[42] Luke 5

¹Ena dua na siga ni tucake tu o Koya ena bati ni drano mai Kenisareti, ka ra veidrigidrigi yani vua na lewe vuqa mera rogoca na vosa ni Kalou,

²A sa raica e rua na waqa ni rau tu ena drano; ia e ratou biuta tu na gonedau ka ratou la'ki savata vinaka tiko na nodratou lawa.

³Na waqa nei Saimoni sa mani vodoka o Koya, ka kerei koya ke rawa ni tosoya vakalailai yani ki wai. Sa qai dabe tiko mai waqa o Koya ka vakavulici ira na lewe vuqa.

⁴Ni sa oti vinaka na Nona vosa, sa tukuna vei Saimoni, "dou toso yani kina vanua titobu, ka dou viritaka sobu kina na nomudou lawa me so e bau rawa kina."

⁵Ia sa sauma o Saimoni ka tukuna vua, "Kemuni saka, keitou sa kitaka mai ena bogi taucoko me bau dua e rawa e sega sara ga; sega ni dua na ka o ya, ena vuku ga ni Nomuni vosa ka'u na viritaka sobu kina na lawa."

⁶Ni ratou sa kitaka vakakina, sa ka vakaitamera sara na ika e ratou sa rawata, a sa bote kina na nodratou lawa.

⁷E ratou sa yalovi iratou sara ga na vo ni nodratou i tokani, mai na waqa kadua me ratou lako mai ka veivuke. A ratou sa lako mai ka vakasinaiti na waqa ruarua, a sa tara kina na wai na batibati ni waqa ruarua ka sa tekivu me dromu sobu.

⁸Ni sa raica o Saimoni Pita, sa tekicuva sobu ki na duru i Jisu, ka tukuna, "Kemuni na Turaga, mo ni lako tani vei au eke, ni o au e dua na tamata i valavala ca!"

⁹Ni o koya kei iratou na tikovata tukuna, sa dua na ka na levu ni nodratou kurabuitaka na ika e ratou sa rawata;

¹⁰Ena siga o ya e rau a veitomani talega kei Saimoni oi rau na luvei Sevete o Jemesa kei Joni. A sa tukuna o Jisu vei Saimoni, "Mo kakua ni rere. E daidai ka lako yani o iko mo sa na gonedau ni tamata."

¹¹Ni ratou sa la'ki vakelea na waqa ruarua ki vanua, e ratou sa biuta na nodratou ka kecega ka muri Koya.

¹²Ena Nona a tiko ena dua na koro, ka raica, sa raici Jisu mai e dua na tamata tauvi vukavuka; sa mai cuva e matana ka kerei Koya vakabibi, ka vaka, "Turaga, kevaka walega me sa lomamuni oqo au kerea mo ni vakasavasavataki au."

¹³A sa dodoka o Koya na ligana ka tarai koya, ka tukuna, "sa rawa ni sa lomaqu; mo savasava mai." Vakasauri ni sa takali tani mai vua na vukavuka.

¹⁴Sa qai vakarota vua me kakua sara ni tukuna vua e dua, "Ia mo lako ka la'ki vakaraitaki iko kivua na bete, ka cabora na nomu i madrali ni vakasavasavataki, me vaka nai vakaroi Mosese me vakadinadinataka vei ira ni o sa vakabulai."

¹⁵Sa tete vakatotolo sara kina na kena i tukutuku ena veivanua vakavolivolita; a ra sa tabili mai kina na lewe vuqa me ra mai rogoca, ka me vakabulai ira talega o Koya ena nodra malumalumu.

¹⁶Ka dau wasoma na Nona dau lako kina vanua liwa me la'ki masu kina.

¹⁷E a vakatavuvuli tiko o Koya ena dua na siga, ka ra dabe tiko kina e so na farisi kei na so na qasenivuli ni Vola Tabu, e ra lako mai ena veikorokoro va Kaleli Jutia kei Jerusalemi. A sa vakasinaiti Koya tu na kaukauwa ni Turaga ena siga o ya me na vakabulai ira.

¹⁸Ka raica, eso na tamata e ratou sa colata e dua nai davodavo ka davo tiko mai kina e dua na tamata tauvi paralase, e ratou sasaga me ratou curumaki koya yani e matana.

¹⁹Ni sa dredre na nodratou curumaki koya yani i loma, ena vuku ni osodrigi ni tamata, e ratou sa qai sasaga cake kina dela ni vale ka basuka na delana, e ratou sa qai vakalutulututaki koya sobu ena i davodavo me lutu yani ena kedra maliwa ka tau sara ena mata i Jisu.

²⁰Ni sa raica o Koya na nodratou vakabauta, sa tukuna vua, "Tagane, sa bokoci na nomu i valavala ca."

²¹O ira na dauni VolaTabu kei ira na farisi era sa vakataroga e lomadra, ka vaka, "O cei na tamata oqo me vosavakacacataka na Kalou? O cei li e rawa ni bokoca nai valavala ca na Kalou duadua ga?"

²²Ia sa kila o Jisu na vakanananu ni lomadra, a sa tukuna vei ira, "a cava e vakatarotaro kina na lomamudou?

²³"A cava e rawarawa me tukuni, sa bokoci na nomu i valavala ca, se me tukuni, 'Tucake ka lako?'

²⁴Ia me rawa ni dou kila ni o Koya na luve ni tamata ka sa tu Vua na kaukauwa e vuravura me bokoca nai valavala ca “ sa tukuna o Koya vua na tamata sa tauvi paralase, Au sa tukuna oqo vei iko, mo tucake, ka taura cake na nomu i davodavo, ka lako ki nomudou."

²⁵vakasauri sa tucake ka tu e matadra, a sa taura cake na nona i davodavo ka a davoca tiko mai, sa qai lako ki nodratou ena vakalagilagia na Kalou.

²⁶Era sa qoroqoro kece ka vakacaucautaka na Kalou a sa tarai ira na rere, era sa tukuna, "e dua na ka e veivakurabuitaki levu keimami qai raica e daidai!"

²⁷Ni sa oti na veika oqo, sa qai lako yani o Koya ka raica sara e dua na daukumuni vakacavacava na yacana o Livai, ni dabe tiko ena nona vale ni volavola. A sa tukuna vua o Koya, "Mo muri au mai."

²⁸A sa biuta kece o koya na veika taucoko, ka sa cavutu, ka muri koya yani.

²⁹A sa cakava Vua o Livai e dua na magiti levu ena nona vale ga. Ka lewe levu sara na daukumuni vakacavacava kei na so tale na tamata, era a tiko talega kina me ra kana vata kei Koya.

³⁰Era sa vakalewai iratou kina na Nona tisaipeli o ira na nodra daunivolatabu kei na farisi, ka vaka, "A cava mo dou la'ki kana vata kina ka gunu vata kei ira na daukumuni vakacavacava kei ira na tamata i valavala ca?"

³¹A sa tukuna vei ira o Jisu, ka vaka, "Na vuniwai e sega ni yaga vei ira sa bula vinaka, ia vei ira ga era sa tauvimate.

³²"Au sa sega ni lako mai me'u kacivi ira sa yalododonu tu, ia kivei ira ga nai valavala ca, mera veivutuni."

³³A ra sa qai tarogi Koya, o ira na tisaipeli i Joni kei na farisi talega, na cava era daumasu ka lolovaka wasoma kina, ia o ira na Nomu era kana ka gunu wai tu ga?

³⁴Sa tukuna vei ira o Koya, "E rawa li ni dou tukuna vei ira na weka ni tagane sa vakawati, me ra lolo ni se tiko vata kei ira o koya na tagane sa vakawati?

³⁵"Ia ena yaco mai na siga me na kau tani kina mai vei ira na tagane sa vakawati; ena gauna o ya era sa na qai lolo kina."

³⁶Sa qai tukuna vei ira e dua na vosa vakatautauvata: e sega ni rawa me dua e cula vata na tiki ni sulu vou me cula vata nai sulu makawa, ena rawa ni kadresu tale kina nai sulu vou, e sega talega ni rawa me rau veisemati vata na tiki ni sulu vou kei nai sulu makawa.

³⁷E sega talega ni dua me sova na waini vou kina tavaya waini makawa; ena rawa ga ni kavoro na tavaya waini makawa ena vuku ni waini vou, ka rau sa qai vakamaumautaki ruarua tu.

³⁸Ia na waini vou me sova ga kina dua na tavaya vou, e rau na maroroi ruarua kina.

³⁹"E sega ni rawa me dua sa dau matau tiko vua na gunu waini makawa, me qai vakasauri me karamacataka na waini vou; ni sa tukuna, e totoka ga o koya na ka makawa.'"