e sega ni tu vua, na ka sa bau toka rawa vua ena kautani tale mai vua.

²⁷Ia dou kauti ira mai kike na kequ meca ka ra sega ni taleitaka na noqu i tutu vaka tui, dou vakamatei ira eke e mataqu."

²⁸Ni sa vosataka oti na veika oqo, sa qai tomana tale na Nona i lakolako cake ki Jerusalemi.

²⁹Ni sa volekata mai o koya na koro o Pecivaki kei Pecani ena ulunivanua sa vakatokai na veiolive, sa qai vakatala e lewe rua na Nona tisaipeli,

³⁰Sa tukuna vei rau, drau lako kina koro sa tu mai oqori, ni drau sa curu kina drau na raica e dua na luve ni asa ni vesu tu, ka se sega ni bau dua me vodoka. Drau sereka ka kauta mai eke.

³¹"Kevaka e dua sa tarogi kemudrau, a cava drau sa sereka kina? Drau tukuna vua na vosa oqo, baleta na Turaga sa gadreva me vakayagataki mada."

³²A rau sa lako na lewe rua oqo, ka sotava sara ga na kece a sa tukuni mai vei rau.

³³Ia ni rau se qai tekivu me sereka tiko na luve ni asa, sa tarogi rau mai na kena i taukei, ka vaka, "A cava drau sereka tiko kina na luve ni asa oqori?"

³⁴A rau sa tukuna, na Turaga sa gadreva me vakayagataka mada."

³⁵Rau sa qai kauta mai vei Jisu. E ratou sa tevuka na nodratou dui sulu ena dela ni asa, ka ratou vakadaberi Jisu yani kina.

³⁶Ia ni sa lako yani o koya, e lewe vuqa sa tevuka na nodra i sulu e gaunisala.

³⁷Ni sa volekata yani o koya na gaunisala kina ulunivanua ni veiolive, a ra sa kailavaka mai ena domo ni reki na lewe vuqa ena nodra vakavinavinakataka na Kalou, ena vuku ni cakacaka veivakurabuitaki era sa raica.

³⁸Era kailavaka vaka oqo: 'Eda sa kalouvinaka ni sa solia mai vei keda na Kalou e dua na tui, me bula balavu na tui! Me reki o lomalagi, ka me vakarokorokotaki o koya sa tiko ecake sara!"

³⁹Sa so vei ira na farisi ka ra tu maliwai ira na lewe vuqa era sa kailavaka mai vua, "Qasenivuli, mo vunauci ira mada na Nomu tisaipeli ena vuku ni vosa era cavuta tiko."

⁴⁰Ia sa tukuna mai o koya vei ira, Au tukuna vei kemudou kevaka mera galuvaka o ira oqo, ena sega ni bera na nodra sa na kailavaka mai na veivatu era tu oqo."

⁴¹Ni sa volekata yani o koya, a sa raica na koro levu oqo ka sa tagicaka,

⁴²Sa cavuta kina, isa ke mo a kila mada ga ni oqo na siga ni bula vei iko! Ia sa bera ena vuku ni nomudou lecaika.

⁴³Ena yaco mai na gauna mera na vakacibi i valu wavoliti iko kina o ira na kemu meca, era na mai vakacibi i valu wavoliti iko me ra sogolati iko mai na veiyasana kecega,

⁴⁴"Era na yanaraki kemudou kei ira na luvemudou kina qele; ena sega mada ga ni dua na vatu me duri tale e matadra ni ra sa lako mai, baleta na nomudou lecaika taka na gauna ni bula sa solia vei kemudou na Kalou."

⁴⁵A sa lako o koya kina loma ni vale ni soro, ka cemuri ira tani na veivoli tu e loma,

⁴⁶Sa tukuna vei ira, "Sa volai, na Noqu vale sa vale ni masu, ia oi kemudou dou sa mai vukica me nodra qara na daubutako."

⁴⁷Ena veisiga sa dau vakatatavuvuli o koya ena vale ni soro. Ia era sa segata kina o ira na bete levu, o ira na daunivolatabu, kei ira nai liuliu vakavanua mera vakamatei Koya,

⁴⁸A ra sa sega ni cakava rawa e dua na ka Vua; ni ra sa cibitaki koya kecega na tamata ka ra via rogoca tiko na nonai vakavuvuli.