[42] Luke 6

¹Ena dua na siga, oqo nai karua ni siga ni vakacecegu ni oti nai matai ni siga ni vakacecegu, a sa lako voli o Koya ena maliwa ni vei sila. O iratou na Nona tisaipeli e ratou sa qai doloka eso na sila, vocia tani na qana ka ratou kania.

²Ka so kina vei ira na farisi era sa tukuna vei iratou, "na cava dou cakava kina na ka sa vakatabui me caka ena siga ni vakacecegu?"

³Ia sa vosa vei ira o Jisu, ka vaka, sa dou wilika se sega na ka e cakava o Tevita ena gauna e a viakana kina, o koya kei ira na nona i lawalawa;

⁴"Vakacava na nona a curu kina vale ni Kalou. Ka kania na madrai sa vakarautaki, ka solia talega vei ira na nona i lawalawa, na ka oqo sa vakatabui dredre, ia o ira ga na bete sa tara mera kania?"

⁵A sa qai tukuna vei ira o Koya, "Na luve ni tamata sa Turaga talega ni siga ni vakacecegu."

⁶Ena dua na siga ni vakacecegu e a curu talega o koya kina dua na vale ni lotu ka vakatavuvuli. E a lotu tiko kina ena siga o ya e dua na tamata sa mate na ligana i matau.

⁷Ka ra sa wanonovi Koya matua na daunivolatabu kei na farisi, se na vakabulai koya oqo o koya ena siga ni vakacecegu se sega, ka me rawa ni ra beitaki Koya kina.

⁸Ia sa kila o koya na nodra vakasama, a sa tukuna vua na tamata sa mate na ligana, "Mo tucake mai ka tu eke." A sa tucake o koya ka la'ki tu e matadra.

⁹Sa qai tukuna vei ira o Jisu, "Au na tarogi kemuni ena dua na ka: e tara li ni caka ena siga ni vakacecegu na ka vinaka se na ka ca, me vakabulai na tamata se me vakamatei?"

¹⁰A sa vakaraici ira wavoki taucoko o koya, sa qai tukuna vua na tamata qo, "Dodoka mai na ligamu." Sa dodoka o koya, a sa vakabulai na ligana me vaka na ligana kadua.

¹¹Ia sa curumi ira kina na cudru katakata, ka ra veivosakitaka vakai ira se cava mada mera sa na cakava vei Jisu.

¹²Ni sa qai yaco mai na gauna o ya a sa cabe o koya kina ulunivanua me la'ki masu, a sa masu tiko vua na Kalou me dua na bogi taucoko.

¹³Ni sa siga mai, sa qai kacivi ira mai na Nona tisaipeli kivei Koya; mai vei ira oqo sa qai digitaka kina o koya e lewe tinikarua ka vakatokai iratou talega mei apositolo.

¹⁴Saimoni sa vakayacani koya talega me o Pita kei Adriu na tacina; Jemesa kei Joni; Vilive kei Vacolomiu;

¹⁵Maciu kei Tomasi; Jemesa na luvei Alivio, Saimoni sa vakatokai na gumatua;

¹⁶Jiutasa na luvei Jemesa kei Jiutasa Isikarioti o koya e a qai yaco me veivakaisini.

¹⁷A sa lako sobu vata kei iratou o koya ka ra la'ki tu ena dua na buca kei ira vata na Nona i lawalawa tisaipeli, ni ra sa tabili mai na lewe vuqa mai na vanua taucoko vaka Jutia kei Jerusalemi ka yacova yani na baravi vaka Taia kei Saitoni, oqo ena nodra gadreva mera rogoci Koya ka me vakabulai talega na nodra veimate eso,

¹⁸A ra sa lako talega mai o ira na vakatotogani tu ena yalo velavela a ra sa vakabulai kece.

¹⁹O ira na lewe vuqa era sa sasaga ga mera tarai Koya, ni sa vakadrodroya tu o koya na kaukauwa ni veivakabulai a ra sa vakabulai kecega.

²⁰Sa vuki o koya ka rai yani vei ira na Nona tisaipeli, ka tukuna: sa kalouvinaka oi kemudou na dravudravua ni sa nomudou na matanitu ni Kalou.

²¹Sa kalouvinaka oi kemudou sa via kana e daidai, ni dou na vakamamautaki. Sa kalouvinaka oi kemudou sa tagi e daidai, ni dou na dredre.

²²Sa kalouvinaka oi kemudou ni o ira na tamata era sevaki kemudou, ni ra sa sogolati kemudou, ka vakasewasewani kemudou, ka wiliki kemudou me vaka dou vuni ca, ena vukuna na luve ni tamata.

²³Me gauna ni nomudou marau ena siga oqori ka lade ena reki! Ni sa ka levu sara na kemudou i sau mai lomalagi, ni sa vaka talega oqo nai tovo era a cakava na nodra qase vei ira na parofita.

²⁴Ia ena ca vakalevu oi kemudou sa vutuniyau, ni kemudou i sau dou sa taura rawa tiko e dai.

²⁵Ena ca vakalevu oi kemudou sa kana ka mamau, ni dou na viakana. Ena ca vakalevu oi kemudou sa veidredrevaki tiko e daidai, ni dou na rarawa ka tagi.

²⁶Ena ca vakalevu ke ra sa vakalavelaveti kemudou na tamata kecega, ni o ira na nodra qase era dau cakava vakakina vei ira na parofita vakailasu.

²⁷Ia dou rogoca na ka ka'u tukuna oqo: lomana na kemu meca, ka dou caka vinaka vei ira sa sevaki kemudou.

²⁸Vosa vakalouvinakataki ira sa rukaki kemudou, kei na nomudou masulaki ira o ira sa vakacacani kemudou.

²⁹Kevaka e dua e mai sabica na balumu golea tale vua na balumu kadua. Kevaka e dua e mai kauta tani na nomu kote, kakua ni bureitaka talega vua na nomu sote.

³⁰"Dau solia na ka vei ira na dau mai kerekere. Vei ira na kauta tani na nomu i yau kakua ni o via kawaitaka mo kauta lesu mai.

³¹"Me vaka sara ga na ka dou vinakata me caka vei kemudou, dou cakava vaka kina vei ira na tamata.

³²Ia kevaka mo dou lomani ira ga na daulomani kemudou, a cava ena qai kemudou i sau? Ni o ira mada ga nai valavala ca era lomani ira na daulomani ira.

³³"Kevaka mo dou caka vinaka vei ira ga era caka vinaka vei kemudou, e dua li na ka vinaka dou na rawata kina? Ni o ira talega na tamata i valavala ca era cakava vaka kina.

³⁴"Kevaka dou solia na i lavo vei ira ga dou kila ni ra na solia lesu tale vei kemudou? Ni o ira talega na tamata i valavala ca era solia nai lavo mera taura lesu tale e levu cake.

³⁵Ia dou lomani ira na kemudou meca, ka caka vinaka tikoga, ni dou sa solia na ka, kakua ni dou namaka mo dou taura lesu tale; na kemudou i sau ena ka levu sara, ka dou na yaco kina mo dou luvei Koya sa cecere sara. Ni sa dau yalovinaka o koya vei ira sa yaloqa kei ira na tamata i valavala ca.

³⁶"O koya oqo mo dou dauyalololoma, ni sa dauyalololoma na tamamudou.

³⁷"Kakua ni dou lelewa, ena sega kina ni dou lewai. Dou kakua ni veibetaki, dou na sega kina ni beitaki. Dou dau veiciqomi, dou na ciqomi talega kina.

³⁸"Mo dou dau soli, ena soli lesu tale vei kemudou; nai yau dou solia ena vakalesui kece tale mai vei kemudou, dou na sega ni taqea rawa na kena taladrodro mai, ena mai vuabale ka na kureitaki me lutu sobu, me rawa ni drodro tale mai vei kemudou. Nai vakarau ga dou vakarautaka, ena vakarautaki tale vei kemudou."

³⁹A sa tukuna vei ira e dua na vosa vakatautauvata: e rawa li ni tubera na mataboko e dua tale na mataboko? E sega li ni rau na lutu ruarua kina i keli?

⁴⁰"E sega ni rawa me uasivi cake na tisaipeli mai vua na nona qasenivuli, ia o ira vakaaduaga era vakavulici vinaka era na tautauvata kei na nona qasenivuli.

⁴¹Na cava beka o sa rui kauwaitaka kina na malamala mai na mata i na wekamu, ka o sega ni vakasamataka ni tu mada ga e matamu na tikinikau.

⁴²"E rawa vakacava vei iko mo tukuna vua na wekamu, laiva mada vei au me'u leuta tani na malamala mai na matamu, ni o iko mada ga na kau e tu e matamu o sega ni raica rawa tiko? Na dauveivakaisini! Mo leuta tani mai e liu na kau mai matamu, o sa na rawa ni qai raica vakavinaka kina na malamala mai na matai na wekamu.

⁴³Na kau vinaka e sega ni rawa me vuataka na vua e ca, se na kau ca me vuataka na vua e vinaka.

⁴⁴Ni kau kecega sa kilai ena vuana. O ira na tamata era sega ni rawa ni tauca na vua ni lolo mai na veiwavakavotona, se mera tauca na vua ni vaini mai na wa gadrogadro “

⁴⁵Na tamata e savasava tu na yalona ena lako ga mai kina na ka vinaka; na tamata ca ena dau vakavurea tu ga na ka ca mai na dukadukali ni yalona. Ena dau vosataka ga na gusuda na veika e vakasinaita tu na yaloda.

⁴⁶Ia na cava dou sa kacivi Au tiko kina 'Turaga, Turaga', ka dou sega ni cakava na ka ka'u tukuna?

⁴⁷Vei koya e lako mai vei Au, ni rogoca ka cakava na ka ka'u tukuna, Au vakaraitaka vei kemudou ni o koya sa vaka:

⁴⁸E dua na tamata sa tara na nona vale, ka kelia vakatitobu a sa vakayavutaka ena vatu dina. Ni sa yaco na waluvu a sa tacoka mai na kui ni wai ka biliga na vale oqo, a sa sega ni tosoya rawa na vale ni vakayavutaki tu ena vatu dina.

⁴⁹"Ia vei koya sa rogoca ka sega ni cakava kina e dua na ka, sa vaka e dua na tamata sa tara na nona vale ena dela ni qele ka sega na kena yavu, ni sa kui mai vakaukauwa na wai ka biliga na vale oqo, sa vakasauri ni sa bale sobu. Ka sa vakacacani sara vakalevu na vale oqo."