[42] Luke 23

¹A ra sa cavu tu kecega na lewe vuqa ka kauti Koya yani kivei Pailato.

²Ka ra sa tekivu beitaki Koya, ka vaka, "Keimami sa kunea na tamata oqo ni vakacalai ira tiko na lewe ni vanua, sa tarova me kua ni soli vei Sisa nai vakacavacava, sa tukuna, ni o Koya na Karisito, ka tui."

³Sa tarogi Koya o Pailato, ka vaka, "O iko na nodra tui na Jiu?" Sa sauma o koya ka vaka, "Io, sa dina na nomu vosa."

⁴Sa tukuna o Pailato vei ira na bete levu kei ira na lewe vuqa, "Sa sega ni dua na cala au kunea vua na tamata oqo."

⁵Ia era sa kailavaka vakaukauwa, ka vaka, sa dau vakavuna o koya na tiko yavavala ena veivanua kece e vakatavuvuli kina, oqo e wili kina na vanua vaka Jutia ka tekivu mai Kaleli ka yacovi Jerusalemi.

⁶Ni sa rogoci Kaleli o Pailato, sa taroga e kai Kaleli na tamata oqo.

⁷Ni sa taura rawa o koya ni kai Kaleli sa tukuna me kau sara vei Eroti, ni o Kaleli e tiko ena ruku ni veiliutaki nei Eroti, a sa tiko e Jerusalemi ena gauna o ya o Eroti.

⁸Sa dua na ka na levu ni marau nei Eroti ni sa qai raici Jisu rawa; ni sa dau gadreva voli mai ena dua na gauna balavu me bau raici Jisu mada, baleta na levu ni ka sa dau rogoca me baleti Koya, ka sa vakanuinui ni na raica mai vua eso na cakacaka veivakurabuitaki.

⁹Sa qai vakatarogi Koya ena vuqa na vei taro, ia sa sega ni sauma o koya e dua na taro.

¹⁰A ra sa tabalaka i cake na domodra ena nodra veibeitaki, o ira na bete levu kei ira na daunivolatabu.

¹¹Sa ra qai vaculaka ka vakasewasewana o ira na mata sotia nei Eroti, ka vakasulumi Koya ena dua nai sulu damudamu veiwaki, e ra sa qai vakasukai Koya lesu tale vei Pailato.

¹²Ena tiki ni siga o ya e rau sa qai veiyaloni kina o Pailato kei Eroti, nirau sa veimecaki tu mai e liu.

¹³A sa tu o Pailato ka kacivi ira vata mai na bete levu, na turaga, kei ira na lewe ni vanua,

¹⁴ka tukuna vei ira, dou sa kauta mai vei au na tamata oqo ni dou a beitaka ni vakacalai ira tiko na lewe ni vanua. Me'u tukuna vei kemuni ni'u sa tarogi Koya tiko e matamuni, ena cala dou beitaki Koya kina, ia sa sega ni cala na tamata oqo ena cala dou beitaki koya tiko kina.

¹⁵Sa vaka kina o Eroti, ni'u sa vakatalai Koya vua sa dikeva ka kunea, ni tamata oqo e sega ni cala ka sega ni dodonu me mate o koya.

¹⁶"O koya oqo ka'u sa na vakanakuitataka ga ka sereki Koya."

¹⁷(Ni sa dau kenai vakarau me dau sereka o koya e dua vei ira, ena siga ni solevu vaka oqo)

¹⁸Ia era sa kailavaka vata kece mai, ka vaka, me vakamatei na tamata oqori, o Parapa me sereki mai"“

¹⁹Ni a biu i valenivesu o koya ni a vakavuna e dua na vakacaca levu ena koro, ka laba talega.

²⁰A sa vinakata o Pailato me sereki Jisu, ka sa tukuna tale vei ira.

²¹Ia a ra sa tabalaka mai na domodra, ka vaka, "vakoti Koya kina kauveilatai, vakoti Koya kina kauveilatai!"

²²A sa tukuna tale vei ira o koya ena kena i katolu ni gauna, "E dua li na cala e a cakava o koya? Ni'u sa sega ni kunea e dua na vuna me mate kina. O koya oqo au sa na vakanakuitataka ga ka sereki Koya."

²³Ia sa qai toso cake tale na rogo levu ni nodra kailavaka mai me sa vakoti ga kina kauveilatai. A sa rogoci na nodra i le na bete levu kei ira na lewe ni vanua.

²⁴Sa vakatauca na nona lewa o Pailato me vaka na nodra kudru.

²⁵Me vaka na nodra i le, sa sereki mai kina na dauvakacaca ka laba, ena nona a curu tu ena vale ni veivesu; ia sa soli Jisu yani vei ira mera kitaka Vua na ka era sa vinakata.

²⁶Ni ra sa kauti Koya yani, era sa taura e dua na kai Kirini o Saimoni na yacana ka se qai lako tiko mai, ka ra vakataqara vua na bibi ni kauveilatai sa colata o Jisu.

²⁷A ra sa muri Koya e lewe vuqa na tamata, kei ira talega na yalewa ena nodra lolositaka kei na nodra tagicaka.

²⁸Ia sa vuki vei ira o Jisu, ka tukuna, "Kemudou na yalewa ni Jerusalemi, dou kakua ni tagicaki Au, ia dou tagicaki kemudou ga kei ira na luvemudou.

²⁹"Ni sa lako tiko mai oqo na siga, era na tukuna kina, sa kalouvinaka o ira na yava kei na kete, sa sega ni sucu mai kina na gone kei na sucu sa sega ni sucumi!"

³⁰Era na tukuna kina ulunivanua, "Ni lutuki keimami!" kina veidelana, "Ni ubi keimami!"

³¹"Kevaka sa vakayacori na veika vaka oqo vua e dua na kau bulabula vinaka, sa na wacava sara na veika ena vakayacori kina kau sa mate tu?"

³²E lewe rua na daubasulawa e kau vata talega kei Koya meratou la'ki vakamatei.

³³Ni ra sa yaco kina vanua sa vakatokai o Kalivari, e kea era sa vakoti koya kina, kei rau na daubasu lawa e dua ena ligana i matau ka dua ena ligana i mawi.

³⁴Sa qai tukuna o Jisu, "Tamaqu, ni vosoti ira, ni ra sa sega ni kila na ka era sa kitaka." A ra sa vakawiri madigitaka na nodra vota na nonai sulu.

³⁵A ra sa wavu tu na tamata ka sarava. Ia era sa vosa ka vakasewasewani Koya na turaga ni vanua, ka ra tukuna, "Sa la'ki vakabulai ira sara na tamata; kevaka e Karisito ka Nona digitaki na Kalou, me vakabulai Koya mada."

³⁶Era sa vakalialiai koya talega na sotia, ena nodra solia vua na waini gaga,

³⁷A ra sa tukuna, "Kevaka o iko na nodra tui na Jiu, mo vakabulai iko mada."

³⁸Sa vakoti ena uluna e cake e dua nai vakatakilakila ka volai tu ena vosa vaka Kiriki, vosa vaka Roma, kei na vosa vaka Iperiu: O Koya oqo na nodra tui na Jiu.

³⁹E dua vei rau na daubasulawa ka vakoti e yasana sa vosa beci Koya, sa tukuna, "kevaka o iko dina na Karisito, mo vakabulai iko kei keirau talega."

⁴⁰Ia sa vosa mai e dua tale vei rau, ka vunauci koya, ka vaka, o sega beka ni rerevaka na Kalou, ni kemu i totogi e mai wili talega kina o koya?

⁴¹"Ni oqo na kedaru i totogi ka veiganiti tukuna nai vakarau daru a cakava; ia na tamata oqo e sega sara ga ni dua na cala e a cakava."

⁴²Sa qai tukuna o koya vei Jisu, "Turaga, ni nanumi au ni kemuni sa lako mai ena nomuni matanitu."

⁴³A sa tukuna vua o Jisu, "Au sa tukuna vakaidina vei iko oqo, e daidai ga o na tiko kina vata kei Au mai Parataisi."

⁴⁴Ni sa ka ono mai ni auwa oqo, sa yaco e dua na butobuto ena vanua taucoko ka yacova nai kaciwa ni auwa.

⁴⁵Sa yali na rarama ni matanisiga, ka sa sei rua nai lati ni vale ni soro.

⁴⁶Sa qai kaci o Jisu ena domo levu, ka vaka, "Tamaqu, ki na ligamuni Au sa solia na yaloqu." Ni sa cavuta oti na vosa oqori, sa qai solia nai otioti ni Nona i cegu.

⁴⁷Ni sa raica na turaga ni valu na ka oqo, a sa vakarokorokotaka na Kalou, ka tukuna, "Sa tamata yalododonu dina ga na tamata oqo!"

⁴⁸O ira kece na lewe vuqa ka ra sarava tu na kece o ya, ni ra sa raica na veika sa yaco a ra sa tavia ga na lomaseredra ka lesu galugalu yani.

⁴⁹Ia o ira kece na Nona i tokani kei iratou na yalewa ka se muri Koya mai Kaleli, e ra sa tucake tuga mai vakayawa, ka vakaraica tu.

⁵⁰Ka raica, sa dua na tamata na yacana o Joseva, sa dua o koya na lewe ni mataveilewai vaka Jiu, ia sa tamata uasivi ka tamata dodonu.

⁵¹A sa sega ni duavata ena nodra i le kei nai vakarau era sa cakava. O koya na kai Aramacea ka dua na nodra koro na Jiu, o koya talega e dua sa waraka na matanitu ni Kalou.

⁵²Na tamata oqo sa lako vei Pailato ka kerea na yago i Jisu.

⁵³A sa kevutaka sobu mai, ka solega ena dua nai sole lineni ka la'ki maroroya ena dua na bulubulu qara vatu, ka se sega ni bau dua me bulu kina e liu.

⁵⁴O ya na siga ni vakarau, ka sa toro mai na siga ni vakacecegu.

⁵⁵O iratou na yalewa ka lako vata mai kei Koya mai Kaleli, e ratou sa muria ka raica nai bulubulu ena kena vakadavori na yagona.

⁵⁶A ratou sa qai lesu yani ka la'ki vakarautaka na i saluwaki boi totoka kei nai lumu talei sara. Ia me vaka nai vunau i Mosese e ratou sa vakacegu ena siga ni vakacecegu.