[42] Luke 24

¹Ia ni sa matai ni siga ni dua na macawa, ni se malamalawa na mataka o iratou kei na so tale na yalewa e ratou tiko vata, e ratou sa kauta mai nai saluwaki boi totoka e ratou sa vakarautaka kina i bulubulu.

²Ia e ratou sa raica na vatu ni sa vaqiqici tani mai nai bulubulu.

³A ratou sa curu ki loma ka sega ni kunea na yago ni Turaga o Jisu.

⁴A ratou sa kidrowataka sara vakalevu na ka oqo, ka raica, e lewe rua na tamata sa tucake tu e yasadratou ena i sulu lumilunisa.

⁵E ratou sa rere ka vakacuva na matadratou ki na qele, e rau sa tukuna vei iratou, a cava dou mai vakasaqarai Koya sa bula ena kedra maliwa na mate?

⁶"Sa sega eke o Koya, ia sa tucake tale! Dou nanuma na Nona a tukuna vei kemudou ni se tiko mai Kaleli,

⁷"Ni sa tukuna, na luve ni tamata ena soli yani vei ira na tamata i valavala ca, ka na vakoti kina kauveilatai, ena i katolu ni siga ena tucake tale."

⁸A ratou sa qai nanuma na Nona vosa.

⁹E ratou sa lako tani mai ena i bulubulu ka tukuna na veika kece oqo, vei ira na lewe tinikadua kei ira na kena vo tale.

¹⁰O Meri Makitalena, Joana, Meri na tinai Jemesa kei na so tale na yalewa, sa i iratou oqo sa tukuna na veika sa yaco vei ira nai apositolo.

¹¹Na nodra rogoca na nodratou vosa na yalewa oqo vei ira, e vaka e dua nai talanoa ucu mai duru vei ira, a ra sa sega kina ni via vakadinata.

¹²Ia sa tucake o Pita ka cici kina i bulubulu; ni sa cuva sobu ira sa raica nai sole lineni ni sa davo duadua no ga; ka sa lesu tale yani ka kurabui ena vuku ni ka sa yaco.

¹³Ka raica, ena siga tikoga o ya e lewe rua vei iratou sa taubale kina koro o Emeo, e vitu na maile ki Jerusalemi.

¹⁴Ka rau veitalanoataka na veika kece sa yaco.

¹⁵Ni rau se veitalanoa ka veiwaseitaka tiko sa toro mai e yasadrau o Jisu ka taubale vata kei rau.

¹⁶Ia na matadrau sa vakabuwawataki me rau sega kina ni kilai Koya.

¹⁷A sa tukuna vei rau, "Na mataqali veiwasei cava drau sa wasea tiko ni drau taubale ka luluvu?"

¹⁸E dua vei rau na yacana o Kaliovasa sa tukuna, ka vaka, o iko duadua beka ga o vulagi e Jerusalemi, ka ni o sega tu ni kila na ka e a yaco kina.

¹⁹A sa tukuna o Koya vei rau, "Na cava e yaco?" A rau sa tukuna vua, na veika me baleti Jisu na kai Nasareci, a parofita sa levu ena cakacaka kei na vosa ena mata ni Kalou kei ira kecega na tamata,

²⁰a ra sa qai soli Koya me vakamatei ena Nona lauvako ena kauveilatai, o ira na bete levu kei ira na neimami turaga.

²¹Ia keimami sa nuitaka tu ni o Koya ga ena vakabulai ira na Isireli. Ka sa yacova mai oqo nai ka tolu ni siga ena ka a vakayacori.

²²Ka so vei iratou na yalewa vei keimami e ratou sa lako ena mataka lailai kinai bulubulu, ka ratou vakidacalataki keimami.

²³"A ratou sa sega ni raica na yagona, ka ratou tukuna, ni ra a raici ira na agilosi ka ra tukuna vei iratou ni sa bula o Koya.

²⁴Ka so keimami dau tikovata era a mani lako talega kina i bulubulu, ka ra vakadinadinataka na ka e ratou tukuna na yalewa; ia era sega ga ni raici Koya.

²⁵Sa tukuna o koya vei rau, "Oi kemudou na tamata lialia sa rui berabera na nomudou kila ka vakabauta na nodra vosa na parofita.

²⁶"Sa dodonu me sotava na veika oqo na Karisito ka me qai curu kina Nona i ukuuku?"

²⁷Tekivu mai vei Mosese kei ira kece na parofita, me vakamacalataka vei rau na veika kece e tukuna nai Vola Tabu me baleti Koya.

²⁸Ni ratou sa volekata yani na koro e rau lako tiko kina, sa qai lakoi liu o Koya me siviti rau.

²⁹Ia e rau sa kerekere vua, ka vaka, mo tiko vata mada ga kei keirau, ni sa yakavi mai na vanua, ka sa kala na siga." A sa qai lako o Koya me tiko vata kei rau.

³⁰Ia ni sa ratou dabe e na teveli me vakarau na kana, a sa taura o Koya na madrai, sa masulaka ka dovia ka solia vei rau.

³¹A sa qai rai na matadrau ka rau sa kilai Koya; ia a sa yali tani o Koya mai vei rau.

³²A rau sa veitukunitaka, a sega li ni katakata na yalodaru e na nodatou a veivosaki tiko mai gaunisala, kei na Nona a wasea vei kedaru nai Vola Tabu?

³³A rau sa tucake ena auwa o ya ka lesu ki Jerusalemi, ka rau kunei iratou na lewe tinikadua kei ira na kena vo ni ra se soqoni vata tikoga.

³⁴A rau sa tukuna, "Sa tucake dina na Turaga, a sa rairai vei Saimone!"

³⁵Rau sa qai tukuna na veika e a yaco mai gaunisala, kei nai valavala ni nodrau a qai kilai Koya ni sa dovia na madrai.

³⁶Ni ra se veivosakitaka tiko na veika oqo, a sa tucake sara tu ga o Jisu ena kedra maliwa, ka tukuna vei ira, "Dou vakacegu."

³⁷Ia era sa domobula ka rere, ka ra nanuma ni ra raica e dua na yalo.

³⁸A sa tukuna o koya vei ira, a cava mo dou taqaya kina? A cava me vakatitiqa tiko kina na yalomudou?

³⁹"Dou raica na ligaqu kei na yavaqu, sai Au ga oqo. Dou taura ka raica, ni sa sega ni vakalewe ka vaka suina na yalo me vaka dou sa raica tu oqo vei Au.

⁴⁰Ni sa tukuna oti, sa qai vakaraitaka vei ira na ligana kei na yavana.

⁴¹Ia ena levu ni nodra reki kei na qoroqoro era sega kina ni vakadinata, sa tukuna o Koya vei ira, "Se vo eke eso na kakana vei kemudou?"

⁴²A ra sa solia vua e dua na tiki ni ika tavu kei na so mai na sova ni oni.

⁴³A sa taura o Koya ka kania e matadra.

⁴⁴A sa tukuna o Koya vei ira, "Oqo na vosa Au sa dau tukuna vei kemudou ni datou se bula vata, ni veika kece e volai me baleti Au ka vola nai vunau i Mosese, kei ira na parofita kei na same taucoko, ena vakataucokotaki."

⁴⁵Sa qai dolava o koya na nodra vakasama mera kila sara nai Vola Tabu.

⁴⁶Sa qai tukuna vei ira, "Ni sa volai, sa kilikili kei koya na Karisito me vakararawataki ka tucake mai ena mate ena i katolu ni siga.

⁴⁷Ka me vunautaki ena veivanua kecega me tekivu sara ga e Jerusalemi, na veivutuni kei na vakabokoci ni valavala ca.

⁴⁸"Oi kemudou mo dou vakaraitaka yani na veika oqo.

⁴⁹"Ka raica, Au sa tala vei kemudou na ka sa yalataka o tamaqu; ia mo dou wawa tikoga e Jerusalemi me yacova ni sa curumi kemudou na kaukauwa mai cake."

⁵⁰A sa kauti ira tani yani me yacovi Pecani, a sa qai dodoka cake na ligana ka vosavakalouvinakataki ira.

⁵¹Ia ni sa vosavakalouvinakataki ira tiko, sa qai kautani mai vei ira ka kaucake ki lomalagi.

⁵²A ra sa lotu vua, ka ra lesu tale ki Jerusalemi ena reki,

⁵³ka ra sa gumatua ena lotu kei na vakavinavinaka vua na Kalou ena vale ni soro. Emeni.