[43] Joni 1

¹Sa bula tiko na Vosa, qai yaco na i tekitekivu, na Vosa sa tiko vata kei na Kalou, na Vosa ga, o ya na Kalou.

²Sa tiko vata kei na Kalou mai na i tekitekivu.

³Sa buli na ka kecega mai vei Koya, ke sega o Koya sa sega na ka e buli me buli rawa.

⁴Sa tu Vua na bula, na bula oqo sa rarama kina na tamata.

⁵Sa cila yani na rarama ki na butobuto, ia, na butobuto sa lecaikataka ga.

⁶Sa tala mai e dua na tamata na Kalou, na yacana o Joni.

⁷Sa lako mai na tamata oqo mei vakadinadina, me vakadinadinataka na Rarama, me rawa kina ni ra vakabauta na Rarama ena vukuna.

⁸Sa sega ni Rarama o koya, sa talai ga mai, me mai vakadinadinataka na Rarama.

⁹Na Rarama dina ga oqo, ni sai Koya sa vakararamataki ira na tamata, o ira kece sa lako mai ki vuravura oqo.

¹⁰Sa tiko e vuravura na Rarama, sa caka o vuravura mai vua na Rarama, ia na vuravura sa sega ni kila na Rarama.

¹¹Na Rarama sa lako mai vei ira na Nona, o ira na Nona era sa sega ni via ciqomi Koya na Rarama.

¹²Vei ira vakayadua sa ciqomi Koya na Rarama, sa soli vei ira na dodonu me ra luve ni Kalou, vei ira yadua sa vakabauta na yacana:

¹³O ira sa sucu, sega ena dra se ena lewa vakayago, se ena lewa ni tamata, ena lewa ga ni Kalou.

¹⁴Sa yaco me tamata na Vosa, ka sa mai tiko vata kei keda, ka keitou sa raica na Nona i ukuuku ni luvena e dua bauga mai vei Tamana, sa sinai sara ena yalololoma kei na dina.

¹⁵Sa vakadinadina o Joni ena vukuna ka sa kaci yani ka vaka: "Sai Koya oqo au sa dau tukuna, o Koya sa muri au mai, sai Koya dina e dodonu me gadrevi, ni sai Koya sa liu ka Levu vei au."

¹⁶Eda sa ciqoma na Nona taucoko, mai na loloma ki na yalololoma.

¹⁷Ni sa soli mai na i Vunau ena vukui Mosese, ia na yalololoma kei na dina ena vukui Jisu Karisito.

¹⁸Sa sega sara e dua sa raica na Kalou, ena dua na gauna. Na Luvena e duabau ga, o Koya sa tiko ena lomaserei Tamana, me vaka sa vosa kina o Tamana ena Vukuna.

¹⁹Oqo na tukuniyalo nei Joni, ni ra sa vakatalai yani na bete kei ira na Livai mai Jerusalemi me tarogi koya ka vaka: "O cei sara mada o iko?

²⁰Sa vakatusa, ia, sa sega ga ni vakacala, sa vakaraitaka ga "Ni sa sega ni'u Karisito."

²¹Era sa tarogi koya tale? "O iko beka o Ilaijia?" "Sa tukuna ni sa sega." "Sai iko beka na parofita?" Sa sauma tale ni "Sega."

²²Era sa qai tukuna vua, "O iko ga o cei?, me dua kina na ka me keitou tukuna vei ira sa talai keitou mai? Na cava o na tukuna me baleti iko?"

²³Sa qai sauma: "Oi au e dua na domo sa kacikaci tiko ena loma ni vanua, mo ni vakadodonutaka na sala i Jiova."

²⁴O iratou sa vakatalai mai vei ira na Farisi.

²⁵E ratou sa vakatataro ka vaka: "Na cava ga o sa veipapitaisotaki tiko kina, kevaka o sa sega ni Karisito, se o Ilaijia, se na parofita?"

²⁶Sa sauma o Joni ka vaka: "Au sa veipapitaisotaki ena wai, e dua sa tucake tu ena kemudou maliwa, dou sa sega ni kila.

²⁷O Koya ga sa muri au tiko mai oqo e dodonu mo ni gadreva ka sega ni oi au, sa rui levu o Koya, na wa mada ga ni nona i vava e sega ni dodonu me'u sereka, ni'u sa rui torosobu sara.

²⁸Na veika oqo sa caka tiko mai Becibara ena tai kadua ni Joritani, na vanua sa veipapitaisotaki tiko kina o Joni.

²⁹Ena siga ka tarava sa raici Jisu o Joni ni sa lako tiko mai vua, ka tukuna, "Raica na Lami ni Kalou, sa kauta tani na nodra i valavala ca na kai vuravura!

³⁰"Sa i Koya ga oqo au sa dau tukuna tiko, ni sa dua sa muri tiko mai, sa gadrevi vakalevu cake vei keirau, ni sa liu ka Levu vei keirau o Koya.

³¹"Au sa sega ni kilai koya; ia, sa dodonu me vakaraitaki o Koya vei ira na Isireli, au sa lako mai kina oqo me veipapitaisotaki ena wai."

³²Sa tukuna kina o Joni, "Au sa raica na Yalo Tabu sa lako sobu mai lomalagi me vaka na ruve ka sa mai toka ga Vua.

³³"Au sa sega ni kilai Koya, o Koya ga sa talai au mai me'u veipapitaisotaki ena wai sa tukuna vei au, "O Koya ga o sa raica ni sa lako sobu mai vua na Yalo Tabu ka sa mai toka Vua, sai Koya oqo sa dauveipapitaisotaki ena Yalo Tabu."

³⁴"Au sa raica ka vakatusa ni sai Koya oqo na Luve ni Kalou.

³⁵Ena siga tale ka tarava, sa tucake tu o Joni kei na rua na nona tisaipeli.

³⁶Sa vakaraici Jisu ni sa lako voli, sa tukuna mai, sa dina, na "Lami ni Kalou."

³⁷E rau sa rogoci koya na nona tisaipeli ni sa vosa tiko, e rau sa muri Jisu sara.

³⁸Sa vuki mai o Jisu ka raici rau ni rau sa muri koya tiko, sa tarogi rau, "Na cava drau sa vakasaqara" e rau sa sauma, "Rapai, (qasenivuli) o ni sa tiko mai vei?"

³⁹Sa sauma vei rau o Jisu, "Drau lako mai mo drau mai raica." E rau sa lako mai me rau mai raica na vanua e sa tiko kina, rau sa tiko vata kei koya ena siga o ya (oqo sai ka tini ni auwa).

⁴⁰E dua vei rau sa rogoci Joni ni vosa tiko o Adriu, na taci Saimone Pita, sa muri Jisu sara.

⁴¹Sa raici tacina o Saimone ka tukuna vua, "Keirau sa raica na Mesaia" (na Karisito).

⁴²Sa kauti koya sara mai vei Jisu, ni sa raici koya o Jisu, sa tukuna, "O iko o Saimone na luvei Jona. O sa vakatokai me "Kifa", na kena i balebale na "Vatu".

⁴³O Jisu, ena siga ka tarava sa via lako ki Kaleli, sa raici Filipe sara ka tukuna vua, "Muri Au mai."

⁴⁴O Filipe oqo sa lako mai Pecisaita na koro nei Adriu kei Saimone Pita.

⁴⁵O Filipe sa kunei Nacanieli ka sa tukuna sara vua, "Keirau sa kunei Koya sa vosa kina o Mosese ena i vunau, ka era sa volai Koya talega na parofita “ Jisu na kai Nasereci na luvei Joseva."

⁴⁶Sa tukuna o Nacanieli, "E rawa beka ni dua na ka vinaka me lako mai Nasareci?" Sa sauma o Filipe, "lako mada ga mai mo mai raica."

⁴⁷Sa raici Nacanieli o Jisu ni sa lako tiko mai ka sa tukuna sara yani vua, "Raica, sa dua na Isireli dina oqo, ni sa sega vua na veivakaisini."

⁴⁸Sa taro yani o Nacanieli, "O ni sa kilai au vakacava?" Sa sauma o Jisu ka vaka: "ni se bera ni kacivi iko o Filipe, Au sa raici iko oti ni o tiko ena ruku ni vu ni lolo."

⁴⁹Sa vosa o Nacanieli ka vaka, "Rapai, o ni sa Luve ni Kalou! O ni sa Tui, ka nodra Tui na Isireli!"

⁵⁰Sa sauma o Jisu ka tukuna vua, "Baleta ga Ni'u a tukuna vei iko, Ni'u a raici iko ena ruku ni Vu ni lolo, o sa qai vakabauta kina? O na raica na veika lelevu mai na kena oqo."

⁵¹Sa qai tukuna tale, "Sa dina taucoko oqo, Au sa tukuna vei iko, ni sa na oti oqo, o na raici lomalagi ni sa tadola mai, o na raici ira na Agilosi ni Kalou ni ra sa lako cake ka lako sobu mai vua na Luve ni Tamata."